Waršawa. Dźensniša 25. róčnica němsko-pólskeho zrěčenja wo dobrym susodstwje je wažna tema tež w pólskich medijach. Nowiny rozprawjeja wobšěrnje wo tuchwilnym wopyće statneho prezidenta Andrzeja Dudy w Berlinje a wo jeho rozmołwach z wodźacymi němskimi politikarjemi. Wočakujo němskeho zwjazkoweho prezidenta Joachima Gaucka w Pólskej, je tydźenik Polityka wobšěrny interview z nim wozjewił. Gauck skedźbni w rozmołwje na wjacore wažne stawizniske mězniki po hrózbach Druheje swětoweje wójny, kotrež běchu zakład němsko-pólskeho zrěčenja. Prěnja wažna kročel k tomu bě po słowach Gaucka list pólskich biskopow němskim biskopam w lěće 1965 pod hesłom „Wodamy wam a prosymy wo wodaće“. Runje tak wažna bě historiska gesta bywšeho zwjazkoweho kanclera Willija Brandta w decembru 1970, jako so před pomnikom za wopory Waršawskeho geta poklakny.
Waršawa. Minjenu póndźelu zahajeny wulkomanewer NATO „Anakonda“ na sewjeru Pólskeje je wusahowaca tema w medijach. Jara nadrobnje a z wěstej hosćićelskej hordosću žurnalisća wo aktiwitach wukrajnych, předewšěm ameriskich wojakow rozprawjeja – što wšědnje činja, kak bydla, što jědźa. Při tym maja fotoreporterojo stajnje ameriskeho oficěra poboku, kiž na to dźiwa, zo ničo „wopačneho“ njezapopadnu.
Hižo ličby same zbudźeja wulki zaćišć: Na zwučowanju wobdźěla so 31 000 wojakow ze 24 krajow, mjez nimi 500 dobrowólnych pólskich milicionarow. Jeničce z USA je 14 000 wojakow pódla, z Pólskeje 12 000. Němska je porno tomu „jeničce“ 400 wojakow pósłała. Zasadźenych je 3 000 najwšelakorišich wojerskich jězdźidłow, sto lětadłow a dwanaće wójnskich łódźow.
Praha (dpa/SN). Njeznaći su wopomnišćo za wopory komunizma pod Praskej horu Petřín ćežko wobškodźili. Při tym su jednu ze sydom bronzowych figurow politiskich jatych wottorhnyli, kaž čěska policija informuje. Na podesće wosta jenož noha postawy stejo. Wuměłscy restawratorojo dowjezechu jednotliwe dźěle do dźěłarnje, zo bychu je zaso hromadźe skowali. Policija pyta z pomocu wobrazow widejoweje kamery za wjacorymi skućićelemi. Dokładny rozměr škody njeje dotal hišće znaty.
Twórba rězbarja Olbrama Zoubeka z lěta 2002 dopomina na bronzowej tafli na wjace hač 200 000 politiskich jatych w bywšej socialistiskej Čěskosłowakskej w lětach 1948 do 1989. Hižo wospjet běchu so wandalojo na nju měrili. Při tym mjetachu bencinowe bleše a titki z běłej barbu na pomnik. W nowembru 2003 běchu njeznaći samo jednu z bronzowych postawow rozbuchnyli. Po tym běchu zamołwići města widejokamery připrawić dali. Skućićeljo pak přichadźeja zwjetša zakukleni.