Praha. 1,4 miliony wopytowarjow z wukraja je sej loni do čěskeje stolicy dojěło. To je 5,4 miliony mjenje hač do koronoweje pandemije. Mjez turistami je mjeztym jenož hišće mało ludźi z Azije abo Ruskeje.
Hora Petřín ze swojej powjaznicu, zwěrjenc a Hradčany běchu minjene lěto najbóle wopytane městna w Praze. DinoPark na třěše nakupowanišća Galerie Harfa a „Království železnic“, wustajeńca modelowych ćahow, stej tam lětsa dalšej woblubowanej zajimawostce, informuje statna turistiska agentura CzechTourism. Město ma wot zašłeje póndźele hišće jednu wosebitosć – čěsko-ukrainsku biblioteku, kotruž móža ćěkancy darmotnje wužiwać. Čěskobratrowska ewangelska cyrkej, skawtska organizacija Skautský institut kaž tež nakładnistwo Albatros su tutón nowy projekt zmóžnili. Po informacijach generalneho sekretara Čěskobratrowskeje cyrkwje skići biblioteka swojim čitarjam wjace hač 5 000 knihow w ukrainskej rěči.
Waršawa. Wotstup Jarosława Kaczyńskeho ze zastojnstwa zastupowaceho ministerskeho prezidenta pólske medije tež dny po tym hišće zaběra. Kaczyński bě minjenu wutoru zastojnstwo złožił a chce so přichodnje po swójskich wuprajenjach jenož na skutkowanje jako předsyda knježaceje narodno-konserwatiwneje strony Prawo a sprawnosć (PiS) koncentrować. Wón planuje přichodny čas po cyłej Pólskej jězdźić a wobydlerjow mobilizować, zo bychu so klětu nazymu při wólbach parlamenta za PiS rozsudźili. Kaczyński chcył tak po lěće 2015 třeći króć za sobu wólby dobyć. Přiwšěm je sej toho wědomy, zo njeje tajki wuspěch samozrozumliwy. Wólby 2019 bě strona PiS ze snadnym předskokom před opoziciju dobyła. W sejmje pak mjeztym žanu wjetšinu wjace nima a je nuzowana, sej pomocnikow mjez „njewotwisnymi“ zapósłancami pytać. Přećiwne strony su wosebje w městach jara sylne. Jich nawoda, bywši premier Donald Tusk, ma wuske styki k měšćanostam we Waršawje, Wrócławju a druhdźe, hdźež je opozicija dawno móc přewzała.
Praha. Tež Češa bědźa so z horcym wjedrom. Sobotu pokazowaše termometer w sewjeročěskim měsće Ústíju nad Labem 35,7 stopnjow, njedźelu pak docpěchu junijske temperatury nowy rekord. W Řežu blisko Prahi naměrichu 39 stopnjow. Tale hódnota přetrjechi samo hišće wysoke temperatury ze smažnika 2019, kotrež zwěsćichu tehdom w měsće Doksy. Tež w Praze dyrbjachu ludźo najhorcyši junijski kónc tydźenja scyła přetrać. W Klementinumje, hdźež měrja wot lěta 1775 temperatury, dokumentowachu 36,9 stopnjow.
Horcota knježi tuchwilu tež na politiskim polu. Minjenu srjedu su zastojnicy policajskeje centrale za bój přećiwo organizowanemu złóstnistwu běrow Petra Hlubučeka, zastupowaceho wyšeho měšćanosty Prahi přepytowali. Hišće samsny dźeń woteda wón wšitke swoje funkcije w stronje Stan, z kotrejež bu mjeztym wuzamknjeny.
Waršawa. Zajim Polakow za cyrkej, wosebje pak za duchowne a rjadniske powołanja dale woteběra. Tak to konserwatiwny tydźenik Do Rzeczy a liberalny tydźenik Polityka na podobne wašnje zwěsćatej.
Konserwatiwny tydźenik bě so mjez ludźimi prašał, a zwěsća w swojim najnowšim wudaću „dwaj narodaj – cyrkwinski a swětny“. Mjez druhim su so ludźi prašeli, što dźerža wo swjatych křižach w zjawnych twarjenjach, wo nabožinje w šulach abo wo wobdźělenju duchownych na statnych zarjadowanjach. Při tym so wukopa, zo su Polacy do dweju nimale jenak wulkeju lěhwow pačeni. 54 procentow ludźi chcyło křiže w zjawnosći zachować, 41 proc. wo nje njerodźi. Nabožinu w šulach sej 50 proc. woprašanych waži, 50 proc. nic. Zo su duchowni na zarjadowanjach stata prezentni, ma połojca ludźi za spomóžne, 42 procentow nochce jich tam widźeć. Wosom procentow njewě, što rjec.
Praha. W ćežko nadběhowanej kónčinje Donbas je minjeny tydźeń dobrowólny čěski wojak swoje žiwjenje přisadźił, zdźěli ministerstwo za wonkowne naležnosće pjatk wječor. Muž bě při ruskim nadpadźe zemrěł. Wjace hač sto wojakow ma wosebitu dowolnosć prezidenta Miloša Zemana ukrainskich wojowarjow podpěrać. Kelko Čechow pak tam woprawdźe wojuje a hač su někotři z nich w ruskej wojerskej jatbje, wodźacym politikarjam znate njeje.
Waršawa. Nawoda pólskeje knježaceje strony PiS Jarosław Kaczyński chcył krok po kroku swoje zastojnstwo jako wicepremier złožić a so přichodnje na nutřkopolitiske temy koncentrować. To je wón minjenu sobotu na konwenće strony njedaloko Waršawy připowědźił. Ze zjězdom zahaji PiS zdobom wólbny bój za klětuše wólby sejma, kotrež chcyła wona trěći króć za sobu dobyć.
W swojej narěči pod hesłom „Dobre knježerstwo w ćežkich časach“ Kaczyński spočatnje po zwučenym wašnju opoziciju pod nawodom Donalda Tuska raznje nadběhowaše. Tusk je po jeho měnjenju na wšitkich njedostatkach w kraju a samo na wójnje w Ukrainje wina, dokelž je ze swojej politiku ruskemu prezidentej Wladimirej Putinej napřećo „agresiju Ruskeje hakle zmóžnił“.
Praha. Pražan Milan Patka chodźi z kedźbliwymaj wočomaj po swojim ródnym měsće. A tak je jemu njedawno napadnyło, zo z astronomiskim časnikom, z Praskim orlojom na Staroměšćanskej radnicy, něšto w porjadku njeje. Orloj wobsteji z třoch dźělow: z japoštołow cyle horjeka, z astrolabija, kiž pokazuje čas, a z kalendarija, koporowa tačel, na kotrejž je dwanaće měsacow zwobraznjenych. Wobrazy pak njewotpowěduja originalej. Patka, dołhodobny čłon towarstwa „Klub za staru Prahu“, wuznawa so wulkotnje ze stawiznami a detailemi turistiskeje atrakcije. „Na zbožo mějach doma hišće nasćěnowy kalender z lěta 2002 z fotami wšěch ilustracijow. A tež w interneće móžeš sej dokładnu dokumentaciju z archiwa Praskeho magistrata wobhladować“, powěda Patka nowinarjam w Praze. „Zwěsćich, zo bě moler wobliča někotrych na tačeli zwobraznjenych ludźi změnił, burowka nosy naraz minisuknju a na wobrazu za winowc pada lisćo. Łopjena pak słušeja do nazymnika, kiž rěka čěsce listopad.“