Krótkopowěsće (08.12.22)
Pjeriznowa mrětwa we Łužicy
Budyšin. Budyski žiwidłowy a weterinarny zarjad (LÜVA) je nowy wukaz za plahowarjow pjerizny we wokrjesu wudał. Z tym reaguje zarjad na pady pjeriznoweje mrětwy we Łomsku pola Radworja. Dalše informacije su na pod hesłom „Geflügelpest“ podate.
Poezija a hudźba w muzeju
Budyšin. Budyski Serbski muzej přewjedźe zhromadnje z časopisom Rozhladom w ramiku wustajeńcy „Wšo je krajina. Serbski moler Jan Buk“ hudźbno-literarny wječor. Na nim čitaja jutře wječor we 18 hodźin mjez druhim Róža Domašcyna a Měrana Cušcyna. Wo hudźbne wobrubjenje postara so Jazztrio z Jacek Szreniawa.
Nowy zakoń w romašćinje
Praha. Pod „Romaňi Biblija – O Névo Zákonos“ je w Čěskej po dwanaćelětnym přihotowanju přełožk bibliskeho Noweho zakonja do sewjerocentralneje romašćiny z pjera Kolomana Staněka wušoł. Rěčna warianta so w Čěskej republice a Słowakskej wužiwa. Fachowcy su měnjenja, zo móže přełožk nimo duchowneho posylnjenja tež k zachowanju a rewitalizaciji romašćiny přinošować.
Baworčanki triumfowali
Krótkopowěsće (07.12.22)
Štwórćinu mjenje porodow
Budyšin. Ličba wobydlerjow w měsće Budyšinje je z 38 784 na kóncu třećeho kwartala porno druhemu konstantna wostała, kaž měšćanske zarjadnistwo dźensa zdźěli. Hinak nastupajo porody wupada. Jich ličba je wo štwórćinu niša hač loni w samsnej dobje. Jasny přirost zwěsći zarjadnistwo při přićahach. Wosebje wjace wukrajnikow je do města přišło.
Wo wašnju wobchadźenja
Lubnjow. Delnjołužiski studijny institut za komunalne zarjadnistwo je pod hesłom „Z komunikaciju deeskalować“ předwčerawšim w Lubnjowje (Lübbenau) fachowe schadźowanje za sobudźěłacych w komunalnych zarjadach wotměł. Nimale 40 wobdźělenych je tež rozjimało, kak měli z dźeń a wótřišim wobchadnym tonom mjez wobydlerjemi a zarjadnistwom wobchadźeć.
Inwestuja do noweje přepinarnje
Krótkopowěsće (06.12.22)
Zelena ruka za solidaritu
Budyšin. Dźěłarnistwo twarstwo-agrar-wobswět (IG BAU) zaso z akciju „złota ruka“ solidarisku mjezsobnosć ludźi wšelakeho pochada w zawodach podpěruje: www.gelbehand.de . Wučomnicy a powołanscy šulerjo tež z wokrjesa Budyšin na namołwjeni, hač do 16. januara swoje projekty zapodać, kaž IG BAU dźensa w zdźělence informuje.
Pjeriznowa mrětwa we Łomsku
Radwor/Łomsk. Wudyrjenje pjeriznoweje mrětwy su we Łomsku hamtsce zwěsćili, tak krajnoradny zarjad Budyšin. Do toho je Friedricha Löfflerowy institut, zwjazkowe slědźenišćo za strowotu zwěrjatow, rozbudźak wobkrućił. Kontakty a wokoliny přepytawši ma zarjad strach rozšěrjenja rozbudźakow za snadny. Tohodla so zarjadowanja pasma z restrikcijemi wzdadźa.
Njepřihódny slogan zběhnyli
Krótkopowěsće (05.12.22)
Minister w Kulowskej kónčinje
Kulow. Sakski minister nutřkowneho Armin Schuster (CDU) je so dźensa na wopyće we Łužicy tež pola policije wo stawje přepytowanja wonječesćenja Božich martrow w Kulowskej kónčinje wobhonił. Po informacijach Katolskeho Posoła su forensikarjo policije wuslědźili, zo je njeskutk „nadpad na nabožinu“. Zapósłanc Alojs Mikławšk (CDU) běše sej spěšne a dorazne jednanje stata žadał.
Serbja přednošowali
Mnichow. Třo Serbja su we wobłuku Sudetoněmskich dialogow minjeny pjatk a sobotu w Mnichowje přednošowali. Christina Boguszowa wěnowaše so přichodej Serbskeho muzeja a kak chce młódše generacije zaso do muzeja wabić. Dr. Cordula Rajaczakowa je serbske medije předstajiła a Pětr Brězan informowaše wo Serbach. Mjez wobdźělnikami běchu Ladinojo, Němcy z Čěskeje, Sudetscy Němcy a Serbja.
Přiražku nětko wupłaća
Krótkopowěsće (02.12.22)
Wo noweli Serbskeho zakonja
Budyšin. Prawniski wuběrk Zwjazkoweho předsydstwa Domowiny a Rada za serbske naležnosće Sakskeje stej wčera w Budyšinje druhi raz wo dalšim postupowanju nastupajo nowelěrowanje Sakskeho serbskeho zakonja wuradźowałoj. Rozjimajo wobłuki a temy za polěpšenja rěčachu wo serbšćinje, kotraž ma so na zjawnych popisanjach wšudźe a jenak wulke kaž němčina jewić.
Rěčna kofejownja w Drjedźanach
Drježdźany. Wuknjenski centrum za rěče a kultury Drježdźanskeje Techniskeje uniwersity je wčera wječor „rěčnu kofejownju za słowjanske rěče“ wuhotował. Studentka Lydija Suchec nawjedowaše serbskorěčnu rozmołwu ze serbsce wuknjacymi, wužiwajo wšelake wuknjenske nastorki a materialije. Jeli so poskitk derje přiwozmje, je planowane jón prawidłownje přewjedować.
Wotnětka tež jako e-book
Krótkopowěsće (01.12.22)
Literarne myta spožćili
Drježdźany. Basnik Andreas Reimann je z lawreatom lětušeho Myta Lessinga Swobodneho stata Sakskeje. Wuznamjenjenje spožča jemu za „njezapřimliwje wobšěrne, mnohostronske, zwadliwe a stajnje znowa překwapjace poetiske dźěło“. Spěchowanskej myće přiznachu spěwytwórče Sarah Lesch a spisowaćelce Heike Geißler. 21. januara maja so wuznamjenjenja w Kamjencu přepodać.
Wysoke wuznamjenjenje
Budyšin. Něhdyši Budyski wyši měšćanosta Christian Schramm budźe ze Zwjazkowym zasłužbowym rjadom počesćeny. Wón słuša k „směrodajnym pućrubarjam demokratiskeho přewróta w Hornjej Łužicy a skutkowaše jako mostytwarc mjez cyrkwinskej diakoniju a komunalnej socialnej politiku“. Wuznamjenjenski ceremoniel ze Zwjazkowym prezidentom Frankom-Walterom Steinmeierom wotměje so 8. decembra.
„Alkoholowy turizm“ we wizěrje
Krótkopowěsće (30.11.22)
Žadaja sej wjace serbšćiny online
Podstupim. Rada za naležnosće Serbow Braniborskeje je sej na posedźenju wutoru žadała, zo by kubłanske ministerstwo z pomocu digitalizacije małe online-skupiny serbsce wuknjacych šulerjow po cyłym serbskim sydlenskim rumje zmóžniło. Nimo toho je so pjeć kandidatow za załožbowu radu předstajiło, srjedź januara chce rada dweju rjadneju čłonow a dweju zastupjerjow wolić.
Sćěhi njewěstosćow widźomne
Budyšin. We wuchodnej Sakskej bě w nowembrje 17 571 bjezdźěłnych, 371 wjace hač w oktobrje. Kaž Budyska wotnožka zwjazkoweje agentury za dźěło dźensa informuje, tudyše dźěłowe wiki dale stabilne wostanu. Sćěhi hospodarskich njewěstosćow pak su widźomne. Wjace předewzaćow so zaso na krótkodźěło přihotuje a dźěłodawarjo so čujomnje wróćo dźerža personal přistajić.
Miliony nowych štomow
Krótkopowěsće (29.11.22)
Přihotowanski wuběrk
Budyšin. Do přihotowanskeho wuběrka za mjezynarodny folklorny festiwal Łužica 2023 je Zwjazkowe předsydstwo Domowiny minjeny pjatk Gabriela Krawca (Serbska rejowanska skupina Smjerdźaca), Ambroža Handrika (Serbski folklorny ansambl Wudwor), Janu Pětrowu (Załožba za serbski lud), Marka Klimana (gmejna Chrósćicy), Marka Kowarja (Domowina) a Marcusa Końcarja (Delnja Łužica) powołało.
Bobry přelesćili
Volary. Južnočěscy dróharjo bědźa so pola městačka Volary hižo dlěši čas z aktiwitami bobrow. Wot nich natwarjene zahaćenje rěčki je dźě sylnje wužiwanu dróhu I/39 z powodźenjom wohrožowało. Wotstronjeny „njedowoleny twar“ su bobry hnydom zaso wobnowili. Hakle njedawno do haćenja zatwarjene plastowe kanalizaciske roły su pomhali, a bobry su přećahnyli.
Přiručka znowa předleži
Krótkopowěsće (28.11.22)
Awtorske zetkanje w Friziskej
Ljouwert. Lubina Hajduk-Veljkovićowa je serbska wobdźělnica na hišće hač do wutory trajacym zetkanju awtorow dźiwadłowych hrow w mjeńšinowych rěčach we wobłuku mjezynarodneho projekta „Phōnē – mjeńšinowym rěčam hłós dać“ w Ljouwerće (Leeuwarden). Ze zeńdźenjom „ma so proces pisanja hrow oficialnje zahajić“, kotrež chce cyłkownje wosom jewišćow w hrajnej dobje 2023/2024 prezentować.
Kulturnu fabriku wuznamjenili
Wojerecy. Lětuša lawreatka Myta Reginy Hildebrand je Wojerowska Kulturna fabrika. Wona „wuznamjeni so za spěchowanje idejow a projektow w zwisku z towaršnostnej zamołwitosću a za konstruktiwne rozestajenje z wobstajnje měnjacymi so wužadanjemi we Wojerecach“, we wopodstatnjenju rěka.
Z dźewjeć kandidatami
Krótkopowěsće (25.11.22)
Žurnalistiske myto wuwołane
Drježdźany. Wubědźowanje wo Němsko-Pólske žurnalistiske myto Tadeusza Mazowieckeho 2023 je wuwołane. Medijotwórcy z wobeju krajow móža so hač do 31. januara 2023 ze swojimi přinoškami požadać, kaž statna kenclija w Drježdźanach zdźěli. Mytowanski pjenjez budźe znowa 5 000 eurow po kategoriji. Počesćenje budźe 15. junija 2023 we wobłuku Němsko-Pólskich medijowych dnjow w Lubušskim wojewódstwje.
Sportowcow wuznamjenili
Drježdźany. Šěsć sakskich sportowych towarstwow je wčera w Drježdźanach „sportowu plaketu zwjazkoweho prezidenta“ přijimało. Mjez mytowanymi je ST 1922 Radwor z.t. Sportowy minister Armin Schuster (CDU) mytowaše z tym dołhodobnu prócu towarstwow, kotrež so hižo dlěje hač sto lět čestnohamtsce angažuja. Towarstwa dóstanu nimo plakety 1000 eurow.
Češa w Karibice
