Kathmandu (dpa/SN/K). Sobotne zemjerženje sylnosće 7,8 w Nepalu je sej po najnowšich dopóznaćach skoro 6 000 mortwych žadało. W stolicy Kathmanduwje su pomocnicy 15lětneho pachoła ze sypnjeneho twarjenja wuchowali. Mjeztym zo do hłowneho a dalšich městow pomocnicy a nuzne wěcy za zastaranje přežiwjenych dochadźeja, su sta zničenych hórskich wsow dotal bjez kóždeje pomocy. Organizacije UNO trjebaja 550 milionow dolarow. Z nimi ma so w přichodnym štwórc lěće financować twar přebywarnjow za poł miliona ludźi, kotrymž je rženje 25. apryla bydlenje wzało. 70 000 twarjenjow bu zničenych a wjac hač 530 000 bydlenjow wobškodźenych.

Berlin (dpa/SN/K). Předsyda FDP Christian Lindner je rozhorjeny reagował na rozprawy, zo bě němska tajna słužba ameriskej NSA wjele lět pomhała francoske knježerstwo a komisiju EU wobčušleć. „Tale afera překroča wšě měry“, Lindner zwurazni, „po wšěm zdaću njeje před zwjazkowej tajnej słužbu nichtó a ničo wěste. Kanclerka Merkel dyrbjała wuswětlenje nablaku za šefowsku naležnosć měć a pola europskich partnerow so zamołwić.“ Nowina Süddeutsche Zeitung, WDR a NDR běchu rozprawjeli, zo bu wotposłucharnja BND w Bad Aiblingu znjewužiwana za wobčušlowanje zastojnikow francoskeho wonkowneho minis­terstwa, palasta prezidenta a komisije EU.

Pólska wopomina politikarja a historikarja Władysława Bartoszewskeho

Waršawa (JBR/SN). Na mjeztym 13. pólsko-němskich knježerstwowych konsultacijach minjenu póndźelu we Waršawje wosta jedyn ze stólcow za kulojtym blidom prózdny. Tón bě mysleny za Wła­dysława Bartoszewskeho, społnomócnjeneho pólskeho knježerstwa za pólsko-němske poćahi. Wón je pjatk do toho 93lětny njewočakowano zemrěł. Bjezpo­srědnje do swojeje smjerće bě Bartoszewski narěč wo połoženju mjenowanych poćahow zdźěłał. Ministerska prezidentka Ewa Kopacz dokument předčita.

Pólske nowiny na smjerć Władysława Bartoszewskeho jara wobšěrnje reaguja. „Žiwy biografiski słownik“ mjenuje jeho Gazeta Wyborcza. Tydźenik Polityka cituje­ jedne z wuprajenjow zemrěteho hladajo na jeho wobšěrne skutkowanje: „Sym stajnje po puću a po puću něhdy tež zemru.“

500 eurow wotrunanja ma žona z Göttingena dóstać, po tym zo bě so pod dušu Düsseldorfskeho hotela wopariła. Tole jej sudnicy w Düsseldorfje namjetuja. Žona­ bě sej 3 000 eurow žadała. Při dušowanju bě jej nadobo ekstremnje horca woda po chribjeće běžała, a wona po­ćerpje woparjenja 2. schodźenka. Hotel zamołwitosć wotpokaza, pokazujo na to, zo běchu armatury za nastajenje ćopłeje wody w duši w porjadku.

Ze zražku na Merkur ma so dźensa wječor misija swětnišćoweje sondy Messenger zakónčić. Lěta 2004 startowanej sondźe je po planje ćěriwo wušło. Wot 2011 bě wona jako satelit planet Merkur wobkružiła a jón při tym 250 000 króć fotografowała. Při tym zezběra wulke mnóstwa datow, kotrež chcedźa nětko wu­hódnoćić. Ameriski swětnišćowy zarjad NASA bě misiju 500 kilogramow ćežkej­e sondy wospjet podlěšił, dokelž to jeje­ techniski staw a tank dowoleštej.