Serbja w Strážnicy
Donnerstag, 16. Juli 2015
geschrieben von: Manfred Laduš
Srjedź julija 1965 swjećachu w čěskim měsće Strážnice 20. mjezynarodny festiwal ludowych pěsnjow a rejow, na kotrymž so tež serbske ćělesa wobdźělichu. Chór Lipa župy „Michał Hórnik“, Centralny chór Domowiny (nětko „Budyšin“) a centralna serbska instrumentalna skupina předstajichu tam dwójce dohromady 20 000 přihladowarjam awtentiski Kulowski serbski katolski kwas ze spěwami, rejemi a tradicionalnymi swjedźenskimi ceremonijemi w narodnej drasće. Jan Bulank spěwarjow a hudźbnikow tehdy dirigowaše. Sobudźěłaćer Domu za serbske ludowe wuměłstwo Mikławš Kostorž bě z nimi reje a wotběh kwasa nazwučował. Serbja žnějachu wjele připóznaća za swój poskitk. Pozdźišo su mjez druhim Smjerdźečanscy rejwarjo, folklorna skupina Sprjewjan, Wudworski wjesny ansambl a Slepjanski folklorny ansambl w Strážnicy wuspěšnje wustupowali. Pokazowachu tam tež wustajeńcy wo Serbach. Hižo wjacore lěta jězdźa Serbja, tak z Chrósćic a wokoliny, jako přihladowarjo na mjezynarodny festiwal do Strážnicy. Manfred Laduš
Bjedrich Awgust Wićaz
Freitag, 19. Juni 2015
geschrieben von: Manfred Laduš
Wyši mašinotwarski inženjer a spěchowar serbskeho towarstwoweho žiwjenja Bjedrich Awgust Wićaz narodźi so 21. junija 1865 swójbje kublerja w Brězynce pola Delnjeje Hórki. Po třoch lětach na Budyskim Krajnostawskim wučerskim seminarje studowaše wón w Mittweidźe mašinotwarstwo. Jako inženjer dźěłaše po tym we wšěch srjedźoeuropskich krajach a spózna na swojich pućowanjach wužitnosć serbskeje maćeršćiny. Namaka přistajenje jako technikar w Drježdźanach, hdźež měješe tež předewzaće. Wićaz a Bjarnat Krawc běštaj prěnjej zapisowarjej 1889 załoženeho towarstwa ewangelskich Serbow Čornobóh w sakskej stolicy. Tři lěta bě tež jeho předsyda. 1918 pomjenowachu jeho za čestneho čłona. Wot lěta 1920 bě čłon Maćicy Serbskeje. Wićaz zawostaji wjacore rukopisne zwjazki zapisow Čornoboha. Financowaše serbske koncerty w Drježdźanach a spěchowaše wot lěta 1922 tež spěwne towarstwo Hromadnik. 15. septembra 1927 wón w Drježdźanach zemrě. Nekrolog za njeho spisa Bjarnat Krawc. Wjace hač sto Serbow jeho k rowu přewodźeše. Manfred Laduš
Dr. habil Frido Mětšk
Dienstag, 09. Juni 2015
geschrieben von: Manfred Laduš
Wuspěšny wědomostnik, spisowaćel, basnik, lawreat Myta Ćišinskeho a Zasłužbny wučer ludu, dr. phil. habil. Frido Mětšk, je dźensa před 25 lětami w Budyšinje zemrěł. Narodźił bě so 4. oktobra 1916 w Annabergu. Hižo za čas studija wón serbsce basnješe. Nawróćiwši so ze sowjetskeje wójnskeje jatby 1949 bu powołany za direktora Budyskeje Serbskeje wyšeje šule, kotraž sta so pod jeho pjećlětnym nawodom z wuznamnym narodnym kubłanišćom.
