Němski čerwjeny křiž w Sakskej je so składnostnje lětušich 200. narodnin z Dobruše pochadźaceje Marije Simonoweje na to dopomnił, zo běše wona prěnja sakska, z paskom čerwjeneho křiža na ruce zasadźena hladarka zranjenych na bitwišćach. Simonowa je jedna ze žonow, kotrež wosebita přehladka „Sotry we wójnje“ Sakskeho muzeja Čerwjeneho křiža w Beierfeldźe předstaji.

Beierfeld (SN/at). Wosebita přehladka „Sotry we wójnje“ je wobstatk Lěta Marije Simonoweje sakskeho DRK, podšmórnje André Uebe, nawoda Sakskeho muzeja Čerwjeneho křiža minjeny pjatk na wotewrjenju wustajeńcy. Tuž je logiske, zo muzejownicy z Dobruše pochadźacej Serbowce wulku kedźbnosć wěnuja. Mjez druhim su w jednej witrinje někotre z njej spožčenych rjadow widźeć.

Wustajeńca z wójnu Ruskeje přećiwo Ukrainje cyle aktualny poćah ma, prezident wo­krjesneho zwjazka DRK Aue-Schwarzenberg Joachim Rudler wu­zběhny: „Čłowjestwo wuknyło njeje, wójnje zadźěwać.“ W DRK płaći neutralnosć kóždemužkuli napřećo. To přehladka dokumentuje, zo by ludnosć tule zasadu lěpje słyšała a lěpje zrozumiła.