To a tamne (15.08.23)
Na zadnim kolesu a dwójce spěšnišo hač dowolene bě njeznaty wodźer motorskeho we westfalskim Hammje. Błyskač je jeho při akciji fotografował. Kaž policija wčera zdźěli, bu wón ze 143 kilometrami na hodźinu lepjeny. Chłostanje za to je dwaj měsacaj sćazanje jězbneje dowolnosće a dwaj dypkaj w Flensburgu kaž tež chłostanski pjenjez. Přiwšěm pak měła policija jeho najprjedy raz wuslědźić.
Po tym zo su w jendźelskim Lancasteru žonjace črije namakali, pytaja tam za wobsedźerku. Šewc Peter Cork je sandalety namakał a reparował. Přez socialne medije wón nětko za žonu pyta. Kupcy šewca su nětko jara wćipni a so wězo wobhonjeja, hač je wón hižo swoju „popjelawku“ namakał. Dokelž je pytanje wulki zajim w ludnosći zbudźił, je akcija mjeztym wuspěšne a darmotne wabjenje.
To a tamne (14.08.23)
W durjach tčacy wostał je paduch w durinskim měsće Bad Langensalza. 25lětny pospyta pozdatnje so přez wokno do pincy wjaceswójbneho domu zadobyć. Při tym so wón wobsuny a zaklini so w durjach. Wobydlerjo wołachu policiju wo pomoc. Tuta přichwata a jeho wuswobodźi. Nětko ma so wón z jednanjom wosebje ćežkeho padustwa dla bědźić.
Jako wódna knježna zasłuži sebi 40lětna Andrea Wolfert swoje pjenjezy. Poprawom wšak chcyše so wona z babu stać, před lětami pak spjelni sej wona jako wódna knježna žiwjenski són. Cyłe lěto wustupuje mać třoch dźěći w kupjelach abo na dźěćacych narodninach. Trend, kotremuž sćěhuje tež Wolfert, mjenuje so mermaiding (mermaid=wódna knježna). Přiwšěm njeje powołanje jeno wjeselo, Wolfert wuzběhny. Powołanje je ćělnje napinace a strašne.
To a tamne (11.08.23)
Hoberski had je w małym šwicarskim městačku Kriens pola Luzerna po chódniku łazył a njeměr mjez ludźimi zbudźił. Přiwołana policija móžeše nimale dwaj metraj dołhu Woma Python popadnyć. Had, kiž bě z priwatneho terarija twochnył, je mjeztym zaso pola swojeho wobsedźerja. Tomu hrozy skóržba ranjenja zakonja za škit zwěrjatow dla.
Swojeho zajateho syna z rukow policije wuswobodźić spytała, je žona w badensko-württembergskim Achernje. 21lětneho běchu po zwadźe ze žonu zajeli. Při tym bě so muž masiwnje wobarał. Po tym zo běchu jeho zastojnicy do policajskeho awta tyknyli, přińdźe nadobo mać, zo by syna wotewzała, podarmo. Po dopóznaću policije je 21lětny předchłostany z drogami wikował. Zo by so jastwu wuwinył, je so muž za drogowu terapiju přizjewił. Statne rěčnistwo to pruwuje.
To a tamne (10.08.23)
Šok w připołdnišej hodźinje: Staršej staj so w sewjerorynsko-westfalskim Milspe samaj z bydlenja wuzamknyłoj, w kotrymž ležeše runje narodźeny ćěšenk. Wobaj prošeštaj wohnjowu woboru wo pomoc. Wobornicy wotewrěchu z pomocu wjerćateho rěbla nachilene wokno w prěnim poschodźe a po tym durje bydlenja. Wšitcy wobdźěleni wuńdźechu ze stróželemi, wohnjowa wobora zdźěla.
1 800 lět stary pjenjez z časa Romjanow namakał je wosom lět stary hólc w Bremenje při hrajkanju njedaloko horta. Hólc bě pjenježk hižo loni w lěću našoł a so z fotami wo nim na krajnu archeologowku wobroćił. Ta jeho prošeše, namakanku na dźeń wotewrjeneho pomnika sobu přinjesć. Fachowča při přepytowanju zwěsći, zo jedna so wo slěborny dinar z časa romskeho kejžora Marca Aurela před wjace hač 1 800 lětami.
To a tamne (09.08.23)
Jako podachu so pasažěrojo z lětadłom na dompuć z italskeho města Lamezia Terme do Londona, so njemało dźiwachu, jako přizemi lětadło po něhdźe hodźinje w Tuneziskej. Přičina za wokołopuć bě po informacijach pućowanskeho zarjadowarja TUI, zo měješe mašina narunanske dźěle za lětadło w Enfidha-Hammamet dowozyć. 189 pasažěrow w lětadle maja nětko móžnosć sebi wotškodźenje we wysokosći 400 eurow žadać.
Wosebity serwis dožiwichu wutoru w nocy sydom wosobow na awtodróze tři blisko Wörtha při Dunaju. Po tym zo bě so jich awto skóncowało, zawołachu woni po zwučenym wašnju policiju. Tuta nablaku přichwata a njezbožownikam na cyle wosebite wašnje pomhaše: Dowjezechu jich z policajskimi awtami do hotela, wšako je wosrjedź nocy ćežko narunanske awto abo taksu namakać.
To a tamne (08.08.23)
Dochody swójskeho wobchoda spakosćił je 34lětny nawoda superwikow w Berlinje. Statne rěčnistwo mužej wumjetuje, zo je sej nimale dwě lěće dołho pjenjezy wobchoda zdźeržał a na tute wašnje 135 000 eurow pokradnył. Nadawk 34lětneho mjez druhim bě, dochody wobchoda po swjatoku we wosebitych wobalkach na banku donjesć. Znajmjeńša 66 króć je muž jednu wobalku za sebje zdźeržał.
Ze zjednoćenymi mocami su policisća kruwu z kolijow wuhnali. Njewšědny podawk sta so runje w bayerskim Ochsenfurće. Zwěrjo bě njedźelu rano z pastwy twochnyło a na kolijach do susodneje wsy běžało. Po krótkim wulěće na dróze dundaše kruwa znowa na kolijach. Bližacy so ćah dyrbješe zastać. Čaru dyrbjachu za železnicu kompletnje zawrěć. Zastojnikam policije so skónčnje poradźi, zwěrjo z picu z kolijow wabić.
To a tamne (07.08.23)
Nimo kulił je so wopyt młodeho muža pola swojeje bywšeje přećelki w pfalcskim Landauwje: Jako sobotu wječor tež hišće aktualny přećel 19lětneje do bydlenja přińdźe, sej 21lětny do kamora wućekny. Wottam zazwoni policiju. Wón twjerdźeše, zo jeho aktualny přećel z baseballowym retlom wohrožuje. Jako policisća dojědźechu, bě 21lětny hižo z kamora twochnył. Za „kreatiwnosć“ napisachu zastojnicy jemu skóržbu znjewužiwanja nuzowych telefoniskich čisłow dla.
Mjezu dochodow miliardy dolarow překročiła je režiserka USA Greta Gerwing ze swojim satiriskim filmom „Barbie“. Po informacijach Hollywoodskeho studija Warner Bros je film w kinowych kasach USA 459 milionow a we wukraju 572 milinow dolarow wunjesł. 40lětna Gerwin je tak prěnja žona a režiserka, kotrejž je so tajki wuspěch poradźił, studijo zdźěla.
To a tamne (04.08.23)
Na wšě 100 000 kilometrow wob lěto po puću je braniborski ministerski prezident Dietmar Woidke (SPD) ze swojim słužbnym „Mercedesom S“. Tole je statna kenclija w Podstupimje zdźěliła. Nahladna ličba kilometrow ma tež něšto z wulkosću kraja činić, rěčnik rozłoži. Braniborska je po płoninje pjaty najwjetši kraj Němskeje. Dalše informacije wo awće a wo słužbnych jězbach wostanu tajne.
Kak wobchadźeć z fanami heavy-metaloweho festiwala w schleswigsko-holsteinskim Wackenje, kotřiž njesmědźa najebać zastupny lisćik błóta dla na swjedźenišćo? Tute prašenje zamołwitych tuchwilu chětro zaběra. Prěni króć w stawiznach eventa dyrbjachu wulki dźěl wopytowarjow domoj pósłać. Móžne rozrisanje: Ludźom pjenjezy wróćić a jim lisćik za klětu rezerwować. Hišće pak njewědźa, kak tole technisce zmištrować.
To a tamne (03.08.23)
Ze 2,6 promilemi alkohola w kreji je šofer wosoboweho awta z Braniborskeje nimale 300 kilometrow k Baltiskemu morju jěł a je sej krótko do swojeho cila za wodźidłom wusnył. 38lětny z wokrjesa Dubja-Błóta bě w Rostocku kedźbnosć zbudźił, jako po seklojtej čarje jězdźeše. Jako awto na busowym zastanišću steješe a motor hišće běžeše, tukachu swědcy na strowotniske problemy šofera. Policija zwěsći alkohol a jězbnu dowolnosć muža sćaza. 38lětny bě po puću do susodneho Graal-Müritza – do dowola.
Znowa je pozdatne rubježne zwěrjo w Berlinje zasadźenje policije zawinowało. Muž bě zastojnikow informował, po tym zo bě w měšćanskim dźělu Dahlemje dźiwje zwěrjo wuhladał. Zastojnicy wuhladachu tam plyšowe zwěrjo na elektriskim kašćiku měšćanskeho zahrodnistwa. Štó je hrajku tam sadźił, njewědźa.
To a tamne (02.08.23)
Lód za njerozsudźenych poskićuja w kofejowni w badensko-württembergskim Gaggenauwje. Wobsedźer lodarnje měješe toho dosć, zo započina so kóžda skazanka ze znatym „ehm ...“, byrnjež rynk čakacych hižo dosć dołhi był. Štóž sej z tutym słowom pola njeho lód skaza, dóstanje woprawdźe lód družiny „ehm ...“, kreaciju lodu z běłej šokolodu a pistacijemi. Wothłós na nowy lód je pječa dobry.
Z elektro-rolerom na awtodróze 2 po puću był je 27lětny pola Braunschweiga. Policistam muž rozłoži, zo jědźe k tankowni po bencin, dokelž je tank awta prózdny. Zastojnicy ćišćachu awto na přichodne parkowanišćo. Tam zwěsćichu, zo njebě roler zawěsćeny. Jako chcyše muž znowa k tankowni jěć, policisća jězdźidło skónčnje sćazachu, napisawši skóržbu přećiwo 27lětnemu.
