Wulki zajim za wukubłanje pola LEAG
Po třilětnej přestawce, hłownje koronapandemije dla, je wukubłanišćo LEAG w Čornej Pumpje swoje wrota prěni raz minjenu sobotu zaso wotewrěło. Na dźeń požadarjow je 450 zajimowanych młodych ludźi z cyłeje Łužicy přišło.
Čorna Pumpa (JoS/SN). Předstajene buchu wukubłanske poskitki w hórnistwje a w milinarni. Zajim za pjeć hodźin trajace zarjadowanje bě wulki, wšako bě hnydom móžno so požadać abo swoje kontaktowe daty za pozdźiši rozsud powołanja zawostajić.
Předewzaće Łužiska energija a milinarnje (LEAG) planuje we wobłuku strukturneje a energijoweje změny wulke projekty přichoda, wo kotrež maja so wukubłani fachowcy starać. To wězo wabi, ale cyle tak daloko hišće njeje, kaž rjekny to Ingo Fischer, zamołwity za wukubłanje w hórnistwje. „Daloki wid do přichoda předewzaća wězo je, specifiske powołanja za to pak dotal postajene njejsu. Z aktualnym wukubłanskim profilom je LEAG derje nastajena, zo by mnohe wužadanja zmištrowała.“
Njedostatk wody zamołwitych přewšo wužada
Choćebuz (SN/at). Politisce wobzamknjeny kónc wudobywanja a zmilinjenja brunicy njeje přičina za hrožacy njedostatk wody we Łužicy. Na to je wobswětowa syć Zelena liga na posedźenju braniborskeho brunicoweho wuběrka minjeny štwórtk w Choćebuzu skedźbniła a so tajkim předstajenjam znapřećiwiła. Při tym měješe Wobswětowy zwjazkowy zarjad (UBA) poboku. Tón je na posedźenju brunicoweho wuběrka mjezystaw wot njeho do nadawka dateho posudka „Wodohospodarske sćěhi kónca wudobywanja brunicy we Łužicy“ předstajił.
„Wobswětowy zwjazkowy zarjad je nam wuraznje wobkrućił, zo je přisunjenje zamołwitosće za wočakowane wodowe połoženje wustupej z brunicy zabłudźawe a wěcownje wopak. Hladajo na zamylacy titl posudka wočakujemy tež zjawnje jasnu komunikaciju w tymle prašenju“, rjekny Renej Šuster, zastupjer wobswětowych zwjazkow we wuběrku.
Rědke powołanje wuhlonošerja
Wjace připrawow w měsće twarili
Budyšin (SN). W Budyšinje su mějićeljo domow lětsa hižo 24 nowych solarnych připrawow instalowali. Tole wotpowěduje přirostej wo šěsć procentow porno lońšemu. Analyza přirunowanja płaćiznow za solarne připrawy Selfmade Energy w registrje zwjazkoweje syćoweje agentury pokazuje, zo leži rozrost w Budyšinje pod cyłozwjazkowym přerězkom. Cyłkowna ličba na Budyskich třěchach instalowanych solarnych připrawow wučinja tuchwilu 428.
Jednaćel Selfmade Energy dr. Tim Rosengart zwěsća, zo su předewšěm tučasnje wysoke energijowe płaćizny z přičinu rozrosta. „Najwjace wobsedźerjow domow wužiwa naš darmotny solarny ličak zo móhli wuslědźić, kak móža so njewotwisni wot dalšeho wuwića energije stać. Na naprašowanjach widźimy, zo zwisuje rozsud za solarnu připrawu přeco časćišo z kupom e-awta abo ćopłotneje klumpy za tepjenje“, dr. Tim Rosengart wujasni.
Na ležownosći Drježdźanskeje Techniskeje uniwersity steji po ...
Zapalerstwo raznje kritizuja
Budyšin (SN). W nocy wot minjeneho štwórtka na pjatk je so znowa zapalerstwo na twarnišćo Budyskeje twarskeje firmy Hentschke w Lipsku-Stünzu stało. Wěcna škoda wučinja srjedźnu šěsćcyfrowu sumu. Wobškodźenej stej twarskej mašinje, kotrejž so dospołnje wupalištej. Na twarnišću zhotowjeja železniske přewody. Twarska naprawa je wažna hladajo na optiměrowanje kolijoweho wobchada a kolijoweje syće w regionje. „Zhromadnje z druhimi předewzaćemi twarimy na ciwilnej infrastrukturje za ludźi našeho kraja. Zapalerstwo je, kaž mnohe dalše do toho, nadpad na cyłu towaršnosć. Žadamy sej wjace podpěry ze stron politiki a wěstotnych zarjadow. To je hižo sedmy pad zapalerstwa přećiwo našemu předewzaću. K tomu přińdu hišće dźesatki padow sabotaže, wěcneho wobškodźenja a nadpadow na sobudźěłaćerjow“, wjednistwo předewzaća wuzběhny. Zo knježi přeco hišće telko namocy, je wuslědk politiki a šěrokich dźělow towaršnosće, kotrež so z njej njerozestajeja, wjednistwo Budyskeje firmy podšmórny. „Zapřijeće aktiwizm njesmě so dlěje złahodnjeć.
Nowe ćahi su hižo na kolijach po puću
Komora ma jasne žadanja
Drježdźany (SN). Wosom z dźesać rjemjeslniskich firmow Drježdźanskeho komorneho wobwoda dyrbi dźensa wjace za energiju wudawać hač před lětom. Mjeztym zo so mnohe dotalne krizy jenož na mało branšow wuskutkowachu, je tónraz cyłe rjemjesło potrjechene.
Cyłkownje 80 procentow dźěłarnjow motorskich jězdźidłow přizjewi wyše energijowe kóšty, w twarskim rjemjesle je jich 79 procentow zawodow. Nimale wšitke předewzaća rozprawjeja wo stupacych płaćiznach za material a wo přetorhnjenych dodawanskich rjećazach. Jeničce wosom z 531 firmow, kotrež su so na naprašowanju wobdźělili, njeje ani wot toho jednoho ani wot tamneho potrjechene.
Myto za naslědnosć tež zawod z Wojerec dóstał
Hórnikecy (SN/BŠe). Zhorjelski a Budyski wokrjes stej wčera w Hórnikečanskej Energijowej fabrice 27. hornjołužiske předewzaćelske myto spožčili. Tak počesćichu tři regionalne zawody, kotrež so wosebje za temu naslědnosć angažuja.
Lětsa je znowa Marketingowa towaršnosć Hornja Łužica-Delnja Šleska (MGO) w nadawku wokrjesow předewzaćelow pytała, kotřiž z małych a srjedźostawskich firmow a klasiskich hospodarskich branšow, ale tež z kreatiwneho, turistiskeho a wólnočasneho hospodarstwa pochadźeja. Tohorunja dyrbjeli woni wobswěto- a socialnje znjesliwe hospodarić a z naslědnym wobchodniskim modelom jury přeswědčić. „Trajne předewzaćelske jednanje w ćežkich časach“ bě lětuše hesło wuznamjenjenja.
Naladaw rjemjesleje jara špatna
Drježdźany (SN). Rjemjesło na wuchodźe Sakskeje zhladuje z wulkej starosću do přichoda. To wujewja aktualne nazymske konjunkturne woprašowanje Drježdźanskeje rjemjeslniskeje komory. Porno lońšemu je nalada jasnje špatniša. Před lětom ležeše wobchodniska klima hišće pola 121 dypkow a nalěto pola 110 dypkow, nětko je jich jenož hišće 85 dypkow.
Předewšěm zaleži to na pesimistiskich wočakowanjach předewzaćow přichod nastupajo. Mjeztym zo maja předewzaća hišće wjele nadawkow, so firmy starosća. Wysoke energijowe płaćizny, sylnje přiběrace płaćizny materiala a surowiznow, stupace danje a přetorhnjene dodawanske rjećazy kaž tež inflacija předewzaća chětro znjeměrnjeja.
„Stupacych kóštow a runočasnje woteběraceho naprašowanja dla pola rjemjeslnikow tuchwilu hubjenu naladu wujewja. Někotre firmy starosća so wo swoju eksistencu“, zwurazni prezident Drježdźanskeje rjemjeslniskeje komory Jörg Dittrich. „Zo bychu so starosće předewzaćow pomjeńšili, dyrbi politika aktiwniša być. Přetož tajke wuwiće płaćiznow wobchodniske modele wohroža.“
