Chrósćicy (SN/AN). Mjeztym hižo 13. raz wuhotowa wčera popołdnju Rěčny centrum Witaj (RCW) swoju schadźowanku za swójby, kotraž wotměwaše so tež lětsa zaso z podpěru Kamjenskeje župy „Michał Hórnik“ w Chróšćan „Jednoće“.

„Dźensa zličichmy něhdźe 280 ludźi, mjez kotrymiž běše k našemu wjeselu zaso jara wjele nowych wobličow“, rozprawja regionalna rěčnica župy „Michał Hórnik“ Katharina Jurkowa. Zabawne zhromadne popołdnjo z najwšelakorišimi poskitkami zahaji so z krótkim programom rejowarkow „Łužičankow“. Po tym běchu wšitcy přeprošeni paslić, sportować, čitać, so z roboterami zaběrać abo cyle jednorje při šalce kofeja a dobrym kusku tykanca do rozmołwy přińć.