Pod hesłom „Serbšćina w digitalnych programach – soblexx, sotra, bamborak a Microsoft“ je Rěčny centrum WITAJ (RCW) wčera wječor zajimowanych na zarjadowanje do Benoweje žurle Jakubecoweho wustawa w Kulowje přeprosyło.

Kulow (SN/MiP). Něhdźe 20 hosći běše přeprošenju RCW sćěhowało. Tež wirtuelnje, w poskićenym online-streamingu, je so tón abo tamny na zarjadowanju wobdźělił. Wječor moderěrowaše nawodnica RCW dr. Beata Brězanowa. Mjez druhim wita tež Stefana Behrlu, zjawnostneho zamołwiteho předewzaća Microsoft za Saksku, Durinsku a Braniborsku. Wón sam dźěła hižo 10 lět ze serbskimi fachowcami w zwisku z wuwiwanjom a implementowanjom serbskorěčnych funkcijow w Microsoft-produktach hromadźe. „Wuraz dobreje kooperacije je přełožowarska funkcija Bing, kotruž Microsoft na jara dobrym rěčnym niwowje hižo dwě lěće za serbšćinu poskićuje“, wón wuzběhny.