„Mały pampuch“ rěka muzikaliska ­rejowana bajka, kotruž Serbski ludowy ansambl tuchwilu na wšelakich městnach a we wjacorych rěčach předstaja. Zašłu sobotu předstajichu kruch na ­oficialnej hornjoserbskej premjerje w Chrósćicach.

Chrósćicy (SN/MG). Krótko do hornjoserbskeje premjery „Małeho pampucha“ knježi w Chróšćanskej „Jednoće“ wulki hołk a tołk. Dźěći, kiž su z nanom, maćerju, dźědom abo wowku přichwatali, so wočiwidnje njemało na kruch wjesela. Jako so swěca hasnje, je w žurli naraz ćicho. Wšitcy hladaja napjeći na jewišćo. Hłowna akterka Božena Bjaršec pak přińdźe přez zadnje durje na žurlu. Jako kocor ­wona po rejowanej bajce wjedźe. Spěwajo a powědajo zbliži přihladowarkam a přihladowarjam rejowane jednanje. Te je spěšnje powědane: W kuchni pjeku pjekarjo wulki pampuch. Skradźu pak sej tež mały napjeku. Tutón mały pampuch pućuje zhromadnje z kocorom po swěće. Po puću sej wot tych, kotrychž zetka, rady něšto k jědźi wuproša, tak zo je naposledk runje tak wulki kaž tamny pampuch.

Budyšin (SN). Zwjazk serbskich wuměłcow (ZSW) je wčera swoju lětušu hłownu zhromadźiznu w Budyskej Röhrscheidtowej bašće wuhotował. Najwažniši dnjowy dypk nastupaše přestorčenje přichodneje wólbneje zhromadźizny a z toho wuchadźace podlěšenje legislatury aktualneho předsydstwa hač do kónca lěta 2026. Wotpowědny namjet je wjetšina 24 přitomnych bjez napřećiwneho hłosa přiwzała. We wobłuku dźěłoweje a wěcneje rozprawy wuzběhny předsyda towarstwa Jan Bělk, zo je so „po před lětomaj nastorčenej diskusiji a po wobšěrnych rozmołwach ze zarjadom Załožby za serbski lud a z Domowinu docpěło, zo je załožbowa rada lětsa w juniju wobzamknyła zwyšenje honorarow za čitanja na maksimalnje 350 eurow“. Klětu chce ZSW dwanaće tajkich zarjadowanjow organizować, runje telko kaž lětsa.

„Annäherunen. Forst (Lausitz)“ rěka wosebita, hač do spočatka klětušeho měrca přistupna wustajeńca, kotruž móža sej zajimcy tele dny w Baršću wobhladać. Nimo njeje bu njedawno hnydom cyły muzej wotewrjeny.

Sobotu do lětušeje smjertneje njedźele prošeše měšćanostka Simone Taubenek w přepjelnjenej žurli znowa wotewrjeneho Muzeja za tekstilne a industrijowe stawizny Łužicy „Forster“ w Baršću na prěnju wosebitu wustajeńcu. W tutym zwisku informowaše wona wo přetwarje tekstilneje twornje na tutu wuznamnu městnosć a wo jeje wužiwanju. Mjez wopytowarjemi bě tež črjódka Serbow. Muzej, kiž twori wěste srjedźišćo w zjawnym žiwjenju města, su w běhu štyrjoch lět wutwarili. Wo saněrowanju twarjenja, kotrež steji pod pomnikoškitom, bu njehladajo wulkomyslneho spěchowanje mjez druhim přez koncept „Tolerantes Brandenburg“ kontrowersnje diskutowane, ale naposledk je zwoprawdźichu. Kóšty za to wučinjachu něhdźe 20 milionow eurow.