Choćebuz (KPo/SN). Šula za delnjoserbsku rěč a kulturu je we wobłuku swjedźenskeho programa minjeny štwórtk w Choćebuskim měšćanskim domje swoje 30lětne wobstaće woswjećiła. Přichwatali běchu čestni hosćo z politiki, mnohich serbskich institucijow, docenća šule, partnerojo, maćernorěčni ze serbskich wsow a hosćo z Pólskeje. Uta Henšelowa, mjeztym pjeć lět nawodnica kubłanišća, je zarjadowanje w połnje wobsadźenej žurli wotewrěła. Jako zastupnica wyšeho měšćanosty posrědkowaše Maren Dieckmann, decernentka za młodźinu, sport a socialne naležnosće, zbožopřeća města Choćebuza jako nošerja rěčneje šule.