Wojerecy (KD/SN). „Kultura Łužicy skići wjele wjace hač pomolowane jejka, drasty a nabožne nałožki. Kultura Łužicy wopřijima tohorunja ‚sex, drugs & Annemarie‘. Njehladajmy kazanja!“ Z tymile słowami zahaji Grit Lemke minjeny pjatk druhi raz wuhotowany festiwal Subsorb we Wojerowskej Kulturnej fabrice. Zaměr zarjadowanja je „pokazować modernu hudźbu a wuměłstwo zwonka klišejow“. Centralny element festiwala je hišće hač do spočatka julija přistupna wustajeńca „,,Wobrazy splećenych dušow!?“ z twórbami čłonkow kolektiwa Wakuum a w lěće 1974 załoženeje iniciatiwy Nowe serbske wuměłstwo. Kolaže, rysowanki a instalacije wuměłcow posrědkuja widy na domiznu. Narok Bernharda Schippera z Budyšina je, „serbsku modernu w tworjacym wuměłstwje wutworić“. Antje Senftleben z Radworja rozestaja so ze swojimi přinoškami wo „zhubjenej dwurěčnosći a přisłušacej kulturje“ a kritizowaše jako wučerka wuměłskeho kubłanja, zo „serbske wuměłstwo w šulach nic jenož we Łužicy lědma rólu hraje“.