Masaker na pólskich wobydlerjach w Ukrainje wostanje łoskoćiwa tema
Waršawa. Kóžde lěto znowa wopomina Pólska bolostny historiski podawk. Tón symbolizuje kaž žadyn druhi hač do dźensnišeho ćežki poměr mjez Pólskej a Ukrainu: ludomordarstwo we Wołynje na dźensnišej zapadnej mjezy Ukrainy. Namócna smjerć tysacow Polakow přez ukrainskich nacionalistow w Druhej swětowej wójnje je ludźom susodneho kraja přeco hišće „hłuboka rana“.
Bjezposrědnje po nadpadźe Němskeje na Sowjetski zwjazk 1941 započa ukrainski nacionalist Stepan Bandera swoje plany nastupajo wutworjenje samostatneje Ukrainy zwoprawdźeć. Tam bydlacych Polakow wobhladowaše wón jako cuzych a jeho plany mylacych. Tuž załoži z dowolnosću němskich okupantow Ukrainsku partizansku armeju (UPA). Jeje wojowarjo počachu Polakow wuhnawać a morić. Wjeršk etniskeho wučisćenja bě 11. julij 1943. Tón dźeń, jako nadpadny UPA 150 pólskich wsow, mjenuja hišće dźensa „krawnu njedźelu“. Wobydlerjow, kotřiž běchu zwjetša w cyrkwjach, brutalnje a zdźěla bestialisce morichu. Masaker žadaše sej smjerć něhdźe 165 000 ludźi.