Budyšin (SN/MWj). Njewšědny wopyt mějachu spočatk tydźenja w Budyskej radnicy. Oliver Trelenberg bě tam ze swojim kolesom přijěł a swoju beneficnu kolesowansku jězbu pod hesłom „Na raka schorjeny kolesuje za dobry zaměr“ předstajił. Srjedź junija bě doma w Hagenje wotjěł, rěka w nowinskej informaciji Budyskeho měšćanskeho zarjadnistwa. Dohromady 5 500 kilometrow chce wón po Němskej jěć. Na jeho puću ležachu hižo Stuttgart, Passau, Würzburg a Erfurt. Wot Budyšina wjedźe jeho puć do Berlina a dale na kupu Usedom, do Flensburga a Osnabrücka. Po cyłkownje 95 dnjach chce kolesowar zaso doma w Sewjerorynsko-Westfalskej być.
Smječkecy (AJH/SN). Park Smječkečanskeho Domu swj. Jana tworješe njedawno krasnu zelenu přirodnu kulisu zabawneho zetkanja wobydlerjow domu a jeho sobudźěłaćerjow. W běhu dnja přeměni so park na mału oazu, wupyšenu z kwětkami, latarnčkami, pisanymi chorhojčkami a lampkami za lětni swjedźeń.
Pod lipami dožiwichu přitomni dwuhodźinski koncert skupiny Holaski. Po dołhej přestawce pandemije dla móžachu Donatec bratřa a jich bubnar Kito Mark nětko zaso z połnym zapalom najwšelakoriše hity a oldije zahrać. Paleta sahaše wot serbskich ludowych pěsnjow přez němske štučki hač k swójskim kompozicijam kapały.
Dale mytowaše Weronika Bartowa jako zamołwita za sport ze zbrašenymi ST Marijineje hwězdy kóždeho wobdźělnika digitalneho jubilejneho běha Pančičanskeho sportoweho towarstwa, kotrež wobsteji mjeztym sto lět, z wopismom, medalju abo pokalom. Jubilejny běh wotmě so pandemije dla jako alternatiwa k integraciskemu sportowemu swjedźenjej.
82lětna Elisabeth Grofina a jeje 85lětny mandźelski Jurij bydlitaj w Bjezdowskim (Klein Partwitz) wjesnym domje seniorow. „Smój rady aktiwnaj. Móžemoj sobu činić. Wostudłe namaj ženje njeje. Mamoj tu tež tójšto duchownych powabkow“, měnitaj mandźelskaj nastupajo gymnastiku, spěwanje, hódanske hry, čitanje nowiny a dalše wobsahi. Wot spočatka lěta bydlitaj wonaj w domje seniorow na bywšim třistronskim ratarskim statoku Patokec Marje. Jako katolikaj chodźitaj tam wot póndźele do pjatka prawidłownje k nyšporu. Njedźelnu Božu mšu sćěhujetaj w radiju abo telewiziji. „Móžemoj swoju wěru dale pěstować. Kóždemu wobydlerjej wopokazuja tu respekt, česćownosć a přistojnosć. Dohladowanje je jara fachowske“, staj wobaj dźakownaj.
Stwy hinak zarjadowane
Pančicy-Kukow (BeW/SN). Lěkarjow je přemało. W městach drje tute wuprajenje po cyłej Němskej widźane zdźěla njepřitrjechi. Ale na wuchodźe Němskeje je tomu tak, a ludźo na wsach, kiž prócuja so wo termin pola specialista, potrjebu ćim nuznišo pytnu. W Pančičansko-Kukowskej praksy za nutřkownu a nuklearnu medicinu dr. Erharda Henki wuhladaja pacienća wot spočatka tohole lěta nowe mjezwočo, kotrež pak tójšto ludźom docyła tak njeznate njeje.
Kamjensku chorownju maltezow dyrbja přetwarić. Hižo lětsa nazymu chcedźa za to trěbne dźěła zahajić. Wčera přepoda sakska statna ministerka za strowotnistwo Petra Köpping (SPD) zdźělenku wo spěchowanskich srědkach.
Kamjenc (BG/SN). Do chorownje maltezow swj. Jana w Kamjencu chcedźa 5,3 miliony eurow inwestować. Tam knježeše wčera wulke wjeselo, jako Petra Köpping šek ze spěchowanskej sumu 3,8 milionow eurow přepoda. Maltezojo sami přinošuja 1,5 mio. eurow. Z něhdyšeho wotrjada za radiologiju ma moderna přijimarnja jako centrala nuzoweho zastaranja nastać. Chorownja a kasowolěkarski zwjazk (KV) budźetej centralnu městnosć w přichodźe zhromadnje wobhospodarjeć. Předležacy podrys je zakład za přetwar chorownje. „K twarskim strukturam słušeja přichodnje centralne prěnje posudźowanje, šokowa rumnosć, dwanaće lěkowanskich městnow, wjacore lěkowanske rumnosće za KV kaž tež čakarnje.
Worklecy (aha/SN). „Worklecy su wo dalšu zajimawostku bohatše“, wuzběhny minjeny pjatk wjesnjanosta Franc Brusk (CDU) składnostnje dnja wotewrjenych duri dnjoweje hladarnje Carity „Při Krabatowym puću“. Wón nańdźe připóznaće, zo bu zawrjena předawarnja w běhu jednoho lěta dnjowa hladarnja za staršich ludźi, kotrejež flair a wuhotowanje pyta swojeho runjeća. Z rjanym, lóštnym programom dźakowachu so Jěwje-Mariji Šnajderowej a jeje mandźelskemu Carstenej za jeju angažowane dźěło wšě dźěći Worklečanskeje pěstowarnje.
W nadawku Hornjołužiskeho zwjazka Carity z.t., kotryž je nošer dnjoweje hladarnje z 18 městnami, dźakowaše so nawodnica hladanskeje słužby Susan Kummer, kotraž je twar přewodźała a runočasnje při přewinjenju běrokratiskich zadźěwkow stajnje k pomocy była. W běhu dnja wuži něhdźe połsta ludźi, wobkedźbujo a dodźeržo předpisy hygieny, wšě rumnosće z cyłkownej płoninu, kotraž wučinja 300 kwadratnych metrow.
Akcija „Dźeń a nóc tolerancy“ je so lětsa najebać koronapandemiju wotměła. Město Wojerecy sadźa z njej jasne znamjo mnohotnosće a mjezsobnosće. W zhromadnym dźěle z iniciatiwu Ciwilna kuraža a Dźěłanišćom za koordinaciju kubłanja su projekt jako wjacore online-zarjadowanja přewjedli.
Wojerecy (SiR/SN). „Naš zaměr z tajkimi akcijemi je, zo jedyn na tamneho bóle dźiwa, zo so rozumimy, tež hdyž smy rozdźělneho měnjenja“, rozjasnja Franziska Grabowski. Nawodnica kluboweho domu za młodźinu Ossi je nětko dobyćerjow na wuznamjenjenje přeprosyła, kotřiž běchu wuměłske twórby zapodali. Namołwjeni, na wubědźowanju w molowanju a fotografowanju so wobdźělić, běchu dźěći a młodostni. Hesło rěkaše: „Toleranca rěka za mnje ...“.