12. hodownika 1854 narodźi so w Sćijecach do burskeje swójby pozdźiši farar a předsyda Maćicy Serbskeje Jan Pawoł Křižan. Po maturiće w Budyšinje studowaše wón w Lipsku, Tübingenje a Jenje ewangelsku teologiju. Wot lěta 1881 do 1883 bě duchowny w Kamjencu, hdźež tež serbsce prědowaše. 1883 bu farar we wulkej Hodźijskej wosadźe hač do smjerće 22. małeho róžka 1923. W Kamjenskim času zasadźowaše so tam za wožiwjenje serbskeje wučby. Najwažniše w skutkowanju Křižana bě, zo bu 1903 za předsydu Maćicy Serbskeje wuzwoleny. Wažne zastojnstwo wukonješe nimale 20 lět. Křižan zastupowaše konserwatiwnu politiku a bě mjez druhim přećiwo załoženju Domowiny jako třěšny zwjazk serbskich towarstwow 13. oktobra 1912 we Wojerecach. Wón měnješe, zo jenož Maćica serbski lud zastupuje a zo je Domowina njetrjebawša. Wón spisa někotre nabožinske basnje a přinoški za časopis Pomhaj Bóh a za Misionski Posoł, kotryž tež 14 lět redigowaše. Nimale štwórć lětstotka staraše so wo wudaće ewangelskeje protyki „Předźenak“. Jako młody duchowny je tež někotre nabožinske spisy wudał. Manfred Laduš

„Su Serbja indigeny lud?“ To prašach mojeho muža z peruanskej identitu, z němskim pasom a serbskim jazykom. „Haj, wězo“, měnješe bjez wahanja. Na blaku googlowana definicija UNO njeje tak kruta, zo móhłoj jasnje z „ně“ wotmołwić kaž kulturni wědomostnicy Serbskeho instituta w swojim nowinskim přinošku. Tón skutkuje kaž interview, ale njenamakaš mjeno nowinarja, kiž by rozmołwu wjedł. Potajkim stajachu sej wědomostnicy sami swoje prašenja. Prěnje čitaš hnydom w nadpismje: „Su Serbja wopor kolonializma?“ Wotmołwy wuwabjachu mnohe znapřećiwjenje. Ja mam prašenja: „Po tym zo běchu słowjanske kmjeny podćisnjene, so do Frankskeho mócnarstwa integrowachu.“ Kak funguje integracija po podćisnjenju? „Nichtó wšak tež wo tym njerěči, zo su frankscy wjerchojo [Delnjo]Saksow, Durinčanow abo Bayerow kolonizowali.“ Njeměrješe da so kolonizacija na wuchod do podćisnjenych słowjanskich a baltiskich krajow? „Słowjanscy wobydlerjo njeběchu žani wobydlerjo druheje klasy.