Marija-Tereza Krawžic je wot lětušeho awgusta młodźinska referentka w zarjedźe Domowiny. Wotrostła bě wona w Chrósćicach a je so po maturje na Serbskim gymnaziju w Budyšinje do Berlina podała, zo by tam socialne dźěło studowała. Dostudowawši swój bachelor dźěše do Lipska, hdźež přizamkny masterski studij w samsnym předmjeće. Po zakónčenju studija něšto lět w Lipsku w pěstowarni dźěłała.„Lětsa pak sym pytnyła, zo je čas, zo so do Łužicy nawróću“, Marija-Tereza Krawžic w swojim běrowje w Serbskim domje powěda. Swoje nadawki wona hižo trochu znaje, wšako bě bywšu młodźinsku referentku Virginiju Hanuzowu před něšto časom hižo někotre měsacy zastupowała. Nětko pak chce so młodźinska referentka najprjedy z aktualnymi potrjebami młodostnych w serbskej Łužicy rozestajeć. Zhromadnje ze serbskim młodźinskim towarstwom Pawk prosy wona tuž předsydow młodźinskich klubow a towarstwow sobotu, 14. nowembra, na tak mjenowanu „Klub-šef-etažu“ do Radworskeho Słodeńka. Z młodostnymi chce so Krawžic wo tym ...

Po poražce 0:3 (22:25, 16:25, 21:25) we Wojerecach přećiwo cyłkej z Kupoje/Noweje Łuki je druhe wolejbulowe mustwo muži Sportoweho towarstwa Viktorija Worklecy tež druhu hru w nowej hrajnej dobje přěhrało. Šěstka wokoło kapitana Metoda Hozy podleža 1:3 (25:19, 16:25, 16:25, 23:25) w Budyšinje prěnjemu mustwu MSV Budyšin. Sobotu hraja Worklečenjo doma přećiwo tabulkowemu susodej z Kundraćic a mustwu z Niederoderwitza. Foto: Konstantin Hrjehor

Po 28 lětach pućowanja bjez kóždehožkuli motorizowaneho wobchadneho srědka je so dyrdomdejnik Karl Bushby (srjedźa) wčera do swojeje domizny – městačka Hull na sewjerowuchodźe britiskeho kralestwa – nawróćił. Swoju 50 000 kilometrow dołhu turu po njeličomnych krajach swěta bě mjeztym 57lětny w lěće 1998 w južnej Chilskej z jenož 500 dolarami w kapsy zahajił. Swěrny přewodnik běše jemu při tym dwukolesaty nakładny wozyčk. Foto: dpa/Annabel Lee-Ellis

Chrósćicy. Něhdźe 20 ludźi dožiwi minjeny pjatk w měrnej atmosferje Chróšćanskeho młodźinskeho kluba druhe čitanje z njedawno wušłeje antologije „LitMiks“ z tekstami, kotrež zajimy młodych ludźi tematizuja. „LitMiks“ – hač do dźesateho wudaća w lěće 2024 hišće pod mjenom „Paternoster“ znaty – je literarny knižny rjad za młode serbske awtorki a młodych serbskich awtorow z Łužicy. Zběrku wudawa Ludowe nakładnistwo Domowina w dwulětnym rytmusu.Projekt funguje jako platforma za młodostnych a młodych dorosćenych w starobje něhdźe 15 do 29 lět. Tu móža woni swójske basnje, krótkoprozu abo dramatiske teksty hornjo- a delnjoserbsce wozjewić. Mnoho přinoškow pochadźa z literarneho wubědźowanja LND. Wudaće wudospołnjeja pak tež dalše twórby. Kónc žnjenca wuńdźe najnowše wudaće „LitMiks 26“, kotrež zjednoća 23 twórbow 14 wšelakich awtorkow a awtorow. Wobsah wjerći so kołowokoło wosobinskich žiwjenskich swětow, dwělow, sonow a žortnych wobkedźbowanjow wšědneho dnja. ...

W serbskich wosadach swjeća w tutych tydźenjach kermušu. Ale štó wuhotuje hišće wulki swójbny swjedźeń a za koho? Stefan Šmit je so mjez ludźimi naprašował.Jana Hiccyna z Noweje WjeskiSmy njedźelu pola nas doma kermušu wuhotowali. To mjeztym hižo 13 lět z mandźelskim činimoj a za naju je to rjana swójbna tradicija, kotruž chcemoj na kóždy pad zdźeržeć. Hosćo su nimo mojeju staršeju a přichodneje maćerje wuj a kuzenk mojeho muža z Wěteńcy. Započnjemy stajnje z wobjedom a potom dawa tež hišće kofej a tykanc. Sami smy tež na kermušu prošeni, a to kóžde lěto do Wěteńcy pola Hickec, jónu pola staršich a jónu pola młodych. To je stajnje jara rjenje.Marcel Hoza z Worklec

Flensburg (SN). Frizišćina ma so w Schleswigsko-Holsteinskej z regularnym wučbnym předmjetom stać. To je za šulske lěto 2029/30 předwidźane. Zakład za to pak ma być, zo su trěbne personalne wuměnjenja spjelnjene a zo je potrjeba zwěsćena. 26. oktobra je kubłanska ministerka Schleswigsko-Holsteinskeje dr. Dorit Steinke plan na 70. posedźenju gremija za prašenja ludoweje skupiny Frizow w Kielu předstajiła. Mjeńšinowy sekretariat ze sydłom w Berlinje je wčera wo tym informował.„Rada Frizow přeje sej kwalitatiwny a dobry poskitk frizišćiny we wšitkich šulskich formach po cyłej kónčinje. Zo so frizišćina jako wučbny předmjet zawjedźe, je wažny a prawy krok. Rěč sej z tym bóle waži. Zo móhli zaměr docpěć, maja so nětko ramikowe wuměnjenja za wukubłanje wučerjow na šulach wutworić“, zwurazni předsyda rady Frizow sekcije sewjer Ingwer Nommensen. „Frizišćina je žiwy dźěl kulturelneje identity w Schleswigsko-Holsteinskej. Zo móhła so rěč tež přichodnym generacijam dale dawać, trjeba wona krute m ...