Sobotniše wusyłanje telewizijneho magacina Wuhladko wopřijima składnostnje mjezynarodneho dnja dźěsća premjeru: Prěni raz wuhotuje dohromady 15 dźěći wulki dźěl programa, jako moderatorka runje tak kaž jako reporter. Nanajwjace z nich njebě dotal ani před kameru ani za njej stało (hlej tež rubriku Telewizija). Foto: MDR/Wuhladko

Farar, kapitular a šolastikar swjateho Pětra w Budyšinje Michał Buk narodźi so 24. meje 1804 w Zejicach do ratarskeje swójby. W Praze bě chowanc Serbskeho seminara a studowaše teologiju. Wot biskopa Franca Jurja Loka dósta 9. wulkeho róžka 1830 měšnisku swjećiznu w Budyšinje, hdźež wosta w duchownej słužbje hač do smjerće 8. nalětnika 1865. Bu na Mikławšku pochowany. „Wón je naše z procha stawace serbstwo ze słowom a skutkowanjom podpěrał“, pisaše Michał Hórnik w swojim nekrologu. Spočatnje běše Michał Buk wikar a němski swjatočny prědar w tachantskej cyrkwi, wot 1838 pjeć lět prěni kapłan Serbskeje cyrkwje a wot 1843 do 1860 direktor tachantskeje šule. 21. meje 1855 wuzwolichu jeho za kanonikara/šolastikarja. Wot 1861 do smjerće 1865 bě kapitular a konsistorialny radźićel tachantstwa. ­Michał Buk bě załoženje Maćicy Serbskeje 1847 sobu přihotował a bě ­aktiwny čłon jeho wuběrka. Za Maćičnu knižku pisaše 1849 „Knjez Mudry“ a 1856 „Wosobny dar za křesćanow“. Dopisowaše wjele do serbskich a němskich nowin. Za w nowym ­łaćonsko-serbskim prawopisu 1847 wudatu prěnju čitanku za katolske šule spisa powědku. Manfred Laduš

Wot dźensnišeho su tež Serbske Nowiny w socialnej syći Instagram zastupjene. Na accounće z mjenom serbske_nowiny namakaja zajimcy wotydźenja nowostki a zajimawostki z Łužicy a wězo tež zwonka njeje. Wot póndźele do pjatka wozjewja team za socialne syće jednu story z nowosćemi dnja kaž tež dwaj postaj, kotrež přinoški z ćišćaneje nowiny tematizuja. Cil poskitka je lěpši kontakt k čitarkam a čitarjam nowiny. Za to steji stajnje tež redaktor abo redaktorka k dispoziciji, kotraž naprašowanja na kanalu wotmołwja. Wjeselimy so hižo, Was bórze na našim kanalu powitać směć. Kathrin Spiesec

Budyšin (SN/bn). Serbski ludowy ansambl (SLA) wuhotuje lětsa třeći raz rjad Kulturna zahroda. Pod Budyskej Röhrscheidtowej baštu předstaja wot zajutřišeho do kónca junija stajnje wot štwórtka do njedźele dohromady 16 hudźbnikow resp. skupinow runja telko programow pod hołym njebjom. Wuwzaće je kónc tydźenja 14. a 15. junija, na kotrymž wotmějetej so „Słowjanskej nocy“ na dworje Smochčanskeho kubłanišća swj. Bena (Serbske Nowiny rozprawjachu).