Team Krabatoweho młyna hotuje so na premjeru druheho dźěla sagi Krabata, kotraž budźe srjedu, 25. junija. Minjeny­ pjatk su zamołwići detaile lětušeje­ produkcije předstajili.

Čorny Chołmc (SN/MG). „Z dychom nawróta“ rěka druhi dźěl sagi wo Krabaće, kiž tuchwilu w refugiju čorneho młynka nadźěłaja. Kaž hižo zašłe lěta přewozmje Michael Kuhn lětsa znowa wuměłski nawod cyłkowneho projekta. Wón so swěru wo to stara, zo budźe kruch naročny a zo změje „charakter ludoweje opery“. To rěka, zo so na recepće, kotryž bě dotal jara wuspěšny, ničo njezměni. Jeničce přidawki buchu modifikowane.

Marcel Walther přewozmje prěni raz titulnu rólu Krabata. Hanku předstaji tohorunja prěni raz Pauline Weschta. Wobaj dźiwadźelnikaj staj we wjacorych produkcijach po cyłej Němskej prěnje jewišćowe nazhonjenja nazběrałoj. Za Marcela Walthera je inscenacija w Čornym Chołmcu prěni kruch, kotryž pod hołym njebjom hraje. Na to so młody muž hižo wjeseli, dokelž su ludźo we Łužicy „jara přećelni a hospodliwi“, kaž wón w rozmołwje z našim wječornikom zwurazni.