To a tamne (20.03.24)
Ratarske zawody w Sakskej su přerěznje wjetše hač w druhich zwjazkowych krajach. Tole je Statistiski krajny zarjad w Kamjencu zwěsćił. Přerězna płonina zawodow w Sakskej wučinja 138 hektarow. W cyłoněmskim přerězku maja ratarske zawody 65 hektarow płoniny. Nadpřerězna wulkosć zawodow w Sakskej a druhich wuchodnych krajach móhła z kolektiwizowanjom ratarjow za čas NDR zwisować, statistikarjo tukaja.
Z rowa maćerje kradnjene kwětki zaso namakała je žona w sewjerorynsko-westfalskim Heiligenhausu. Dokelž běchu kwěćele prawidłownje preč, je 62lětna sćelak GPS mjez kwětki schowała a policiju informowała, po tym zo bě kwěćel zaso kradnjeny. Signal sćelaka wjedźeše zastojnikow k bydlenju 80lětneje wobydlerki města. Kwětki stejachu na balkonje staruški, policija zdźěla.
To a tamne (19.03.24)
19 tonow šinki su na awtodróze 45 w Sauerlandskej z powaleneho nakładneho awta překładować dyrbjeli. Ze šunku nakładowane awto bě wčera rano z njeznatych přičin z jězdnje zajěło, do betonoweje murje zrazyło a so powaliło. Šofer so zrani. Dokelž awto wobě čarje do směra na Frankfurt blokowaše, pósłachu sobudźěłaćerjow zawoda k městnu njezboža, w kotrymž na šinku čakachu. Awtodróha bě wjacore hodźiny blokowana. Hač móžachu šinku hišće wužiwać, njeje znate.
Wjace hač štyri miliony krokusow je minjeny kónc tydźenja w schleswigsko-holsteinskim Husumje nad Sewjernym morjom nalěćo witało. Tradicionalny swjedźeń barbičkow z koncertami a rjemjeslniskimi wikami su tam mjeztym 26. króć přewjedli. Po přeswědčenju zamołwitych maja w Husumje najwjetši wobstatk krokusow sewjerneje Europy.
To a tamne (18.03.24)
Přewjele kriminalkow a přewjele mordarstwow w telewiziji kritizuje dźiwadźelnik Max von Pufendorf. „Mortwy w bahnje, mortwy w lěsu, mortwy na horje, mortwy w Błótach – wón je sej toho wěsty, zo maja samo ći, kotřiž kriminalki lubuja, toho mjeztym dosć. Přiwšěm pěstuja tute filmy žadosć ludźi, so do złóstnistwa zanurić, mordarja wuslědźić a zajeć. „Na kóncu je swět zaso w porjadku.“
Swójski rekord jasnje přetrjechiła je Frankfurtska wuměłča pomjatka Susanne Hippauf při naličenju cyfrow kružneje ličby Pi za komu: Na mišterstwje w Emdenje je Hippauf na wšěch 18 026 cyfrow z hłowy naličiła a je swójski rekord wo wjace hač 2 500 cyfrow polěpšiła. Organizatorojo rěča wo „njesłyšanym wuslědku“. Hippauf trjebaše tři hodźiny a pjeć mjeńšinow. Při naličenju podawa so wona dušinje na pućowanje po swěće.
To a tamne (15.03.24)
Hobersku malenu su w Awstralskej do Guinnessoweje knihi rekordow zapisali. 20,4 gramow ćežki a módry eksemplar je wulki kaž tenisowy bul. Dotalna rekordna malena z lěta 2020 bě 16,2 gramaj ćežka. Malena słuša k nowej družinje Eterna, kotruž bě ratarske předewzaće wuwiło, dokelž so ludźo pječa stajnje zaso za wulkimi płodami prašeja. Što ma so z rekordnej malenu stać, hišće njewědźa. Na brěčku předźěłać ju nochcedźa.
Tematiski tydźeń „mafia“ na gymnaziju w schleswigsko-holsteinskim Kronshagenje je bjezmała wulkozasadźenje specielneje jednotki policije zawinił. Swědk bě dźiwnje zdrasćeneho młodostneho z třělbu w ruce po puću do šule wobkedźbował. Jako přiwołani policisća widźachu, zo je cyła rjadownja „wobrónjena“, so změrowachu. Direktorej rjeknychu, zo njebě hesło tydźenja jara zbožowne.
To a tamne (14.03.24)
Titanic znowa twarić dać chce awstralski miliardar. Łódź ze wšej pychu ma samo „lěpša być hač original“, 69lětny Clive Palmer zdźěla. Jězba Titanic II z britiskeho Southamptona do New Yorka ma so hižo w juniju 2027 wotměć, hinak hač 1912 pak bjez zražki z lodowcom. Něhdźe 500 milionow dolarow chcył Palmer wudać, zo móhł sej swój són spjelnić.
Młody rěznik z wulkimaj nožomaj w nachribjetniku je w Šwikawje zasadźenje policije zawinował. Swědk bě wobkedźbował, kak so 20lětny na dwórnišću z wulkim nožom zaběraše a na to do busa zalěze. Přiwołani policisća bus zadźeržachu a muža narěčachu. Při tym so wukopa, zo bě młody muž po puću k praktiskemu rězniskemu pruwowanju. Dokelž hrožeše policajskeho zasadźenja dla strach, zo termin skomdźi, jeho zastojnicy z policajskim awtom dowjezechu.
To a tamne (13.03.24)
Najstaršu wobchadnu hrěšnicu wšěch časow je italska policija lepiła. 103 lět stara žona bě wosrjedź nocy w małoměstačku Bondeno na sewjeru kraja zastojnikam napadnyła, dokelž stajnje zaso po samsnych dróhach jědźeše. Při kontroli so wukopa, zo bě jězbna dowolnosć wotběžała a zo njeje awto zawěsćene. Zastojnikam žona rjekny, zo chcyła přećelow wopytać. Policisća dowjezechu starušku domoj a awto sćazachu.
Šesty króć dobył je Dallas Seavey najnaročniše wubědźowanje psyčich zapřahow Idarod w Alasce, kotrež wotmě so lětsa 52. króć. Za 1 600 kilometrow dołhu čaru trjebaše 37lětny Seavey dźewjeć dnjow a dwě hodźinje. Wjace hač 30 žonow a muži bě so 3. měrca na puć podało. Lětsa běchu při tym tři psy zahinyli, štož debatu wo surowych poměrach wubědźowanja znowa pohonjuje.
To a tamne (12.03.24)
Dokładnje 15 637 městnow za komu ličby Pi je Frankfurtska policistka Susanne Hippauf loni naličić móhła a je tak nowy němski rekord nastajiła. Kónc tydźenja chce 42lětna swój titul zakitować a gigantiski rjad ličbow znowa z hłowy přednjesć. Wot januara wona intensiwnje zwučuje. Předewzała sej je, 18 000 ličbow za smužku bjez zmylka pruwowarjam naličić. To traje dlěje hač tři hodźiny.
Na wšěch 107 893 króć su šoferojo awtow loni w Sakskej pomocnu słužbu ADAC wołali. Bě to 3 593 króć wjace hač 2022. Najčasćišo wołachu pomocnikow defektnych baterijow dla (44,1 procent). Tola tež skóncowane motory, defektne generatory a startowaki běchu přičina nuzowych telefonatow. Najhusćišo trjebachu šoferojo pomoc wot awgusta hač do decembra 2023. Rekordny dźeń bě 4. december ze 18 378 zasadźenjemi.
To a tamne (11.03.24)
Swójske wusyłanje dóstanje sławny telewizijny kuchar Johann Lafer w sćelaku Sat.1. „Tři talerje za Lafera“ ma wot zažneho lěća 2024 popołdnju widźeć być, sćelak w Mnichowje zdźěli. Kuchar podawa třom lajskim kucharjam třoch generacijow kulinariske hesło a tući dadźa so na to do dźěła. Na kóncu Lafer wukony posudźuje a dobyćerja postaji. Lafer chcył po tutym puću pokazać, zo je warjenje w kóždym času chutna naležnosć.
Móšeń z tysac eurami našła je sobudźěłaćerka železnicy a je namakanku policiji přepodała. W listowce běchu nimo toho wosobinske dokumenty a jězbna dowolnosć wobsedźerja – 30lětneho z wokrjesa Rotenburga pola Hamburga. Muž přińdźe jenož dobru hodźinu pozdźišo na policajsku stražu w Hamburgu Altona a bě přewšo zbožowny. Čehodla měješe telko pjenjez při sebi, njeje znate.
To a tamne (08.03.24)
Drježdźany su stolica denera – to je wuslědk přepytowanja dodawanskeho serwisa „Lieferando“. W sakskej stolicy maja 16,84 předawanišćow na 100 000 wobydlerjow, štož je drje tróšku mjenje hač w Berlinje (17,72). Kwalita je pak po pohódnoćenju ludźi po cyłej Němskej najlěpša a přerězna płaćizna 4,96 eurow moderatna (w Berlinje 5,41 euro). W Hamburgu dener nimale najmjenje słodźi a je přerěznje najdróši: 6,03 eurow.
Wysokošulsku kóčku Pebbles su na Uniwersity of Exter we wuchodnym jendźelskim Colchesteru počesćili. Bronzowa postawa „Campus Cat“ steji wotnětka wosrjedź uniwersity. Kóčka Pebbles je 16 lět stara. Před 14 lětami bě so wona prěni króć na campus zabłudźiła. Byrnjež ju wobsedźerjej wróćili, je wona wšědnje zaso přišła a je tam mjeztym doma.
To a tamne (07.03.24)
Wjace hač tysac přizjewjenjow dóšło je na małej sewjernomórskej kupje Wangerooge za městno dohladowarja tamnišeje swětłownje. Po wobšěrnym rozprawnistwje w medijach wo swobodnym městnje dochadźeja tam požadanja ze wšeje Němskeje a samo z europskeho wukraja. 39 metrow wysoka historiska swětłownja je dawno wusłužiła. Dźensa wužiwaja ju jako wuhladnu wěžu. Nowy přistajeny předawa jenož hišće zastupne lisćiki a suweněry a stara so wo porjadk.
Mobilny błyskač zaparkował je muž w badensko-württembergskim Rottweilu ze swojim bydlenskim mobilom – a to cyle legalnje. Błyskač steješe na parkowanišću při wjele wužiwanej hłownej dróze. Městno pódla nastroja pak bě hišće swobodne, štož muž ze swojim mobilom wuži. W interneće žněje wón za to wjele chwalby a připóznaća.
