Feridun Zaimoğlu změje narěč
Kamjenc (SN). Feridun Zaimoğlu změje „2. Kamjensku narěč w cyrkwi swj. Hany“ 11. septembra. Hakle loni bě dźěłanišćo za recepciju Lessinga rjad załožiło.
Zaimoğlu słuša dźensa k najwažnišim němskorěčnym awtoram. Domizna 1964 w Turkowskej rodźeneho spisowaćela je Kiel. Tam studowaše wón najprjedy medicinu. 1995 bě sej z knihu „Kanak Sprak“ wjele připóznaća zdobył. Literarnje wobdźěłuje wón w tutej publikaciji rozmołwy z młodymi mužemi turkowskeho pochada. Mjeztym je 20 knihow wozjewił a je lawreat wšelakorych literarnych wuznamjenjenjow, kaž na přikład Myta jury Bachmannoweho wubědźowanja, Mytow Hebbela, Adalberta von Chamissa, Huga Balla, Grimmelshausena a Jakoba Wassermanna. Najnowši roman Zaimoğluwa „Siebentürmeviertel“ wuńdźe w awgusće.
Feridun Zaimoğlu chce w swojej Kamjenskej narěči „Mesias přińdźe“ recepciju Lessinga rozjimać a so w měšeńcy poezije a woprawdźitosće z prašenjemi nabožiny a wěry rozestajeć.
Carl Blechen
Krabatowy swjedźeńz wužadanjemi
14. Krabatowy swjedźeń wotmě so kónc tydźenja w chorwatskim Žumberaku, domiznje historiskeho Krabata. Wobdźěliło je so něhdźe 60 ludźi z Łužicy, nimo čłonow tudyšeho Krabatoweho towarstwa tež sobuskutkowacy Ćišćanskeje rejwanskeje skupiny.
Sveta Gora (SN/CoR). Na najwyšim wjeršku Žumberakskich horin na mjezy k Słowjenskej Sveta Gora su wčera připołdnju Chorwaća, Serbja a Němcy zhromadnje z Božej mšu Krabatowy swjedźeń zahajili. Šěsć fararjow je tam w kapale swjateho Ilije po grjeksko-katolskim ritusu kemše swjećiło. Kapała bě přepjelnjena, hačrunjež mějachu kemšerjo njewočakowane ćeže, tam dojěć. Hinak hač na chorwatskim wabjenskim plakaće za „Krabatfest“ njebě njebjo nad kapału módre, ale sylna kurjawa a njewjedro puć poćežowaštej. Ćim wjetši zaćišć pak je podawk w přitomnych zawostajił. „Wohnjowa wobora dyrbješe nam najprjedy puć rubać, dokelž bě wulki wichor wjacore štomy spowalał. Zdźěla běchu puće tež přepławjene. Za nas wšitkich bě to dyrdomdej, tež dožiwjenje po tym bě wulkotne a hnujace“, zdźěli Wolfgang Kraus alias Krabat Serbskim Nowinam.
Porjedźenka
Jeho akwarele swědča wo solidnym wuměłstwje
W Choćebuskim Serbskim domje su wčera nowu wosebitu personalnu wustajeńcu molerja a grafikarja Jürgena Royja wotewrěli. Hač do 23. oktobra pokazuja tam 30 wubranych twórbow.
Po serbskim alfabeće po puću
Budyšin (SN). „Mój serbski słownik“ je titul noweje knihi spisowaćela Alfonsa Frencla z Róžanta, kotraž je nětko w Ludowym nakładnistwje Domowina wušła.
W nowostce pućuje wučer na wuměnku po serbskim alfabeće, zo by pochad woteznatych a njewšědnych wurazow wotkrył a so tak do stawiznow rěče zanurił. Mjez druhim praša so za tym, čehodla rěka bydlenska štwórć we Worklecach Nuhlik, zwotkel bjerje so wuraz fawca a što je poprawom z třemjenjom měnjene. Slědźo a kedźbyhódne podeńdźenja wopisujo njerozhladuje so Róžeńčan w swojej runje wušłej knize jenož po domjacych zahonach a blišej łužiskej wokolinje, ale pućuje zhromadnje z čitarjom po zwučenym wašnju po wšěm swěće, při čimž nachadźa zajimawe paralele k serbšćinje. Tak čitar na přikład zhoni, kotry zwisk wobsteji mjez ruskim napojom z mjenom kwas a serbskim swjedźenjom ze samsnym pomjenowanjom, hdźe bu prěnja cyrkej w Hornjej Łužicy postajena, što maja póst a póstnicy zhromadneho a što je zakład wuraza saperlot.
Za prawa Serbow demonstrowali
Wo knihach a kniharni (24.07.15)
„Wroblik Frido a honač Bobi“ njeje literarna koprodukcija Jěwy-Marje Čornakec a Jurja Kocha, kaž sej to znajerjo dźěćaceje literatury nětko snano mysla. Ně, to je titul noweho wabjenskeho prospekta našeho nakładnistwa. 30 hornjoserbskich dźěćacych knihow brošurka nadrobnišo wopisuje. Nimo toho nańdu zajimcy zapis dalšich něhdźe 90 hornjoserbskich dźěćacych knihow inkluziwnje słuchoknihow, kotrež su aktualnje na předań. Brošurka je kónc junija dypkownje k zahajenju doprózdninskeje čitanskeje turneje LND za dźěći wušła.
Specialistka za spagat w SLA
Hižo 18 lět skutkuje wona w Serbskim ludowym ansamblu, najnowši nadawk móhł tuž za Dianu Wagnerec pruwowanje zrałosće być. 1. awgusta přewozmje wona nawod jeničkeho profesionalneho wuměłskeho jewišća w serbskej zamołwitosći.
Prěni raz tež w serbskej rěči
Wot lěta 2008 přewjeduje Spěchowanske towarstwo kulturneho města Zhorjelca (FVKS) zhromadnje z partnerami mjezynarodne fotowe wubědźowanje „Po Puću“ – lětsa sedmy raz, ale prěni raz tež w serbskej rěči.
Zhorjelc (SN/CoR). W swojim sedmym přeběhu wěnuje so fotowe wubědźowanje „Po Puću 2015“ temje „industrija“ w euroregionje Nysa a w južnym euroregionje Sprjewja-Nysa-Bóbr. Motiwy, kaž na přikład z industrijnych stawiznow, industrijnych krajinow, z industrijneje kultury a techniki, su witane.
Wobdźělić móža so fotowi entuziasća wšěch starobow, myta budu spožčene w kategorijach „dorosćeni“, „młodostni“, „fotowa reportaža“ a „lubušk publikuma“, a to w cyłkownym wobjimje 1 500 eurow. Fota maja so do interneta stajić. Hač do 7. septembra móža so zajimcy přizjewić. Wšitke informacije a wobšěrne wuměnjenja za wobdźělenje namakaja na wjacerěčnej internetnej stronje www.fotowewubedzowanje.fvks.eu. Prěni króć njewupisa towarstwo wubědźowanje jenož w němskej, ale tež serbskej a čěskej rěči a nimo toho w pólšćinje a jendźelšćinje.
