Po rěčnej krajinje dundali
Choćebuz (ll/NC). Dźewjeć studentow a studentkow z uniwersity Viadrina w Frankobrodźe nad Wódru je minjeny pjatk na ekskursiji Choćebuske dróhi přeslědźiło. Zaběra z mjeńšinami je dźěl jich studija kulturnych wědomosćow. Zaměr běše, so do žiwjenja Delnjoserbow zanurić. W Serbskim instituće (SI) staj Šyman Blum a Evan Bleakly studowacym w jendźelskej rěči přednošowałoj. Wšako pěstujetej Viadrina a SI hižo dołho dobre styki, kajkež tuchwilu předewšěm docentka Karolin Bredowa dale njese.
Mjeztym bě to hižo druha ekskursija, kotraž studentam Viadriny serbski swět wotkrywa. Wjetšina studentow, kotřiž su do Choćebuza přijěli, njeje němsce rěčała. Někotři pak pochadźeja z druhich słowjanskich krajow. Woni zamóžachu zwisk k jim dotal cuzej słowjanskej rěči wutworić a někotre delnjoserbske słowa rozumić. Wosebje wulki zajim zbudźachu mjez studowacymi serbske nałožki.
Drasta pasionskich a jutrownych spěwarkow z Łužicy je drasta lěta ...
Chór Jarobinka wobkuzłał
Choćebuz (KP/SN). „Cyrkwje su wotewrjene rumy za wšěch“. Pod tymle hesłom přeprošuja cyrkwje hižo wot lěta 2002 stajnje swjatki w Choćebuzu a w Berlinje na nóc wotewrjenych cyrkwjow. Za to přihotuja w muzejach a cyrkwjach skutkowacy wosebite programy. Zdobom poskićuja ludźom składnosć, rumnosće dožiwić a na so skutkować dać.
Lětušu swjatkownu njedźelu je Spěchowanske towarstwo za serbsku rěč w cyrkwi wospjet serbski program wuhotowało. Na małej žurli ewangelsko-metodistiskeje cyrkwje w Choćebuzu je žónski ansambl Jarobinka pod nawodom Walburgi Wałdźic publikum ze serbskimi spěwami zahorił. Izabela Kałduńska je spěwarki na huslach přewodźała. Z pomocu efektow a loop-station zynki swojeho instrumenta přeměnja a zwoprawdźa tak nimale orchestralny zwuk. Z hudźbu a ze spěwami za film „Pola nas rěka wona Hanka“ su wšitcy zhromadnje publikum zahorili. Nimo toho su wobdźěłane wersije ludowych pěsnjow, kaž na přikład „Steji ta lipa“ a „Hołbik dwě běłej nóžce ma“, w delnjoserbskej rěči a slepjanšćinje zaspěwali.
Šulerjo na čitanju jako detektiwojo skutkowali
Šulerjo a šulerki pjateho a šesteho lětnika Serbskeho gymnazija Budyšin su so zašły pjatk jako detektiwojo wuspytali a za slědami a podhladnymi pytali. Wuchadźišćo: Lubina Hajduk-Veljkovićowa je dźěćom swoju nowu knihu předstajiła.
Budyšin (SN/jp). Jónu so čuć kaž detektiw? To smědźachu šulerki a šulerjo Serbskeho gymnazija Budyšin dožiwić, jako jim Lubina Hajduk-Veljkovićowa swoju kriminalku „Wćipne nosy – mysteriozne hroženja“ premjernje předstaji.
Dohromady něhdźe 35 gymnaziastow pjateho a šesteho lětnika je prezentaciju dožiwiło. Po snědanskej přestawce zetkachu so w rjadowniskej rumnosći. Byrnjež paralelnje dorostowy chór 1. kulturneje brigady za wustup we wobłuku Budyskeho nalěća zwučował (hlej tež na 4. stronje),je wjace zajimcow přichwatało hač wočakowane.
Pućowanske rozprawy serbskeho dundaka tež němsce
Po Lipsku a Kamjencu staj wudawaćel a přełožowar Friedrich Pollack ze Serbskeho instituta a lektor Ludoweho nakładnistwa Domowina Michał Nuk knihu „Von Kamenz nach Palästina“ nětko tež w Budyšinje předstajiłoj.
Budyšin (CS/SN). Friedrich Pollack a Michał Nuk předčitaštaj wčera w Smolerjec kniharni někotre pasaže z knihi Jurja Wićaza „Von Kamenz nach Palästina“. Z mysličku, zo „měła so twórba na kóždy pad šěrokej zjawnosći přistupnić“, bě so Pollack do přełožka dał. Wšako su pućowanske rozprawy Wićaza „žiwe, zabawne a druhdy samo chětro aktualne“. Hačrunjež su reportaže hłownje z 1930tych a 1940tych lět, wotbłyšćowachu so konflikty na Bliskim wuchodźe hižo tehdy. „Smalacy reporter“, kotremuž tež „serbski Egon Erwin Kisch“ rěkaja, bě w nadawku čěskeje powěsćernje po puću a dyrbješe po postupje nacijow přez Juhosłowjansku, Bołharsku a Turkowsku přeco dale na juh ćěkać, štož jeho skónčnje hač do Palestiny wjedźeše.
Přirodu dožiwić
Porjedźenka
Němske medije nochcychu sobu rěčeć
Třeća dźěłarnička projektoweho teama SROKA: Kak hodźa so serbska rěč a serbske temy w regionalnych medijach sylnić?
We wobłuku wot Serbskeho instituta koordinowaneho projekta SROKA z nadawkom, strategiju za rewitalizaciju delnjoserbšćiny wuwiwać, je so loni strategiska skupina z čestnohamtskimi wobdźělnikami załožiła, kotraž so z tym zaběra, ideje za konkretne naprawy zběrać resp. zdźěłać. Projektowy team je so hromadźe ze strategiskej skupinu na definowane wotrězki dojednał, a runje su fazu „wobdźělenskeho procesa“ docpěli. Z njej chcedźa zjawnosć do swojich rozmyslowanjow wo naprawach k zesylnjenju rěče zapřijeć, a to na wšelake wašnje. Tak su na přikład lětsa format online-dialoga zahajili (hlej ) a wuhotuja rjad dźěłarničkow, na kotrež zajimcow přeproša, zo bychu so hromadźe wěstym temowym wobłukam wěnowali. Prěni tajkile workshop wotmě so 23. februara z ćežišćom „Serbowanje w swójbje“.
Repertoire z lutymi chłóšćenkami
Jurkowa: Pytamy za partnerami
Chrósćicy (SN/mb). Dobra powěsć po wčerawšim wuradźowanju přihotowanskeho wuběrka za Mjezynarodny folklorny festiwal Łužica: Kulturny a towaršnostny wjeršk so klětu zaso wotměje, a to wot 8. do 11. julija. To budźe 16. raz magnet za hosći zbliska a zdaloka a štyri dny składnosć za zetkanje Serbow. Kaž ko-nawodnica gremija Katharina Jurkowa na naprašowanje našeho wječornika informowaše, su so na posedźenju w Chrósćicach z hospodarskim planom za klětuši festiwal zaběrali.
Domowina jako nošer festiwala, kotraž wulkozarjadowanje přeco z mnohimi partnerami organizuje, chce zaso pola Załožby za serbski lud a kulturneho ruma próstwu wo spěchowanje zapodać. Financielna situacija je wužadowaca. Kaž Jurkowa zdźěli, njebudźetej hamt Picno a gmejna Hochoza porno dotalnej praksy festiwal pjenježnje podpěrować. Najebać to ma při planowanym wotběhu ze zarjadowanjemi w Budyšinje, Hochozy a Chrósćicach wostać. Ale wupada komunalneju partnerow w Delnjej Łužicy dla maja so wotnětka za dalšimi partnerami a móžnosćemi financowanja rozhladować.
