Slepo (AK/SN) W Slepjanskej parochiji wostanu mnohostronske, jónkrótne dopomnjenki na serbske kwasy wobchowane. Wo tym swědči 150stronska fotowa dokumentacija „Schwarzweiss – Cernoběłe. Serbske swaŕby w Slepjańskej wósadźe 1902–1954“. Wona wopřijima 107 motiwow kwasnych hosćinow. Wudawaćelka je Domowinska župa „Jakub Lorenc-Zalěski“. Wo redakcionelne wobdźěłanje postarachu so Stephanie Bierholdtec, Heidemarie Richter a Wolfgang Kotisek. Dźakowano spěchowanju załožby „Doma w Slepom, Rownom, Mułkecach“ poradźi so financowanje. Nakład wučinja 300 eksemplarow. „Naš zaměr bě, z kóždeje wsy, parochije kwasne wobrazy dokumentować. To smy zdokonjeli“, wjeseleše so Stephanie Bierholdtec na wčerawšej knižnej premjerje w Slepjanskim Serbskim kulturnym centrumje (SKC). Melanie Kotisek a jeje nan Wolfgang přewodźeštaj prezentaciju na serbskich husličkach resp. huslach. Něhdźe 50 zajimcow předstajenje sćěhowaše.