Wojerecy (SN/mb). Mjezystaw planowaneho projekta „Via Sorabica Hoywoj“, šćežka z pokiwami na serbske stawizny města, je z wida předsydstwa župy „Handrij Zejler“ njespokojacy. To zwěsćichu čłonojo gremija na swojim wčerawšim posedźenju w bróžni pola domu Domowiny we Wojerecach po rozprawje županki Gabriele Linakoweje wo njedawnym wuradźowanju ze zastupjerjemi měšćanskeho zarjada. Najebać to, zo je Werner Sroka hižo lěta dołho zdźěla dotal njeznate fakty za informaciske tafle wuslědźił, klaca z přilubjenej podpěru ze stron města. Wyši měšćanosta Torsten Ruban-Zeh (SPD) bě drje w narěči na swojim lońšim přijeću připowědźił, zo chcedźa projekt hromadźe z Domowinu zwoprawdźić. Ale nětko su zastupjerjo města njejapcy zdźělili, zo njemóže so město na financowanju wobdźělić. Problematiku budźe Domowina tež na posedźenju serbskeje přirady města přichodnu srjedu tematizować.
Budyšin (SN). Na wčerawšim posedźenju wothłosowachu čłonojo prezidija 2. naćisk programa Domowiny. Wuběrk za nutřkownu demokratiju a serbsku ciwilnu towaršnosć je so poslednje tydźenje z namjetami zjawnosće za program zaběrał a dotalny naćisk kwalifikował. Tutón so na přichodnym wuradźowanju Zwjazkowemu předsydstwu 7. junija předstaji.
Spočatk februara je Domowina zjawnosć namołwjała prašenja zapodać, kotrež móhli jako wólbne kopolaki politiskim stronam sposrědkować. Tute nětko předleža za wotpósłanje. Zastupjerjo stronow maja něhdźe šěsć tydźenjow chwile na nje wotmołwić. Formulowane prašenja su wotnětka na webstronje Domowiny wozjewjene.
Prezidij je tež tři próstwam wo delegowanje přihłosował. Tak pojědźe serbska drastowa a rejowanska skupina Barbuk na mjezynarodny festiwal „International Carnival Tivat“ wot 6. do 10. junija w Montenegru, serbska rejowanska skupina Smjerdźaca wot 23. do 25. awgusta na mjezynarodny festiwal Pisek w Čěskej.
Chór Lipa změje 8. septembra 2024 koncert w Serbskim seminarje w Praze.
Lubnjow (SN). Prezidij Domowiny je so wčera w Lubnjowje schadźował – w městačku, kotrež bu w lěće 950 jako wjes wudźerjow znate. Tu so wot dźensnišeho seminar zastupjerjow domoródnych etniskich mjeńšin w Europje bjez maćerneho kraja wotměwa. Na zarjadowanjach so tež čłonojo prezidija Domowiny wobdźěleja. Na wčerawšim posedźenju su woni doskónčny namjet na nowe „Myto za hospodarstwo“ wothłosowali, z kotrymž chcedźa wusahowace přikłady za wužiwanje serbšćiny w hospodarstwje hódnoćić. Zwjazkowe předsydstwo budźe wo tym spočatk junija diskutować.
Mjez dalšimi temami, z kotrymiž je so prezidij zaběrał, běchu tež wólbne kopolaki za wólby krajneju sejmow Sakskeje (1. požnjenca) a Braniborskeje (22. požnjenca). Třěšny zwjazk je na wšelakorych pućach zjawnosć přeprosył, prašenja na politiske strony zapodać, kotrež móhła Domowina jim sposrědkować. Prezidij je so na dźesać prašenjow dorozumił. Wólbne kopolaki měrja so na přikład na kubłanske naležnosće abo wužiwanje serbšćiny na digitalnym polu. Ručež wotmołwy předleža, Domowina je wozjewi.
Spěchowanske towarstwo doma Zejlerja a Smolerja prócuje so dale wo to, kulturne herbstwo serbskeho fararja, basnika, ratarja, šulskeho inspektora, publicista a redaktora Handrija Zejlerja pěstować.
Łaz (AK/SN). Čłon předsydstwa towarstwa Zejlerja a Smolerja we Łazu Reinhardt Schneider skedźbni zańdźeny pjatk w rozprawje na lětnej hłownej zhromadźiznje na wuznam a prócowanja spěchowanskeho towarstwa Zejlerja a Smolerja. „Tak loni šěsć wodźenjow po wustajeńcy Zejlerjowe slědy přewjedźechmy“, wón wujasni. Mjez druhim su čłonojo Kulowskeho chóra Bratrowstwo, studenća sorabistiki z Lipska, čłonojo załožby Ewangelska Šleska, přećeljo Wojerowskeho wuměłstwoweho towarstwa, Serbski žónski ansambl pod nawodom Walburgi Wałdźic a přećeljo domizny z Łaza přichwatali. Spočatk februara su čłonojo towarstwa basnika Handrija Zejlerja k jeho 220. narodninam počesćili a połožichu před pomnikom kwětki. Nimo toho při Domje Zejlerja a Smolerja wopomnjensku taflu za Łazowskeho chronista a čestneho wobydlerja Heinza Menzela poswjećichu.
Přiwćicy (kl/SN). Wjace wo dźěławosći rěčneho motiwatora za kónčinu Malešecy a Bukecy su čłonojo předsydstwa župy „Jan Arnošt Smoler“ Budyšin wčera, wutoru, w jeho běrowje w Přiwćicach zhonili. Tak přihotuje motiwator Lucian Kaulfürst poskitk za nalětnje wiki přirody 27. apryla w Stróži. Wón rěčeše tež wo swojich stykach. Najebać to ma předsydstwo za trěbne, zo motiwator zwiski do serbskich cyłkow w Malešecach, Kubšicach a Bukecach dale pohłubšuje.
Zhromadnje z regionalnej rěčnicu zhladowaše předsydstwo na kubłansku jězbu minjenu sobotu do Berlina. Wobdźělnicy chwalachu serbsku bjesadu, wšako někotři ju we wšědnym dnju hižo nimaja. Na tamnym boku so prašachu, čehodla njeběše wjace zajima ze starobneje skupinje wyše 60 lět.
Wuměnichu so wo zetkanju z Domowinskimi skupinami a towarstwami w župje. Wosom skupin a towarstwow sydaše w měrcu za blidom w Radworju. Na přikład přeja sej cyłki přehlad wo serbskich přednoškach, to rěka mjena referentow, temy a kontakty. Skupiny, kotrež přitomne njeběchu, chcedźa nětko wopytać.
Choćebuz (SN/at). Předsydstwo župy Delnja Łužica je hłownu zhromadźiznu za 8. junija, sobotu, do Lěšćow (Hornow) zwołało, kaž župan dr. Pětš Šurman po wčerawšim posedźenju gremije zdźěli.
W srjedźišću pak steješe znowa župne młodźinske dźěło. Župan je wobsahowy postup zwěsćił, kotryž zwuraznja so w zaměrnišim kubłanskim dźěle. To je wuslědk zhromadneho skutkowanja zamołwiteje za młodźinske dźěło župy w měsće, Franciski Albertoweje, a regionalneje rěčnicy Domowiny Heiki Apeltoweje. „W dobje pandemije je wěda wo ludowych nałožkach woteběrała“, rjekny župan. Za nje nětko po wšelakich kanalach wabja, mjez druhim w hamtskich łopjenach. Předwidźane je nimo toho, wjace wědy wo wotpowědnym nałožku do moderacije zarjadowanja zaplesć.
Župa wobdźěli so na informaciskim zarjadowanju Akciskeho zwjazka Braniborskeje „Rjeńšo žiwi być bjez nacijow“.
Za popołdnju do schadowanki 12. oktobra planuja młodźinski dialog „Kak móže serbska rěč wědomišo widźomna być?“. Předstajeć budu so tam zdobom serbske zarjadnišća z Choćebuza.
Wobmjezowanja za čas korona-pandemije mějachu za skutkowanje Zwjazkoweho předsydstwa Domowiny tež lěpšinu: W zwisku z online přewjedźenymi posedźenjemi poskićeny livestream je tež zajimowanym zmóžnił, zarjadowanje wot doma abo něhdźe druhdźe sćěhować. Kak dołho pak měli paski w interneće přistupne być? Zwjazkowe předsydstwo je dobu nětko přikrótšiło.
Choćebuz/Budyšin (SN/at). Natočenja wo posedźenjach Zwjazkoweho předsydstwa Domowiny „měli jedyn měsac online přistupne być a so potom hasnyć“. Tak rěka w nowym dypku 1 paragrafa 3 swojeho jednanskeho porjada, kotryž je zwjazkowe předsydstwo minjeny pjatk w Choćebuzu z hłosawzdaćom schwaliło. Dotal běchu natočenja lěto internetnje přistupne. Wuběrk za zjawnostne a wukrajne dźěło je změnu poručił. Prezidij bě jón prosył, rjadowanje pruwować.
Wuradźuje-li Zwjazkowe předsydstwo Domowiny w Delnjej Łužicy, zaběra so wone zwjetša tež z temami tamnišeje specifiki. Rěčny projekt „Zorja“ je tajka, za kotruž so tež w sakskim dźělu Łužicy zajimuja.
Choćebuz (SN/at). 18 čłonkow a čłonow zwjazkoweho předsydstwa je so na posedźenju minjeny pjatk wobdźěliło, wosom na městnje w Delnjoserbskim internaće w Choćebuzu a dźesaćo online doma před wobrazowku. Dokelž někotři do toho přizjewjachu, posedźenje prjedy wopušćić dyrbjeć, wobjednachu wobzamknjenjakmanosće dla wobzamknjenja hnydom na spočatku dnjoweho porjada. Mjez druhim pomjenowa zwjazkowe předsydstwo Bernda Jurka, Kerstin Kosakowu, Margit Neugebauer, Freda Kaisera, dr. Hartmuta Leipnera, dr. Renate Harcke a Rainera Vogela w přihotach na wólby Rady za naležnosće Serbow Braniborskeje za dobu 2024–2029 z jednym hłosawzdaćom do wólbneho wuběrka.