To a tamne (07.02.24)
Strach před wysokosću je za tele dźěłowe městno špatna kajkosć. Tola wěda wo łódźnistwje a watowym morju stej porno tomu lěpšina. Za swoju Staru swětłownju pyta mała wuchodofriziska kupa Wangerooge noweho stražnika abo stražnicu. Požadarjo za dźěło měli po wupisanju dźěłoweho městna gmejny nimo toho ćělnje fit być. Dyrbiš znajmjeńša dwójce wob dźeń 161 schodźenkow přewinyć móc. 39 metrow wysoka čerwjeno-běło-čorna swětłownja je jedne z charakteristiskich znamjenjow znateje kupy w Sewjernym morju.
Do finala Stuttgartskeje olympiady kucharjow su wčera tak mjenowane Live-Carver swoje zamóžnosće dopokazali a z nožom wuměłske figury ze zeleniny a sada, twarožka, cokora a šokolody rězbarili. W běhu třoch hodźin dyrbjachu pjeć wšelakich twórbow pokazkow zhotowić.
To a tamne (06.02.24)
Na žeńtwu hotuje so 70lětny Dieter Bohlen ze swojej přećelku Carinu, z kotrejž je mjeztym 18 lět hromadźe žiwy. Tole je Bohlen nowinje Bild přeradźił. Pječa je datum hižo postajeny. 30 lět młódša Carina pak sej žada, zo Bohlen ju porjadnje wo mandźelstwo prosy. Bohlen sam je kedźbliwy: „To by třeće mandźelstwo było, te ma hač do kónca žiwjenja dźeržeć.“ Pola swojeje přećelki pak je sej Bohlen tónkróć dospołnje wěsty.
Dwanaće metrow do hłubiny padnył je štyrilětny hólc w sewjerorynsko-westfalskim Lünenje – a je přežiwił. Hólc bě wčera popołdnju w štwórtym poschodźe wjaceswójbneho domu zawrjene wokno wočinił, z woknom zalězł a do hłubiny zrazył. Helikopter dowjeze hólca do chorownje, hdźež jeho operowachu. Policija wuchadźa z „tragiskeho njezboža“. Pokazki na njeskutk nimaja.
To a tamne (05.02.24)
Wjace hač 3 000 lubowarjow motorskich je so minjeny kónc tydźenja při njepřijomnym wjedrje ze swojimi mašinami w Bayerskim lěsu na „zetkanje elefantow“ zhromadźiło. Wjacore dny trajacy spektakl zarjaduje cyłoněmski zwjazk motorskich. Miholenje postara so wo chětro błóćane wobstejnosće. Bayerski hospodarski minister Hubert Aiwanger přińdźe w gumijowych škórnjach. Zasadna ideja „zetkanja elefantow“ je dobra zhromadnosć při lěhwowym wohenju bjez piwoweho stana a wulkeho swjedźenja.
Njebojazni kuparjo w lódzymnej wodźe su so sobotu na brjoze Baltiskeho morja we Warnemünde zešli. Mužojo a žony přińdźechu zdźěla w pisanych kostimach. Morjo bě pjeć stopnjow zymne. Tole pak něhdźe 50 wobdźělnikow lodoweho kupanja njewottraši. Tysacy wćipnych su spektaklej přihladowali.
To a tamne (02.02.24)
Ćeknjenu wopicu zaso popadnyli su sobudźěłaćerjo zwěrjenca w Šotiskej po dny trajacym pytanju. Makak bě so njedźelu ze zwěrjenca zminył. Wobydlerjo běchu wobkedźbowali, zo so wopica rady w ptačich chěžkach z picu zastaruje. Pomocnicy tam na nju čakachu a zwěrjo z kłokom pohłušichu. Mjeztym je makak zaso w zwěrjencu.
Z winom na nadróžnych blokadach spytaja sej francoscy burja mjez šoferami wosobowych awtow sympatije zdobyć. Telewizijne sćelaki rozprawjeja wo přećelnej atmosferje a šoferach, kotřiž so ratarjam dźakuja a jich w stawku pohonjuja. W interneće pak jewja so tež kritiske hłosy: „Kraj pičkow! Žadyn dźiw, zo mamy najwyšu kwotu alkoholikarjow po wšěm swěće“, tam pisaja. Druzy so hórša, zo njejsu wobrazy žane dobre wabjenje za dostojnych francoskich winicarjow.
To a tamne (01.02.24)
„Sandalismus“ mjenuja žortnje akciju ludoweje uniwersity (VHS) w Buxtehude pola Hamburga: Na titulnym wobrazu noweje brošurki widźeć stej noze w běłych nohajcach w sandalach. Z akciju chcedźa zamołwići wjace muži do kursow VHS nawabić. Po wšej Němskej wučinja jich podźěl runje 18 procentow. Při tym su poskitki ludowych uniwersitow tež za muži atraktiwne. „Dyrbimy jich nastorčić, hewak so njehibaja“, šula zdźěla. Wothłós zbudźa mjeztym žiwe diskusije, tež negatiwneho razu.
Z juchu a palacymi so wobručemi na dróhach su ratarjo minjenu nóc w Magdeburgu přećiwo planowanym skrótšenjam na njedobro burow protestowali. W industrijnej kónčinje na sewjeru saksko-anhaltskeje stolicy ratarjo wjacore dróhi blokowachu. Policija palace so wobruče stajnje zaso hašeše.
To a tamne (31.01.24)
To a tamne (30.01.24)
Ćeknjena wopica je w šotiskich horach wulke rozpjeršenje zawinowała. Makaka bě minjeny kónc tydźenja ze zwěrjenca twochnył a w dźewjeć kilometrow zdalenej wsy wobydlerjam napadnył. Mjeztym je „mustwo nazhonitych hladarjow zwěrjenca“ wjes přeslědźiło. Wopica njeje wobydlerjam žane wohroženje, najebać to ludźom radźa, so wot njeje zdalować. Makaka je mjeztym nawuknył, zo namaka w ptačich chěžkach dosć picy.
Z mobilnym telefonom za woknom je dźewjećlětny hólc we Verdenskim wokrjesu pola Bremena zasadźenje policije zawinował. Na displayju steješe „Pomhajće mi!“ Na to zawoła nimoduca žona policiju. Zastojnikam hólc rozkładźe, zo chcyše scenu napodobnić, kiž bě w kinowym filmje widźał a „kiž měješe za wosebje lóštnu“. Policisća dźewjećlětnemu konsekwency tajkeje hry wuwědomichu.
To a tamne (29.01.24)
Nic za drohoćinki, ale za tykanc zajimował je so paduch w bydlenju w schleswigsko-holsteinskim Rendsburgu. Muž bě w nocy na sobotu do bydlenja wjaceswójbneho domu zalězł a sej tykanc na kuchinskim blidźe zesłodźeć dał. Wobydler w susodnej bydlenskej stwě so na spodźiwne zwuki dźiwaše, so na paducha dohlada a jeho narěča. Na to so cuzy z wočinjenym woknom zminy a po třěše ćekny. Policija jeho wjace njenamaka.
Wokna rjedźić je Michaelej Kretschmerej, ministerskemu prezidentej Sakskeje, wutrobita naležnosć a wulke wjeselo. Tole je šef sakskeho knježerstwa minjeny pjatk w rozmołwnym wusyłanju telewizijneho sćelaka MDR Riverboat přeradźił. Hłowna přičina njewšědneho konika je wuslědk: „Je to wulkotne, dokelž po tym něšto widźiš“, rjekny 48lětny Kretschmer w kruhu dalšich hosći pisaneho koła.
To a tamne (26.01.24)
Wjacore błyskače wotrězał je dotal njeznaty minjene dny na sewjeru Italskeje. Skućićel njeje znaty. Postupowanje na to pokazuje, zo jedna so wo jednotliwca, kiž z elektriskej piłu sćežory awtomatiskich nastrojow podrěza a powali. W socialnych medijach chwala skućićela jako rjeka a noweho Robina Hooda. Nětko diskutuja wo radarowych paslach na dróhach Italskeje. Kraj ma najwjace błyskačow po wšej EU: 11 000. Němska porno tomu něhdźe 5 000.
Hoberske mnóstwo metamfetamina z Němskeje su awstralscy cłownicy našli. 157 kilogramow syntetiskeje drogi běchu hižo kónc decembra na lětanišću w Sydneyju sćazali. Metamfetamin bě w 211 pakćikach pod zapakowanskim materialom schowany. Policija wumjetuje mjezynarodnym kartelam, zo chcedźa Awstralsku z drogami zapławić.
To a tamne (25.01.24)
Hnydom dwě wobchadnej zražce zawinował je 86lětny šofer wosoboweho awta w Werdauwje w Šwikawskim wokrjesu. Muž bě spočatnje přez wobchadnu kupu zajěł a sej při tym spódk awta roztorhał, na čož wolij motora wuběža. Zastał pak wón njeje, ale je hišće dwaj kilometraj dale jěł. Jězba so hakle skónči, jako wón do murje zahrodki zrazy. Muža dowjezechu do chorownje. Wěcna škoda wučinja po prěnim trochowanju 10 000 eurow.
Wo wunamakarju butroweje kokoški – sobu najwoblubowanišeje jědźe w Indiskej, dyrbi nětko sudnistwo rozsudźić. Wulke předewzaće gastronomije twjerdźi, zo je jědź jako prěnje w kraju poskićowało, žadajo sej wotškódnjenje 220 000 eurow wot konkurency, hdyž dale to samsne twjerdźi. Zwada zaběra mjeztym ludźi na wobydlerjach najbohatšeho kraja swěta tež internetnje
