To a tamne (26.09.23)
Hejateho kołpja přeswědčił je fachowc za kołpje Olaf Nieß w Hamburgu a je za to wjele připóznaća žnjał. Zwěrjo bě na dwórnišću měšćanskeje podzemskeje železnicy U 1 pod wagon zalězło a so spjećowaše, so zaso zminyć. Na to dyrbjachu železnisku čaru zawrěć a busy a taksije zasadźić. Přiwołanemu fachowcej so skónčnje poradźi, „kołpja přeswědčić“. Železnicarjo dźakuja so tež zwěrjeću za kooperaciju na dobro jěducych.
Rjedźenje Braniborskich wrotow po nadpadźe z barbu ze stron škitarjow klimy drje dołho traje a budźe dróše hač myslene. Na wjacorych městnach, kotrež běchu aktiwisća tydźenja z barbu popryskali, su minjene dny wšelake techniki rjedźenja wuspytali. Wuslědki chcychu sej fachowcy dźensa wobhladać. Najwjetši problem je struktura pěskowca, do kotrehož je so barba zadobyła. Horca woda abo wysoki ćišć wody móhli škody načinić. Dotal planowane kóšty 35 000 eurow za rjedźenje drje njedosahaja.
To a tamne (25.09.23)
„Lěsny mops čo. 20“ ma wot jutřišeho zaso w Brandenburgu nad Habolu, w ródnym měsće karikaturista a kabaretista Loriota stać. Před lětom běchu skulpturu mopsa pokradnyli. Město bě je narunać dało. Kult wokoło małeho brjuchateho psa – kotrež Loriot wosebje lubowaše – bě wuměłc sam nastorčił: „Žiwjenje bjez mopsa je móžne, ale bjez zmysła.“ Po měsće rozdźělenych steji 27 bronzowych figurow „lěsneho mopsa“. Loriot by 12. nowembra swoje stoćiny woswjećił.
Přećiwo zdźěla chaotiskim poměram na rěkach a kanalach Berlina su čołmarjo a wjesłowarjo wčera protestowali. „Je dale a strašniše za wodowy sport“, rjeknychu zamołwići Treptowskeho wjesłowarskeho zjednoćenstwa. Hłowny problem su wulke motorowe čołmy, kotrež móžeš bjez jězbneje dowolnosće wužiwać. Tute „partyjowe čołmy“ druhich wohrožuja.
To a tamne (22.09.23)
Njewšědnu akciju wuchowanja ze 56 metrow wysokeje cyrkwinskeje wěže je Mnichowska wohnjowa wobora zdokonjała. 72lětna žona bě ze znatymi na sławnu wěžu cyrkwje swj. Pětra zalězła, zo by jim rjany wuhlad na město pokazała. Na wěži dósta wona strowotniske problemy. Přichwatani wohnjowi wobornicy zwěsćichu, zo njeje transport žony po schodach móžny. Tuž ju na nošadle ležo z powjazami z wěže pušćichu. Turistam bě tole witana atrakcija, za kotruž so wobornikam z přikleskom dźakowachu.
Kołp na kolijach je železniski wobchad britiskeje stolicy Londona znowa haćił. Ćahi so we wčerawšim rańšim powołanskim wobchadźe zapozdźichu. Hižo srjedu bě kołp na kolijach wažnu měšćansku železnisku čaru Elizabeth Line chětro mylił. Hač jedna so wo samsne zwěrjo, zamołwići dotal hišće njewědźa.
To a tamne (21.09.23)
Z kolesom na awtodróze po puću była je 30lětna žona w Delnjej Sakskej, dokelž bě jeje nawigaciska app tutu čaru doporučiła. Policist, kiž bě runje po puću na dźěło, žonu w strašnym połoženju wuhlada a zadźerža. Ze sylzami we wočomaj kolesowarka jemu zdźěli, zo je po puću na parkowanišćo, z kotrehož wotjědźe bus do Nižozemskeje. Policist ju tam dowjeze, jeho kolegojo starachu so wo koleso.
Hišće tójšto ludźi wo sebi přeswědčić dyrbi Julian Nagelsmann, chce-li so ze trenarjom němskeje narodneje koparskeje wubranki stać. W reprezentatiwnym woprašowanju slědźenskeho instituta YouGov jenož 33 procentow ludźi tomu přihłosuje, zo přewozmje Nagelsmann zastojnstwo Hansija Flicka. 18 procentow woprašanych Nagelsmanna jako trenarja wotpokazuje. Koparski zwjazk bě Flicka 10. septembra wuwjazał.
To a tamne (20.09.23)
Něhdźe 2,5 tonow kukuricowych potačow su njeznaći w Šwikawskim wokrjesu w minjenymaj tydźenjomaj pokradnyli. Wobsedźer je předwčerawšim, póndźelu, na swojim polu w Crinitzbergu awto z připowěšakom wuhladał. Jako so awtu bližeše, njeznaty z wozom ćekny. Prawdźepodobnje bě wón tam hižo časćišo pobył. Hódnota kradnjenych potačow wučinja něhdźe 600 eurow.
Rubježnika přemóhł je wobsedźer wobchoda za debjenki w Freibergu. 19lětny paduch bě 64lětneho z na pistolu podobnym předmjetom wobhrozył a sej žadał, zo wobsedźer nachribjetnik paducha z debjenkami napjelni. Złotnikar ćisny rubježnikej nachribjetnik do mjezwoča a jeho přewiny. Přiwołana policija paducha zaja. Hač jednaše so woprawdźe wo pistolu abo jenož wo atrapu, njeje znate.
To a tamne (19.09.23)
Wosom literskich karanow piwa wšědnje wupije Günter Werner na oktoberskim swjedźenju w Mnichowje – a to mjeztym 64 lět. Lětsa je wón swoje 80ćiny woswjećił a nětko rozmysluje, snano jenož hišće kóždy druhi dźeń na najwjetši ludowy swjedźeń swěta přińć. Hižo wjele lět sedźi Werner na krutym městnje za blidom 180 w stanje „Schottenhamel“ w času mjez 12 a 23 hodź.
Na wšě 35 000 eurow płaći rjedźenje Braniborskich wrotow w Berlinje, po tym zo běchu klimowi aktiwisća sławny symbol němskeje stolicy z oranžowej barbu namórali. Hač do kónca tydźenja chcedźa barbu dospołnje z pěskowca wotstronić, štož je hladajo na strukturu materiala wobćežne. Aktiwisća běchu Braniborske wrota njedźelu popryskali. Hišće samsny dźeń běchu započeli, je wurjedźić.
To a tamne (18.09.23)
Najlěpši šofer sněhoweho płuha Němskeje přińdźe z hornjeje Frankskeje. Při němskim mišterstwje wodźerjow sněhoweho płuha w Koblenzu je sobudźěłaćer měšćanskeho zawoda Julian Scharf z bayerskeho Marktredwitza ze swojim ko-pilotom Noahom Trögerom dobył. Wodźerjo sněhowych płuhow ze wšeje Němskeje běchu so tež cyle bjez sněha wubědźowali. Při tym dyrbjachu 450 metrow dołhu čaru wušiknosće zmištrować.
Psy su swójbnu kupjel w bayerskim Augsburgu minjeny kónc tydźenja mjeztym štwórty króć k zakónčenju lětušeje kupanskeje sezony wobsadźili a so tam do syteje wole wucychnowali. Zarjadowanje je wobsedźerjam rasowych psow a měšencow kóžde lěto wjeršk. Minjene lěta su tam wjace hač 1 100 psow zličili. Spektakl z wjacorymi zarjadowanjemi organizuje wodowa straža města.
To a tamne (15.09.23)
Betonowy pomnik na konju jěchaceje bywšeje zwjazkoweje kanclerki Angele Merkel w Hornjej Pfalcy je so sypnył. Po ani dwěmaj lětomaj je so minjenu nóc 2,70 wysoka skulptura zwjezła, wuměłc Wilhelm Koch zdźěla. Wón bě skulpturu tehdy z pomocu ćišćaka 3 D za muzej w Etsdorfje stworił a hižo bórze zwěsćił, zo so material pod hołym njebjom njehodźi. Pomnik bě stajnje zaso diskusije wo prašenju zbudźił, hač je wón „počesćenje abo skerje wusměšowanje“.
Cyłu nóc z ruku w lifće domjaceho schodu tčał je muž w bayerskim Glattbachu. Dokelž tčeše tež nuzowy knefl w zatłusnjenej ruce, njemóžeše rentnar wo pomoc wołać. Muž bě so nawječor z lifta sunył a z ruku mjez liftom a metalowej šćěnu wisajo wostał. Hakle přichodne ranje susod muža wuhlada. Snadnje zranjeneho starca dowjezechu do chorownje
To a tamne (14.09.23)
Tysac eurow před nohi padnyli su mužej na Mnichowskim hłownym dwórnišću. 48lětny je pjenjezy na to policiji přepodał. Z pomocu nahrawanjow awtomatiskich kamerow zastojnicy wobsedźerku zwěsćichu: 67lětnej žonje běchu so pjenjezy z bluzy sunyli, jako na ćah do Šwicarskeje chwataše. Policisća zazwonichu lokomotiwnika, kiž žonu w ćahu namaka. Wona smě sej pjenjezy na wróćojězbje w Mnichowje wotewzać.
Šup we wuhenju je w Choćebuzu zasadźenje wohnjoweje wobory zawinował. Zwěrjo bě wutoru we wuhenju bydlenskeho domu tčace wostało. Zo bychu šupa wuswobodźili, wohnjowi wobornicy w pincy domu dźěru do wuhenja wudypachu. Saznik ze swojej šćětku zwěrjo pohnu, so do směra na dźěru hibać. Jako chcychu wohnjowi wobornicy šupa do transportneje tyzy tyknyć, wón ćekny.
To a tamne (13.09.23)
Antikske narowne kamjenje z Jemena su we wobchodźe meblow w Londonje namakali. Kamjenje słužachu předawanišću jako dekoracija. Kupc bě policiju informował. Zastojnicy zwěsćichu, zo jedna so wo dźěle antikneho rownišća, kotrež bu loni wurubjene. Wobsedźer wobchoda kamjenje policiji přewostaji, zo móhła je Jemenej wróćić.
Tunl do twarjenja wyšeho sudnistwa Montenegra su njeznaći w stolicy Podgorica ryli. Objekt saha hač do komory, w kotrejž składuja dokumenty sudniskich jednanjow. Prawdźepodobnje pak ničo njepobrachuje. Tunl su sobudźěłaćerjo skerje připadnje namakali. Zamołwići su sej wěsći, zo chcychu kriminelne cwólby jatych ze sudniskeje žurle wuswobodźić a jim ćěkanje zmóžnić. Organizowana kriminalita je w Montenegru přewšo rozšěrjana.
