Budyšin (SN/bn). Serbski ludowy ansambl a Budyska bara Sundowner wuhotujetej tež lětsa Kulturnu zahrodu. Wot spočatka junija hač do kónca awgusta wustupuja na bywšej Budyskej byrgarskej zahrodźe najwšelakoriši hudźbni hosćo pod Röhrscheditowej baštu sprjewineho města. Hinak hač w minjenych třoch lětach pak njewotměja so koncerty trójce wob tydźeń, ale stajnje sobotu. Nowy rytmus formata je po słowach intendanta SLA Tomasa Kreibicha-Nawki reakcija na wothłós publikuma: „Často smy słyšeli, zo je poskitk prosće přewobšěrny. Z redukciju chcemy zajimcam rozsud wolóžić a jim tak snano zmóžnić, naposledk samo wjace zarjadowanjow wopytować móc.“ Jako dalšu nowostku připowědźi intendant potuńšenje płaćizny za zastup wo połojcu.