Krótkopowěsće (01.11.22)
Połdra tysac přihladowarjow
Chróšćicy. Na cyłkownje pjeć wupředatych předstajenjach přewažnje wot dźěći a młodostnych zwoprawdźeneje spěwohry „Z Tobu – Bohu swjećene lěto“ w Chróšćanskej wjacezaměrowej hali „Jednota“ zličichu dohromady něhdźe 1 500 wopytowarjow. Hłowna organizatorka Sabina Lanzyna a komponist Měrćin Weclich běštaj po poslednim předstajenju wčera z wothłosom „přewšo spokojom“.
Druhi najćopliši oktober
Offenbach/Drježdźany. Lětuši oktober je w Sakskej po nachwilnym wuhódnoćenju Němskeje wjedroweje słužby (DWD) druhi najćopliši po zahajenju wjedrowych zapisowanjow. Přerězna temperatura bě 12,2 stopjenjej celsiusa. Ćoplišo běše jenož w lěće 2001, hdyž zwěsćichu přerěznu temperaturu 12,4 stopjenjow celsiusa, kaž DWD wčera informowaše.
Swětowy kongres cymbalistow
Krótkopowěsće (28.10.22)
Ministerka hospituje w jastwje
Drježdźany/Zhorjelc. Sakska justicna ministerka Katja Meier (Zwjazk 90 / Zeleni) je w Zhorjelskim jastwje přistajenych cyły dźěłowy dźeń přewodźała. Wona přizna dźěło w jastwje jako cyłotowaršnostnje wuznamny nadawk. W Sakskej je aktualnje 2957 zajatych – 171 z nich w Zhorjelskim jastwje.
Kupjel kónc tydźenja zawrjena
Kamjenc. Płuwarnja w Kamjencu budźe wot 1. nowembra nachwilnje zawrjena. Budyski wokrjes bě to jako nošer kupjele wobzamknył. Přičina zawrjena je wotpohlad lutować energiju. Kupjel je tuž aktualnje wot póndźele do pjatka 6.30 do 22.00 hodź wotewrjena. Wužiwanje sawny je w tutym času wot 14 do 22 hodź. móžne.
Žadneho konja wuchowali
Praha/Ulaanbaatar. Mongolski prezident Uchnaagiin Chürelsüch spožči direktorej Praskeho coowa Miroslavej Bobekej „Rjad polarneje hwězdy“ za njewšědne zasłužby zwěrjenca nastupajo wjelelětne prócowanja wo zachowanje dźiwjeho Przewalski-konja. Praski zwěrjenc zwoprawdźi hižo dźewjeć lětadłowych transportow z dźesatkami w Čěskej wuplahowanych koni do zapadneje Mongolskeje.
Krótkopowěsće (27.10.22)
Dyrbja terarij zawrěć
Drježdźany. Terarij w Drježdźanskim zwěrjencu ma so wysokich energijowych kóštow dla hižo zašo dospołnje zawrěć hač poprawom planowane, a to hižo 1. nowembra. Někotre z tam zaměstnjenych zwěrjatow wostanu w zwěrjencu, dalše budu nowym wobsedźerjam wotedać.
Wjac dźělneho studija
Gütersloh. Studowacy w Sakskej móža přiběrajcy tež dźělnje studować. Tole wuchadźa ze studije centruma za wysokošulske wuwiće. Přirunujo z tamnymi šěsnaće zwjazkowymi krajemi leži Sakska z tym na pjatym městnje. Najwjetši poskitk maja studowacy w předmjetach wuměłstwo, hudźba, design kaž tež rěčne a kulturne wědomosće. Tu ležeše dźělnočasowa kwota lětsa hač dotal zwjetša nad 56 procentami.
Ptačka lěta wolili
Berlin/Hilpoltstein. Přirodoškitny zwjazk Němskeje a Bayerski krajny zwjazk za škit ptačkow a přirody stej dźensa „Ptačka lěta 2023“ wozjewiłoj. Pjeć kandidatow nastupi wubědźowanje wo titul: bruna ročka (Braunkehlchen), pólny wrobl (Feldsperling), srokopjel (Neuntöter), wódna kokoška (Teichhuhn) a žarowanski šnapak (Trauerschnäpper).
Krótkopowěsće (26.10.22)
Spěchowanje wobkrućili
Budyšin. Konwent kulturneho ruma Hornja Łužica-Delnja Šleska je na swojim wčerawšim posedźenju w Budyskim Dźiwadle na hrodźe předsydstwo wobkrućił. Předsyda gremija je wotnětka nowy Zhorjelski krajny rada Stephan Meyer a Budyski nowy krajny rada Udo Wićaz jeho naměstnik (wobaj CDU). Zdobom je konwent lisćinu institucijow wopodstatnił, kotrež nadal spěchuja. Mjez nimi su na přikład Serbski ludowy ansambl, Němsko-Serbske ludowe dźiwadło a Budyski Serbski muzej.
Knižne myto rozšěrili
Lipsk. Knižne myto Lipšćanskich knižnych wikow budźe so wot klětušeho tež w spartach comic, manga a graphic novel spožčeć. „Čitanski kompas“ mjenowane wuznamjenjenje ma předewšěm „młódšich zajimcow za čitanje zahorić a jim orientaciju w dźunglu nowowudaćow wolóžić“, kaž w nowinarskej zdźělence wikow rěka.
We wagonje přenocować
Krótkopowěsće (25.10.22)
Rědki fenomen wobkedźbowali
Budyšin. Parcielne zaćmiće słónca, kotrež je měsačk dźensa připołdnju wuskutkował, bě wjacorym zajimcam składnosć, fenomen w Budyskej hwězdarni sćěhować. Teleskopy domu běchu wotpowědnje spřihotowane. Přichodne dźělne zaćmiće, kotrež hodźi so w srjedźnej Europje wobkedźbować, wotměje so kónc měrca 2025.
Kochowa nowela w jendźelšćinje
Fargo. Nowela Jurja Kocha „Wišnina“ hodźi so wotnětka tež w jendźelšćinje čitać. Přełožk z titulom „The Cherry Tree“ je profesor Statneje uniwersity North Dakota John K. Cox zdokonjał. Publikacija, wudawana w mjenowanym kubłanišću přisłušacym nakładnistwje The Digital Press, móža zajimcy pak jako pdf-ku downloadować pak we ćišćanej wersiji sej skazać.
Młodźinske słowo lěta
Krótkopowěsće (24.10.22)
Dobyćerske paski online
Lipsk. Filmowy festiwal DOK Leipzig, kotryž bu lětsa 65. raz wuhotowany, je zakónčeny. „Złoteho hołbja“ za najlěpši dokumentarny pask spožčichu kolumbisko-rumunsko-francosko-němskej produkciji „Anhell69“ Thea Montoye. Pask je wot dźensnišeho runja dźesać dalšim wuznamjenjenym filmam we wobłuku rjadu „DOK Stream“ online přistupny.
Nowe widejo wozjewjene
Budyšin. Skupina Astronawt je wčera wječor nowe hudźbne widejo na YouTube a na Instagramje wozjewiła. Spěw z titlom „Ha widźu-li“ bu zhromadnje z Milenu Wowčerjec jako spěwarku a z orchestrom Serbskeho ludoweho ansambla produkowany. Je to druhe w kooperaciji ze SLA nastate widejo. Tekst swójskeje kompozicije Astronawtow je z pjera Handrija Zejlerja.
Kruwu z pastwy pokradnyli
Krótkopowěsće (21.10.22)
Wopyt nětko online móžny
Njechorń/Budyšin. Dom Měrćina Nowaka Njechorńskeho móža zajimcy wotnětka tež digitalnje dožiwjeć. Wo tym regionalna rěčnica Domowiny, Katja Liznarjec, informuje. Lětsa w nalěću su z Róžu-Marju Kurfürstec-Pinkawinej wodźenje po domje znateho wuměłca na nastork župy „Jan Arnošt Smoler“ Budyšin natočili. Z projekta „360° Dom Měrćina Nowaka“ nastate digitalne serbske wodźenje je přistupne pod .
Wubědźowanje „Serbja přadu!“
Lubin. Wokrjes Dubja-Błóta je wčera wubědźowanje za šulske rjadownje „Serbja přadu!“ 2022/2023 wuwołał. Nawjazujo na přazu su wuknjacy namołwjeni, sej stawiznički, poetry slams, dźiwadłowe kruchi, musicale, skeče, podcasty, wideja, hry abo spěwy wumyslić a twórby zapodać. Za wurisanje přizjewić měli so hač do 31. decembra. Doba za zapodaće projektow skónči so klětu 12. meje.
„Prezent“ za Putina
Krótkopowěsće (20.10.22)
Wo Serbach so informowali
Budyšin. Wobdźělnicy seminara na temu „Němsko-pólsko-čěska pomjezna kónčina. Mjeńšiny w dialogu w so měnjacej Europje“ Němsko-Europskeho kubłanskeho skutka z Hessenskeje rozmołwjachu so wčera ze społnomócnjenej za serbske naležnosće Budyskeho wokrjesa Halenu Jancynej. Seminar wotměwaja w Zhorjelcu, wčera informowachu so wo Serbach. Dale je skupina Serbski muzej wopytała a bě z hosćom Domowiny.
Klimowy projekt we Wochozach
Wochozy. We wobłuku noweho klimoweho projekta chcedźa we Wochožanskim parku błudźenkow mjez druhim wjace rostlin zwosadźeć, kotrež horcotu lěpje znjesu, přetrjebu wody pomjeńšić a samo solarnu připrawu instalować. To zmóžnja spěchowanje zwjazkoweho ministerstwa za bydlenje, měšćanske wuwiće a twarstwo we wysokosći 730 000 eurow za dobu třoch lět.
„Gigafactory“ VW w Čěskej?
Krótkopowěsće (19.10.22)
Wupowěšeja „běłu chorhoj“
Choćebuz. „Njemóžemy hižo žanych dalšich ćěkancow přijimać. Kapacity su wučerpane“, w nowinarskej zdźělence Choćebuskeho měšćanskeho zarjadnistwa rěka. Wyši měšćanosta Holger Kelch (CDU) sej žada, ćěkancow „runoměrnje po Braniborskej, Němskej a Europje rozdźělić“, za čož měłoj so mjez druhim „wjerškowe zetkanje z knježerstwom a komunami Braniborskeje“ a na to nawjazujo „konferenca ze zwjazkowym kanclerom“ wuhotować.
Z kulturnym busom po Łužicy
Baršć. Iniciatiwa Kreatiwna Łužica ze sydłom w delnjołužiskim Baršću (Forst) wuhotuje w nowembru busowu turu po Hornjej Łužicy, w kotrejež wobłuku móža so wobdźělnicy z lokalnymi akterami a jich projektami na přikład w Lubiju, Załomju, Ochranowje, Neugersdorfje a Žitawje zeznajomić.
Chinscy „pólcajojo“ w Čěskej
Krótkopowěsće (18.10.22)
Dalši blok znowa syći připinali
Janšojce. Brunicowa milinarnja w Janšojcach produkuje wotnětka tež zaso z blokom F. 500megawattowa připrawa bu w lěće 2018 we wobłuku „wěstotneje hotowosće“ zastaranskej rezerwy přidźělena a měješe so lětsa w oktobru wot syće wotpinać. Zhromadnje z tohorunja reaktiwizowanym blokom E zastara milinarnja wiki tak z přidatnej energiju we wobjimje 1 000 megawattow.
Wyši měšćanosta na demonstraciji
Budyšin. Na demonstraciji přećiwo stupacym kóštam za energiju wčera w Budyšinje – dohromady zličichu něhdźe 2 500 wobdźělnikow – je wyši měšćanosta sprjewineho města Karsten Vogt (CDU) swojemu připowědźenju wotpowědujo protestowacym rozłožił, zo je so „Budyšin na energijowu krizu přihotował“. Zwjazk łužiskich předewzaćelow bě Vogta na demonstraciju přeprosył.
Knižne myto spožčili
