Praha (dpa/SN). Wysokorjadna čěska zastojnica dyrbi wosom a poł lěta do jastwa, dokelž bě dowolnosće za dwě solarnej připrawje manipulowała. Krajne sudnistwo w Brnje je nawodnicu mócneho energijoweho regulowanskeho zarjada ERU Alenu Vitáskovu wčera korupcije dla zasudźiło, kaž powěsćernja ČTK rozprawja. Wobsedźerjej připrawow kaž tež dalša sobudźěłaćerka Vitáskoveje dyrbja tohorunja wjacore lěta do jastwa. Sudnistwo wukaza nimo toho pjenježne chłostanja we wobjimje wjacorych milionow krónow. Regulowanski zarjad dohladuje energijowy sektor a płaćizny za přetrjebarjow w Čěskej.
Po słowach sudnikow bě zarjad ERU za solarnej projektaj hišće stare, jara wysoke spěchowanske subwencije přizwolił, byrnjež mjeztym nowe, snadniše spěchowanje płaćiło. Knježerstwo bě subwencije za solarnu milinu kónc lěta 2011 wo wjace hač połojcu znižiło. Alena Vitásková prěje, zo bě dowolnosć manipulowała. Nastata škoda wučinja pječa hač do 75 milionow eurow, ČTK informuje.
Wrócław (SN). Wuměłcy z europskeje kulturneje stolicy Wrócławja móža w słowakskich Košicach tworić, mjeztym zo změja jich kolegojo z wuzwolenych europskich městow přiležnosć za to w delnjošleskej stolicy. To předwidźi program agentury Wuměłske rezidency A-i-R Wro, kaž je na stronje www.wrócław.pl zhonić.
Za Košice su so organizatorojo rozsudźili, dokelž bě město lěta 2013 europska kulturna stolica. Tam mnohe tehdy zahajene ideje dale pěstuja. Jedna tajka je program „Košice Artist in Residence“ za wuměłcow ze wšelakich wobłukow a wjacorych, nic na kóždy pad europskich krajow. Wuměłcy, kotřiž dóstanu stipendij 1 400 eurow, móža w měrcu a aprylu w Košicach dźěłać. Jich twórby wustaja potom w jednej galeriji města.
Drježdźany (dpa/SN). Šef sakskeho knježerstwa a tuchwilny prezident Zwjazkoweje rady Stanisław Tilich (CDU) wopyta srjedu Pólsku. We Waršawje chce so wón ze statnym prezidentom Andrzejom Dudu kaž tež z ministerskej prezidentku Beatu Szydło rozmołwjeć, zdźěli dźensa statna kenclija.
Přičina Tilichoweje jězby do susodneho kraja je nastupna wizita jako prezident Zwjazkoweje rady pola maršala pólskeho senata Stanisława Karczewskeho. Dale chce so politikar ze sejmowym maršalom Marekom Kuchcińskim zetkać.
We wačoku Tilicha stej hódnej meblej, kotrejž matej so Muzejej palasta Wilanów wróćić. Wonej běštej naposledk w zestawje Drježdźanskich Statnych wuměłskich zběrkow. Rešerše su wujewili, zo pochadźatej z Waršawy.
Do štwórtkowneho wjerška EU wo migraciskej krizy spjećuja so někotre srjedźoeuropske staty kursej němskeje kanclerki Angele Merkel (CDU).
Bratislava/Brüssel/Berlin (dpa/K/SN). Słowakski ministerski prezident Robert Fico rjekny, Němska je ze swojej politiku witanja ćěkancow zmylk zworała a chce nětko druhich k tomu nuzować, zo jón zaso naprawja. Kraje Visegrádskeje štyrki Čěska, Słowakska, Pólska a Madźarska „nochcedźa być posłušne a so wo ludźi starać, kotrychž je Němska přeprosyła“. Zdobom Fico Němskej a wšelakim dalšim krajam wumjetuje, zo chcyli „diktat“ nałožić napřećo wšěm tym, kotřiž su nastupajo migracisku politiku hinašeho měnjenja. Přećiwo zetkanju Visegrádskskeje skupiny je Němska samo diplomatisce protestowała.
Bratislava (dpa/SN). Tři njedźele do wólbow słowakskeho parlamenta su wuwučowarjo na 14 najwažnišich uniwersitach a wysokich šulach kraja dźensa njewobmjezowany stawk zahajili. Kaž stawkowy komitej w interneće připowědźa, chcychu akademikarjo „stafetu wot wučerjow přewzać“, kotřiž žadaja sej mjez druhim wyše mzdy. 25. januara běchu tysacy wučerjow na stach šulow po cyłym kraju do stawka stupili. Woni pak chcyli dźěłowy bój dźensa nachwilnje přetorhnyć, byrnjež knježerstwo jich žadanja dotal njespjelniło.
Zastupjerjo šulskich a wysokošulskich wučerjow tuž rjeknychu, zo matej wobě skupinje samsne žadanja na knježerstwo a so tohodla mjez sobu podpěrujetej.
12. februar 2016: Datum to za zapis do analow, dokelž dožiwja swět dźensa historiski podawk: Bamž Franciskus a patriarch ruskeje prawosławneje cyrkwje Kyrill so zetkataj. Na Kubje, hdźež stej hłowje wobeju cyrkwjow na wopyće, bamž po puću do Mexika, patriarch ducy do Chile a Brazilskeje.
Eksperća měnja, zo je to zasadna kročel k přewinjenju diferencow, dźělacych wobě wuznamnej swětowej cyrkwi dlěje hač tysac lět. Po ruskich cyrkwinskich žórłach rozprawja čěska telewizija ČT24, zo bu tele historiske zetkanje – wone wotměje so na Havanskim lětanišću – jara dołho přihotowane. Hłowny předmjet ma być přesćěhanje křesćanow na Bliskim wuchodźe, hdźež wobsteja mjez přewažnje islamistiskimi wěriwymi wjetše wosady katolikow a prawosławnych. Wuslědk zetkanja mjez Franciskusom a Kyrillom ma być zhromadna deklaracija.