Wopačneho jateho pušćili su na kupje Bali, dokelž běchu mjeno zaměnili. Muž šansu wužiwaše a so zminy, kaž nawoda jastwa nowinarjam napřećo přizna. Jedna so wo wikowarja drogow, kiž njeje strašny. Zastojnicy běchu mylnje wopačneho jateho do běrowa skazali. Mjeztym je tež jaty pušćeny, za kotrehož wukaz pušćenja poprawom płaćeše. Wón bě wjaceměsačnu jatbu kradnjenja dla wotsedźał­.

Połtřeća hodźiny je policija swjatki njedźelu w Mönchengladbachu tři žrěbjata přesćěhała, kotrež po měsće běhachu. Z wosom policajskimi awtami spytachu je popadnyć. Awta dyrbjachu so jim wu­winyć. Policija wjacore dróhi zaraći. Skónčnje móžachu žrěbjata na pastwu ćěrić­. Bilanca běchu dwě wobškodźenej policajskej awće a wjacore wottorhnjene špihele. Wobsedźer koni njebě znaty.

Přećiwo zerzawemu błótu

Podstupim/Stara Darbnja (dpa/SN/ch). Wobydlerska iniciatiwa Starodarbnjanski jězor chce zapławjenju milionow tonow zerzaweho okeroweho błóta do jězora bywšeje wuhloweje jamy z peticiju w Braniborskim krajnym sejmje zadźěwać. Iniciatiwa je tuž dźensa peticiskemu wuběrkej wjacore tysacy podpismow přepo- dała. Srjedź apryla bě opozicija CDU a Zelenych z wotpowědnej próstwu na čerwjeno-čerwjenej knježerstwowej wjetšinje w krajnym sejmje zwrěšćiła. Z wodźiznow a rjedźenskich připrawow wody w Braniborskej wubagruja kóžde lěto wjace hač 70 000 tonow zerzaweho błóta z bywšich jamow. Kapacity k jeho skła­dowanju na deponijach po wozjewjenju ministra za hospodarstwo Albrechta Gerbera (SPD) njedosahaja. Łužiska a srjedźon­ěmska towaršnosć hórnistwoweho zarjadnistwa tuž pruwuje, hač njehodźało so kóžde lěto něhdźe 200 000 kubiknych­ metrow błóta na dnje 70 metrow­ hłubokeho Starodarbnjanskeho jězora składować.

Inowaciski centrum wotewrjeny

Szczecin (SN/at). Serbski rozhłosownik Roman Nuk z MDR słuša k lawreatam lětušeho Němsko-pólskeho žurnalistiskeho myta Tadeusza Mazowieckeho, kotrež bu wčera wječor we wobłuku Němsko-pólskich medijowych dnjow w „Trafostaciji Sztuki“ w Szczecinje spožčene. Žurnalisća, kotřiž rozestajeja so z němsko-pólskimi naležnosćemi, zasłužeja sej wosebite připóznaće. To podšmórny wicemaršal wojewódstwa Zapadna Pomorska Tomasz ­Sobieraj jako hosćićel na wuznamjenjenskej gali.

Hromadźe z kolegomaj Tomaszom Sikoru z Pólskeje a Tomášom Kopeckým z Čěskeje bě Nuk w sćelaku Polskie Radio Wrocław wusyłany přinošk „Dowodiczek Osobisticzek, czyli Nowy Realizm Graniczny“ produkował. W srjedźišću steja podawizny wšědneho dnja w němsko-pólsko-čěskim krajowym třiróžku. Dźe wo nawuknjenje rěče susoda, lěkarske wopyty kaž tež wo dojězdźowanje abo nakupowanje přez hranicu.

To měješe jury za dobyćerske dźěło w kategoriji rozhłós. Lawdator Jürgen Hingst chwaleše, zo wuprudźa přinošk „šćipku Europy“.