To a tamne (04.07.23)
Fatalne misnjenje na Filipinach: We wabjenskim wideju je ministerstwo za turizm wo dowolnikow wabiło – z nahrawanjemi z druhich krajow. Zamołwitej agenturje za marketing su mjeztym wupowědźili. Archiwny material pochadźeše z Indoneziskeje, Thailandskeje, Šwicarskeje a arabskich krajow. Agentura je so zamołwiła a přiznała, zo je cuzy material za wabjenski widejo wužiwała.
Swoje koleso při policajskim awće přizamknył je pjany muž w Gubinje. 45lětny bě koło njedźelu w Gubinje sewjerowuchodnje Choćebuza z dołhim rjećazowym zamkom při awće přiwjazał. Jako pozdźišo po koleso přińdźe, jeho policisća wuhladachu a narěčachu. Na to wućahny muž powětrowu klumpu z nachribjetnika, do zastojnikow biješe a jednoho z nich na ruce zrani. Test alkohola pola 45lětneho wunjese 4,62 promilow.
To a tamne (03.07.23)
Wjace hač 6 000 zajimcow je mjeztym 22. mjezynarodne zetkanje jězdźidłow wuchodneho bloka w technikowym muzeju w Pütnitzu we wokrjesu Předpomorska-Rujany wopytało. Widźeć bě tam 1 600 jězdźidłow, wot motorskich, přez awta hač k ćežkim nakładnym awtam. Towarstwo techniki eksistuje wot lěta 2001 a chce jězdźidła bywšeho wuchodneho bloka zachować, ponowić a ludźom zbližić. Wot lěta 2004 wužiwaja za to bywše wojerske lětanišćo Pütnitz.
Tykanc chorobneho personala zjědł je wopity muž w klinice w Hornjej Pfalcy. 61lětneho běchu w nocy na njedźelu chětro pjaneho do nuzoweje přijimarnje chorownje w bayerskim Weidenje přiwjezli. Tam dźěše wón do stwy přistajenych a da so do tykanca, kiž bě za nócnu změnu přihotowany. Hač dyrbi muž ze skóržbu ličić, ma statne rěčnistwo pruwować.
To a tamne (30.06.23)
Hodźiny dołho je kołp wčera nowu a chětro drohu čaru podzemskeje železnicy w Londonje blokował. Zadźěwka dla dochadźeše na „Elizabeth Line“ k masiwnym zapozdźenjam, zdźěli wobhospodar na swojej internetnej stronje. Runočasnje pasažěrojo w socialnych medijach skoržachu, zo su we wagonach bjez toaletow zamknjeni. „Kak ćežko prošu jara je, zwěrjo z kolijow wućěrić“, so ludźo prašachu. Čaru běchu hakle loni w septembru na česć kralowny Elizabeth II. wotewrěli. Twar płaćeše 22 miliardow eurow.
Tójšto mjasa a kołbasy pokradnyli su paduši ze superwikow we Wildenfelsu w Zwickauskim wokrjesu a su při tym tež hišće chłódźenje přetorhnyli. Tuž dyrbjachu wšo zničić, štož bě we chłódźerni składowane. Paduši běchu durje chłódźernje wočinjene wostajili. Cyłkowna škoda wučinja wjace hač 10 000 eurow.
To a tamne (29.06.23)
Z hłowu we wobłoženju mosta tčacy wostał je wopity muž w Sandersdorfje-Brehna w Halle. Wohnjowa wobora móžeše 39lětneho wuswobodźić. Test alkohola wunjese 1,26 promilow. Do njelubozneho połoženja bě muž w měšćanskim dźělu Petersroda přišoł, jako za runje zhubjenymi wěcami pytaše.
Swojemu nanej žiwjenje wuchował je dwanaćelětny hólc w Baltiskim morju. Pachoł bě hłowu 36lětneho do womory padnjeneho muža w Großenbrode w Mecklenburgskim zaliwje nad wodu dźeržał a wótře wo pomoc wołał, policija zdźěla. Pomocnicy towaršnosće za wuchowanje žiwjenje muža na pobrjóh donjesechu, hdźež hižo helikopter na njeho čakaše. Dowolnika ze Sauerlandskeje dowjezechu do chorownje. Muž bě prawdźepodobnje předschorjenja dla we wodźe do womory padnył.
To a tamne (28.06.23)
Klimowe protesty nětko tež znate rjemjeslnicy Seiffenskeho ludoweho wuměłstwa tematizuja. Tak su tam wosebiteho kurjaka wuwili. Mały muž sedźi w oranžojtym lacu na šěrym spódku. Kur jemu z wušow stupa. Wo klimowych protestach ludźo wšudźe diskutuja a tuž přemyslowachmy, kak móhł kurjak wupadać, rjemjeslnicy zdźěla. Woni maja hižo nazhonjenja z aktualnymi temami. Wot lońšeho móžeš tež figury politikarjow amploweho knježerstwa kupić.
W poprawom prózdnym socialnym bydlenju w južnofrancoskim městačku Nizza su zastojnicy 40 wowcow našli. Něhdźe 50 kwadratnych metrow wulke bydlenje běše ze słomu wupołožene. Mužow, kotrajž měještaj z kreju napancanej shirtaj zwoblěkanaj, je policija zajała. Zarjady tukaja, zo chcyštaj wowcy do muslimskeho woporoweho swjedźenja ilegalnje zarězać, wčera francoske medije rozprawjachu.
To a tamne (27.06.23)
Dwójce po USA, jónu z kolesom a jónu pěši – tole je ambicioněrowany plan němskeho ekstremoweho sportowca Jonasa Deichmana. Jutře, 28. junija, startuje wón swoju turu na Brooklyn bridge w New Yorku. Wottam poda so wón na kolesu jónu přez cyłu USA. Hdyž přijědźe do Los Angelesa, wotstaji tam swoje koleso a nawróći so pěši zaso do New Yorka. Deichmann je znaty za swoje sportowe prócowanja. Wón běše na přikład hižo „triatlon po swěće“ zdokonjał – distanca je někak 120 razow tak daloka kaž ta ironmana na Hawaii.
Zo rěčimy z dźěćimi hinak hač z dorosćenym čłowjekom je znate. Fenomen mjenuje so „baby talk“. Zo pak delfiny runje tajku wosebitu komunikaciju maja, njebě dotal znate. Mjezynarodny slědźerski team pak je tole nětko dopokazał. Tak maja delfiny, komunikuja-li z młódšimi zwěrjatami, hinaše hwizdy a tež frekwenca wonych je dospołnje hinaša.
To a tamne (26.06.23)
Zranjeneho kołpja su zastojnicy we Łužnicy (Laußnitz) ze zwjazkoweje dróhi wuchowali. Wobydlerka bě zwěrjo wuhladała a policiju informowała. Po tym zo běchu zwěrjo popadnyli, dowjezechu je k skótnemu lěkarjej.
Na bój w klětce staj so gigantaj tech-branše Elon Musk a Mark Zuckerberg dojednałoj. Musk bě Zuckerberga přez tweet na bój přeprosył. Kontrahent zwoli do boja, prašejo so za městnosću. Hač je dorěčenje chutne, abo jeno žort, jasne njeje. Wuměna miliardarow so w socialnych syćach spěšnje roznošowaše. Wužiwarjo wšelakorych platformow šěrjachu tak mjenowane memesy a debatowachu wo tym, kotry z dweju móhł bój dobyć. 39lětny Zuckerberg je znaty za swoje wideja, kotrež pokazuja jeho při trenowanju za bojowy sport. Samo wo móžnych taktikach w interneće rozmyslowachu.
To a tamne (23.06.23)
Pancerowane kolesate třělcowske jězdźidło pólskeje armeje je we Wrócławju do wosoboweho awta zrazyło. Wjace hač 20 tonow ćežki kolos je na křižowanišću do awta prasnyło. Prawdźepodobnje njeje wojak za wodźidłom wojerskeho jězdźidła předjězbu wosoboweho awta wobkedźbował. Šofer awta so zrani. Jeho dowjezechu do chorownje. Jězdźidło armeje bě po puću k Wrócławskej Hali lětstotka, hdźež chcychu je we wobłuku zarjadowanja wustajić.
Bager brunicoweje jamy wobsadźili su wobswětowi aktiwisća z Čěskeje, Pólskeje a Němskeje w čěskej brunicowej jamje Bílina. Demonstranća protestuja přećiwo podlěšenju słužbneje dowolnosće jamy hač do lěta 2035, rěčnik organizacije Greenpeace zdźěli. Bílina leži 35 kilometrow južnje Drježdźan. Aktiwisća chcedźa 24 hodźin na bagrje wutrać.
To a tamne (22.06.23)
Nimale dwě lěće darmotnje w luksusowym hotelu bydlił je muž w Indiskej. Hotel w stolicy New Delhiju je nětko policiji škodu 65 000 eurow přizjewił. Trajny hósć bě lesćiwje postupował. Tak wupisa hotelej stajnje zaso šeki, kotrež pak banka njewupłaći. Tež sobudźěłaćer recepcije bě wobdźěleny: Wón nawodnistwo hotela wo pakostniku njeinformowaše a nimo toho zakrywaše, hdźe „hósć“ runje bydleše. Přepytowanja policije traja.
Wjace hač 50 zahrodowych palčikow pokradnyli su njeznaći w Rhinowje, w Havellandskim wokrjesu. Padustwo běchu wutoru pola policije přizjewili. Skućićeljo su prawdźepodobnje přez płót zahrody zalězli a dekoraciju spakosćili. Zastojnicy trochuja nastatu škodu na něhdźe tysac eurow. Kriminalna policija je přepytowanja zahajiła a nadźija so pokiwow susodow a dalšich swědkow.
To a tamne (21.06.23)
Nowy tematiski wobłuk w Berlinskim kabineće wóskowych figurow „Madame Tussauds“ wotewrěł je bywši knježacy měšćanosta Klaus Wowereit. Wotdźěl „Award Party“ ma swjatočnosće spožčenja myta na čerwjenym přestrjencu z tójšto prominentnymi wosobami napodobnić. Kabinet Madame Tussauds swjeći lětsa 15. róčnicu wobstaća. Wowereit bě swojoraznu přehladku Pod lipami lěta 2008 jako měšćanosta wotewrěł a je tam wězo ze swójskej figuru zwobraznjeny.
Narodniny krala Charlesa III. su w britiskim wulkopósłanstwje w Berlinje ze 400 hosćimi woswjećili. „Je hišće trochu njezwučene, wo narodninach krala rěčeć“, wulkopósłanča Jill Gallard hladajo na dołhi čas zastojnstwa kralowny Elizabeth II. rjekny. Narodniny britiskeho monarcha swjeća stajnje w lěću, dokelž maja tam wuhlady na rjane wjedro.
