Spěchowanje kraja zmóžnja modernizowanje Worklečanskeje šule

Worklecy (SN/MiP). We Worklecach steji jedna ze štyrjoch serbskich wyšich šulow w Sakskej, kotrejež eksistencu su Serbja po přewróće před zawrjenjom wuchować móhli. Dohromady 173 šulerjow tuchwilu na njej wuknje – wjetšina z nich rěči serbsce. Wčera běše so na šuli wažny hósć připowědźił: sakski kultusowy minister Christian Piwarz (CDU). Přičina wopyta njeběchu prěnjotnje so bližace wólby do krajneho sejma Sakskeje, kotrež nas lětsa wočakuja. Minister běše 1,9 milionow eurow financielneje podpěry ze stron kraja za Worklečan šulu sobu přinjesł. Symboliski šek je wčera připołdnju šulskej wjednicy Dianje Šołćinej kaž tež wjesnjanosće Worklečanskeje gmejny Clemensej Poldrackej (njestronjan) přepodał.