Drježdźany (dpa/SN). Dotal zajimowaše so 3 150 ukrainskich ćěkancow za studij w Sakskej. Cyłkownje 1 650 z nich chce studij zahajić, dalšich 1 500 chce swoje w Ukrainje zahajene wukubłanje w swobodnym staće pokročować, zdźěli wčera sakske wědomostne ministerstwo w Drježdźanach. Ličby wobsahuja tež žony a muži z druhich krajow, kotřiž su w Ukrainje studowali a nadpada Ruskeje dla swoje wukubłanje přetorhnyli. Saksku kampanju pod hesłom „Zmištruj swój studij“ su mjeztym na ukrainskich ćěkancow rozšěrili, tak zo dóstawaja ći lóšo přistup k sakskim wysokim šulam.
Po informacijach sakskeho wědomostneho ministra Sebastiana Gemkowa (CDU) je wjele wysokich šulow swój požadanski čas podlěšiło a swoje popłatki za hosći wotstroniło. Sakski Agricola-studij, kotryž měri so předewšěm na zajimcow ze susodneju Pólskeje a Čěskeje, su mjeztym tež na Ukrainjanow rozšěrili. Dale skedźbni Gemkow na projekty, kotrež potrjechenym pomhaja němsce nawuknyć. „Najmjenje Ukrainjanow němčinu wobknježi a samo z jendźelšćinu je ćežko“, minister wujasni.
Budyšin (SN/MiR). Za durjemi žurle Serbskeho domu a biblioteki Rěčneho centruma WITAJ w Budyšinje knježi wulka ćišina. Njewšědne to začuće, wšako su prózdniny a za durjemi přebywaja dźěći. Samo jako Bianka Rachelic rumnosć wopušći, šćebotanje słyšeć njeje. Nawopak, dźěći, kotrež dožiwja na ferialnym kursu RCW wosebity serbskorěčny rum, wěnuja so z wulkej koncentraciju swojim nadawkam. Bianka Rachelic a Lydija Matikec studujetej na Lipšćanskej uniwersiće wučerstwo, Bianka za gymnazij a Lydija za wyšu šulu. Runja jimaj wuwučuje na kursu RCW Christiana Bukec, kotraž studuje wučerstwo za zakładnu šulu na Drježdźanskej Techniskej uniwersiće. Wšitke tři wěnuja so dźěćom wot 1. do 6. lětnika, kotrež zaběraja so wot wčerawšeho hač do pjatka z tym, so w serbskej rěči wukmanjeć a ju dožiwić. Za to su přichodne wučerki zhromadnje z Michaelu Hrjehorjowej, kotraž je ze stron RCW za projekt zamołwita, wotpowědny program přihotowali. Dwójce je so wona do toho ze studentkami zetkała a jim koncept kursa předstajiła.