Krótkopowěsće (15.06.15)
Štyri króć z přerězkom 1,0
Budyšin. Maturantam Serbskeho gymnazija wozjewichu minjeny pjatk pruwowanske wuslědki a predikaty. Kaž kubłanišćo zdźěli, je lětsa 56 šulerjow maturu złožiło. Wšitcy su pruwowanja wobstali. Štyrjo najlěpši docpěchu kónčny přerězk 1,0. Maturitna swjatočnosć z přepodaćom wuswědčenjow budźe 3. julija w Kamjenskim hotelu „Město Drježdźany“.
Chcedźa zwiski zesylnić
Dešno/Choćebuz. Hornjo- a delnjoserbska młodźina chce swoje zwiski zaso zesylnić. W prěnjej kročeli zetkachu so kónc tydźenja zastupnicy Pawka ze zastupnikami delnjoserbskeho młodźinskeho towarstwa Zapalaki. Mjez druhim wobhladachu sej domizniski muzej w Dešnje, Serbski muzej w Choćebuzu a wužiwachu čołmikowanje, sej mysle wuměnjeć.
Za sylnišu župu
Koncertuja při cyrkwičce
Radwor. Swój tradicionalny koncert při Radworskej starej cyrkwičce wotměje chór Meja njedźelu, 14. junija, w 16 hodź. Přeprosyli su sej Mejenjo Ralbičanskich młodostnych, a woni zahraja bajku wo wjerje, kotraž je kanibal. Hižo wot 15.30 hodź. poskića hosćom kofej a tykanc. Na lubowarjow spěwa a zabawy čaka rjane serbske popołdnjo.
W fabrice wjele dožiwić
Hórnikecy. Mjeztym hižo 12. swjedźenske hry wotměja so zajutřišim, njedźelu, wot 10 do 18 hodź. w Hórnikečanskej energijowe fabrice. Tam změja wiki z mnohimi rjemjeslnikami z regiona a dalšimi wikowarjemi. Jewišćowy program wuhotuja Hórnikečanski dujerski orchester, Kulowska rejwanska skupina, tamniši kolpingowy chór, kapała Franka Profta kaž tež hudźbna skupina Swingtime. Předewšěm za swójby budźe wjele poskitkow k hladanju a sobučinjenju.
Předawaja lisćiki za Mortkow
Stara technika fascinuje
Wětrowski oldtimerowy klub swjeći za tydźeń 30lětne wobstaće
Bóšicy (SN/MWj). Historiske jězdźidła su na kóždym wjesnym a dalšim swjedźenju jedyn z wjerškow. Často so ludźo dźiwaja, kak stara technika funguje a kak derje hladana je. Runje tomule hobbyjej wěnuje so Oldtimerowy klub wohnjokrute maćizny Wětrow. Mjeztym hižo 30 lět jeho čłonojo swoje dwu- a štyrikolesate lubuški hladaja, na nich šrubuja a je tež zjawnosći prezentuja.
Policija (12.06.15)
Wulka Dubrawa. W nocy na štwórtk běchu paduši traktorow w Budyskim wokrjesu po puću. W Porchowje, Łužnicy a we Wulkej Dubrawje měrjachu so woni na dohromady sydom traktorow. Dwě pokradnjenej mašinje je policija bórze po njeskutku zaso namakała. W třoch padach njebě so skućićelam poradźiło, motor zapinyć. Dwě pokradnjenej jězdźidle typa Fendt nětko pytaja. Dohromady nasta něhdźe 70 000 eurow škody.
Swjedźeń wjesela a sebjewědomja
Šěrachow-Korzym (CRM/SN). W lěće 1635 spožči so hornjołužiskemu městačku Šěrachow kejžorske prawo wikow. Wčera wječor zahaji so w tamnišej katolskej cyrkwi ze swjatočnym koncertom wjacednjowske swjedźenjowanje. Nimo měšćanosty Svena Gabriela (FDP) a fararja Martina Krausy je tež krajny rada Michael Harig (CDU) přitomnych w połnje wobsadźenym Božim domje postrowił.
Z koncertom pod nawodom kantorki Bernadett Schmidt skedźbni so zdobom na dołhu a wuspěšnu tradiciju hajenja cyrkwinskeje hudźby we wosadźe. Spěwarki a spěwarjo z cyłeje wokoliny wosadny chór zesylnichu. Z profesionalnymi spěwnymi solistami a instrumentalistami předewšěm z Budyšina poskići so kedźbyhódna hodźina hudźby, kiž smě so z prawom swjedźenska mjenować.
Krótkopowěsće (12.06.15)
Kontaktny forum za mjeńšiny
Strasbourg. Federalistiska unija europskich narodnych mjeńšin FUEN žada sej wot europskich statow připóznaće a škit rěčneje a kulturneje mnohotnosće. Tole potwjerdźi prezident Hans Heinrich Hansen wčera w Europskim parlamenće w Strasbourgu. Mjez druhim wón namjetowaše, zarjadować kontaktny forum za narodne mjeńšiny w parlamenće EU.
Žadaja sej runostajenje
Berlin. Zwjazkowa rada namołwja zwjazkowe knježerstwo, jenakosplažne partnerstwa na samsnu runinu z mandźelstwom stajić. To by rěkało, zo smědźa tež homoseksualne partnerstwa dźěći přiwzać. Zastupnistwo zwjazkowych krajow je dźensa w Berlinje z wjetšinu SPD, Lěwicy a Zelenych wotpowědnu rezoluciju knježerstwu schwaliło.
Poskića bórze wosebite baterije
Zwjazanosć z domiznu skrućeć
Serbski domizniski dźeń dopomina na swójske korjenje
Serbski domizniski dźeń wotměje so njedźelu w Lejnom a Ptačecach pola Wojerec. Wo přihotach a wobsahach je so Andreas Kirschke z fararjom Heinrichom Kochom rozmołwjał, kiž je wot lońšeho zastupowacy superintendent ewangelskeho cyrkwinskeho kruha šleska Hornja Łužica a domizniski dźeń sobu přihotuje.
Što je poprawom zmysł domizniskeho dnja?
H. Koch: Wón ma wědomje wo swójskim pochadźe a zwjazanosć z domiznu skrućeć. Na swójske korjenje so dopominać woznamjenja so tež na wěru dopominać. Zdobom ma domizniski dźeń ludźi pozbudźeć, zo serbsku rěč nałožuja a narodnu drastu noša.
Štó domizniski dźeń organizuje?
H. Koch: Zarjadowanje přihotuje dźěłowa skupina z něhdźe 20 čłonami. Mjez druhim su to superintendent Jan Malink a zastupjerjo Domowiny, wosadow a towarstwow na městnje. Skupina pak wotwěra so tež wšitkim, kotřiž so za serbsku rěč a za wěru zajimuja.
Što je njedźelu planowane?
W měsće 20 000 kwětkow sadźeli
Policija (11.06.15)
Lěskej. Mustwo wobchad wobstražowanskeje słužby Zhorjelskeje policajskeje direkcije je zawčerawšim na zwjazkowej dróze B 156 w Lěskej z kedźbliwym wóčkom wobchad wobkedźbowało. W běhu třihodźinskeje kontrole lepichu zastojnicy jědnaće šoferow, kotřiž spěšnišo hač dowolene přez wjes jědźechu. W negatiwnym zmysle wusahowaše při tym 57lětny muž z BMWjom, w Pólskej přizjewjenym. Při dowolenych 50 km/h smaleše wón ze 121 km/h po dróze. Na njeho čaka nětko najwyše chłostanje, kotrež pokutny katalog za tajke pady předwidźi, mjenujcy pokuta 680 eurow a třiměsačny zakaz jězdźenja w Němskej. Wotpowědne pismo ma nětko pokutny wotrjad krajnoradneho zarjada zestajeć a smalakej posrědkować.
