Tež w serbskich kubłanišćach maja měšane teamy kubłarjow za wažne

Drježdźany/Budyšin/Miłoćicy (SN/MiP). „Ličba muži w sakskich dźěćacych dnjowych přebywanišćach dale stupa. Tuchwilu dźěła 4 237 kubłarjow w našich zarjadnišćach. Z tym je podźěl wo 1,5 na 10,6 procentow rozrostł“, z tutymi słowami zwurazni kultusowy minister Christian Piwarz (CDU) w zdźělence zašły pjatk swoje wjeselo, hladajo na statistiske wuwiće w tutym nastupanju wot lěta 2006 sem. Sakska je z tym nad zwjazkowym přerězkom – tu je kwota kubłarjow jenož 7,9 procentow. „Tutón puć k měšanym teamam kubłarkow a kubłarjow w našich pěstowarnjach mam za jara spomóžny, wšako trjebaja dźěći woboje – žony a muži – jako kubłacych, na kotrymiž so orientuja“, podšmórny minister.