Hižo w lěću załoža w Choćebuzu medicinsku uniwersitu. Z toho ma region wulce profitować, wšako garantuje uniwersita nimo nowych dźěłowych městnow tež dobru žiwjensku kwalitu w regionje. Tak fachowcy z toho wuchadźeja, zo změjemy we Łužicy w přichodźe zaso wjace lěkarjow.

Choćebuz (SN/BŠe). Jedyn z najwažnišich projektow w zwisku ze změnu strukturow we Łužicy je bjezdwěla nowa uniwersita za medicinu w Choćebuzu. Wědomostna rada Zwjazka a zwjazkowych krajow je předwčerawšim zelenu swěcu dała­. Hižo w juliju chcedźa zamołwići nowu uniwersitu załožić. W zymskim semestrje 2026/27 je předwidźane, zo móža zajimcy swój studij w stolicy Delnjeje Łužicy zahajić.