Bosćij Pjaca: Fabmobil na lěćnym campje ze znatym ilustratorom

Zhorjelc/Drježdźany (SN/MiR). Fabmobil njeje hižo jenož čorny bus z techniskim wuhotowanjom, za kotrymž so designerojo žedźa. Ideja serbskeho předewzaćela, Konječana Bosćija Pjacy, z laborom na kolesach wědu w teoriji a praksy šěrić, so dźeń a bóle radźi. Přikład za to je lěćny camp w Zhorjelskim sociokulturnym zetkanišću „Kühlhaus“. Po lońšej premjerje zetkanja sakskich lokalnych laborow ma so camp lětsa wo dalše poskitki rozšěrić. „K tomu słuša w prěnim rjedźe wukubłanje wučerjow“, praji Bosćij Pjaca, „20. junija zahajimy kursy za wučerjow, kotřiž dalše dny na dźěłarničkach z dźěćimi a młodostnymi zhromadnje wuknu.“ Team Fabmobila nadźija so, zo inspirěruje z tym wučerjow na šulach, swójske lokalne labory wutworić resp. techniku nakupić, kotraž je za kubłanje šulerjow na polu medijoweje kompetency trěbna. „Kaž smy nazhonili, wučerjam poskitk wuwučowanskich srědkow njedosaha – woni trjebaja praktiske nazhonjenja. A na to so lětsa měrimy.