W Ludowym nakładnistwje Domowina chcedźa lětsa nowu zběrku pohladnicow z motiwami serbskich jutrownych jejkow zestajić a wudać. Dotalna zběrka dźesać tajkich kartow je w lěće 2018 wušła a je mjeztym wupředata. Tuž pyta LND z podpěru Spěchowanskeho kruha za serbsku ludowu kulturu wuměłcow a wuměłče, kiž bychu swoju zběrku profesionalnje fotografować dali a ju zjawnosći předstajili. „Wažne nam při tym je, zo maja debjerjo wuski wosobinski zwisk k serbskej rěči a kulturje“, zdźěli jednaćel nakładnistwa Syman Pětr Cyž. Motiwy jejkow měli wšu pisanosć a mnohostronskosć serbskich jutrownych jejkow pokazać. „Wšojedne hač jedna so wo wóskowane, bosěrowane, škrabane abo wužrawane jejka – kóžda technika je zajimawa“, měni za projekt zamołwita lektorka Andrea Nowakowa.

Zajimcy njech nakładnistwu hač do 23. januara maksimalnje pjeć probowych fotow swojich najrjeńšich jejkow sposrědkuja (z mejlku: abo z whatsappku: 0152 - 592 684 82).

Budyšin (SN/bn). Serbski institut (SI) ­poskićuje wotnětka nowy format „Sorabistika po puću“. Rjad ma sobudźěłaćerkam a sobudźěłaćerjam institucije być „z dobrej składnosću, na wosebite wašnje dohlad do swojich slědźenjow wo ­rěči, stawiznach a kulturje Serbow“ posrědkować, kaž we wčera wozjewjenym programje rěka. Z nowostku zahaji SI zdobom jubilejne lěto, z kotrymž na róčnicu załoženja Instituta za serbski lu­dospyt jako předchadnika dźensnišeho slědźenišća a z tym na „75 lět institucionalizowaneje sorabistiki w Budyšinje“ zhladuje (SN su rozprawjeli).

Budyšin (SN/bn). 25 premjerow w němskej a serbskej rěči je Němsko-Serbske ludowe dźiwadło w minjenym kalendrowym lěće předstajiło. Najwjace přihladowarjow, mjenujcy nimale 36 000, přiwabi inscenacija Budyskeho lěćneho dźiwadła pod hołym njebjom „Alice im Wunderland“. „Zawěšk za lěto 2025 je mjeztym zawrjeny, zhladujemy na wulku prezencu a žiwu wćipnosć. Dohromady 123 643 wopytowarkow a wopytowarjow je na 801 zarjadowanjach žurle pjelniło, so smjało a so dźiwało, diskutowało a z nami dźiwadło dožiwiło. Wutrobny dźak wšitkim, kotřiž su k tomu přinošowali – na jewišću kaž tež před a za nim! Tute ličby njesteja za statistiku, ale za přitomnosć, za bjezposrědne dožiwjenja mjez publikumom a hrajerjemi, za wuměnu mjez žurlu a jewišćom, za přiklesk. Wone su pohon a nas zawjazuja, tež přichodnje ze zmužitosću, rozpalitosću a zastupujo jasnu poziciju postupować.“ Tele słowa intendanta NSLDź Lutza Hillmanna su wobstatk zdźělenki, z kotrejž NSLDź zašłe dwanaće měsacow bilancuje.