To a tamne (29.09.15)
Swojoraznu jězbnu šulu skónčiła je policija w poruhrskim Hagenje. Zastojnikam bě awto napadnyło, kotrež po parkowanišću tam a sam jězdźeše. Njemało pak so dźiwachu, jako wuhladachu 13lětneho za wodźidłom. Pódla njeho sedźeše 38lětny nan, mějo dwaj promilej alkohola w kreji. 13lětny rjekny, zo jězdźić zwučuje. To wšak je w přitomnosći staršeju dowolene, jeho nan přispomni. Zastojnicy běchu hinašeho měnjenja a 38lětneho wobskoržichu.
Wino němskeje jednoty su studenća ze wšěch winowych kónčin kraja zhotowili. Při tym su wina wšitkich 13 plahowanskich kónčin k jednomu změšeli. Je to prěni projekt tajkeho razu w Němskej. Předstajić chcedźa wino 3. oktobra w Frankfurće nad Mohanom.
To a tamne (28.09.15)
Zadwělowany přihladować dyrbješe 60lětny w Delnjej Frankskej, kak so jeho awto w rěce Mohanje tepi. Muž chcyše sobotu wječor po informacijach policije swój čołm z pomocu připowěšaka z rěki wućahnyć. Čołm pak wopokaza so jako přećežki a sćahny připowěšak kaž tež awto do rěki. Muž móžeše runje hišće z awta wulězć, prjedy hač so wone podnuri. Wohnjowa wobora drje je zaso wućahny, wěcna škoda pak njeje runjewon mała.
Njeprošeneho hosća dyrbješe policija wčera rano z bydlenja žony w Saarbrückenje wjesć. Měnjo, zo je pjany při bydlenskich durjach znaty jeje přećela, bě žona njeznateho njedźelu rano do bydlenja pušćiła. Tón pak dźěše runu smuhu do spanskeje stwy a so lehny. Jako so přećel nawróći, so wukopa, zo wón muža we łožu scyła njeznaje. Tón bě so prosće mylił a wo wopačne durje kłapał.
To a tamne (25.09.15)
Chłóšćenkowe awtomaty za wopicy maja wot najnowšeho w Berlinskej coologiskej zahrodźe. Z nich móža sej wopicy słódne pelety wućahnyć – jeli to zdokonjeja. Za to dyrbja sej z kiješkow grat paslić a z jeho pomocu chłóšćenku z awtomata wućahnyć. Dalše pelety po wěstym časowym planje awtomatisce do chłóšćenkoweho kašćika padnu. Wulka lěpšina nowych nastrojow je: Wopicy su cyły dźeń zaběrane.
Nowy rekord spěšnosće awta chcedźa jendźelscy inženjerojo nastajić. Za to předstajichu wčera w Londonje wotpowědne jězdźidło Bloodhound. Awto, lěpje prajene lětadło na kolesach, ma hač do 1 600 km/h spěšne być. Dotalny rekord je 1 228 km/h. Nastajić chcedźa nowy rekord w Južnej Africe.
To a tamne (24.09.15)
Mylnje z paduchom awta stał je so 66lětny w bayerskim Kreuthu. Nawróćiwši so z pjekarnje njezalěze wón do swojeho, ale do runje tak wupadaceho awta a z nim wotjědźe. Krótko na to přińdźe wobsedźer awta z pjekarnje a zawoła policiju. Padustwo pak so spěšnje jako misnjenje wukopa. Wobaj šěrej wozaj běštej pódla so stałoj. Nimo toho bě „wobkradnjeny“ klučik awta tčacy wostajił.
Wosebiteho jandźela pěstona měješe koala w Awstralskej. Po zražce z awtom bě wón dlěši čas w motorowej hawbje zatłusnjeny. Šoferka bě do njeho zajěła a hakle dźesać kilometrow dale w garaži widźała, zo zwěrjo hišće w awće tči. Koala bě zražku kaž tež razantnu jězbu z awtom derje přetrał. W Awstralskej dochadźa stajnje zaso k njezbožam z koalemi, dokelž so wone „njelepje“ zadźerža, kaž nowiny pisaja.
To a tamne (23.09.15)
Mjerzanje ze sudnistwom hrozy mužomaj w Pólskej, kotrajž twjerdźitaj, zo staj ćah ze złotom němskich nacijow namakałoj. Nawodnica regionalneho zarjada za škit pomnikow je jeju mjeztym pola statneho rěčnistwa wobskoržiła. Wonaj běštaj njedaloko delnjošleskeho Wałbrzycha z pomocu radaroweho nastroja za ćahom pytałoj, njeměještaj pak žanu zarjadnisku dowolnosć. Skóržba nadźijomnje dalšich pytarjow wottraša.
Z mlokom woheń hašał je šofer mlokoweho nakładneho awta w delnjosakskim Bramsche. 41lětny bě wčera z awtom po puću, jako poča so zadnja wóska kurić. Bórze na to so wona paleše a wobruč so pukny. Šofer zasta, wotpušći štyri bowy mloka z tanka a tak woheń zhaša. Wohnjowa wobora jenož hišće wósku chłódźeše. Mloko do druheho awta wotklumpachu, zo móhli koleso wuměnić.
To a tamne (22.09.15)
Njewšědny narodninski dar je Margarete Erben z bayerskeho Kaufbeurena k stoćinam dóstała: jězbu do Libereca. Wona je tam hač do měrca 1945 bydliła – po tym pak město wopušći a so tak pozdźišemu wotsunjenju němskeho wobydlerstwa wuwiny. Na wopyće, organizowanym hromadźe z Liberecskej radnicu, su ju nětko hoberske změny napohlada města najbóle překwapili.
Prečćisnjene roztorhane pjenjezy staraja so w Darmstadće dale wo njeměr. Roztřihane a roztorhane dźěle eurobankowkow su woprawdźite pjenjezy, kaž policija zdźěla. To je přepytowanje Zwjazkoweje banki wunjesło. Dotal su pjenjezy na 23 městnach w Darmstadće namakali. Při tym jedna so wo 500-, 100- a 50eurowki. Zdźěla ležachu wone na dróze. Cyłkownje jedna so mjeztym wo nimale 20 000 eurow.
To a tamne (21.09.15)
Runje dźesać mjeńšin na swobodźe dyrbješe 58lětny hižo zaso do jastwa. Muža běchu minjeny pjatk pušćili. W samsnym času dóńdźe do bliskeje policajskeje straže wukaz zajeća přećiwo njemu, podhlada jebanstwa dla, kaž policija zdźěli. Zastojnicy muža njedaloko jastwa lepichu a hnydom zaso sobu wzachu.
Tójšto zapozdźenja zawinowała je skupina howjadow minjeny pjatk, jako stejachu wone na centralnej čarje spěšnikow mjez Kasselom a Fuldu. Wotrězk, na kotrymž tež spěšniki mjez Berlinom a Frankfurtom a Hamburgom a Frankfurtom jězdźa, bě mjez 19.35 a 21.05 hodź. zawrjeny. Zhromadnje z wobsedźerjom policisća kruwy popadnychu. Spěšniki wšak dyrbjachu w tym času po druhich čarach jězdźić, štož wjedźeše k zapozdźenjam hač do 45 mjeńšin. K zražkam z howjadami pak na zbožo njedóńdźe.
To a tamne (18.09.15)
Zwrěšćena padušnica je w Brühlu pola Kölna nuzowe čisło woliła, dokelž bě so při zadobywanju přez wokno zraniła. Krawjaca sedźeše chětro natutkana 48lětna žona na łožu w domje, do kotrehož bě so zadobyła. Při přetłóčenju wokna bě so wona wobsunyła a z nosom na woknowu desku zrazyła. Krawjaceho nosa dla pak so nastróži a zazwoni nuzowe čisło 112 wohnjoweje wobory.
Park město parkowanišća: Po wšej Němskej su aktiwisća dźensa na parkowanišćach nachwilnje małe parki zarjadowali. Pozadk je mjezynarodny „park(ing) day“, kotryž wotměwa so tradicionelnje třeći pjatk septembra. Hdźež hewak awta steja, kładu wuměłcy, wob- swětoškitarjo abo ludźo ze susodstwa kumštny trawnik a zarjaduja tam róžki k sedźenju. Akcije přewjedźechu mjez druhim w Berlinje, Stuttgarće, Mnichowje a Saarbrückenje. Při tym wabjachu tež za to, časćišo koleso wužiwać.
To a tamne (17.09.15)
Do Běłeho domu we Washingtonje přeprosył je prezident USA Barack Obama 14lětneho Ahmeda Mohameda. Jeho bě policija póndźelu w šuli w texaskim Irvingu zajała a sputaneho wotwjedła, dokelž měješe wučerka samopasleny časnik hólca w tobole za bombu. „Cool časnik, Ahmed. Chceš jón do Běłeho domu přinjesć?“, Obama na Twitteru piše, „trjebamy wjace dźěći kaž tebje, kotrež so za wědomosć horja.“
Z planowanym zhromadnym kofejpićom je młoda žona-započatkarka policiji wopodstatniła, čehodla je z awtom po bayerskim Chamje ze 111 km/h smaliła, byrnjež jeno 60 km/h dowolene było. Nimo toho njebě wona připasana. Nětko hroža jej chłostanje 160 eurow, měsac trajacy zakaz jězdźenja a dwaj dypkaj w Flensburgu. Nimo toho ju na dalekubłanje skazaja a pruwowanski čas podlěša.
To a tamne (16.09.15)
Potajna zelena pruha je w Strasbourgskej katedrali Našeje knjenje wot jutřišeho hač do spočatka nazymy widźeć. Swěći-li słónčko přez zeleny črij Jakuboweho syna Judy w mozaikowym woknje cyrkwje, pućuje pruha po Božim domje, wšědnje něšto wyše. 23. septembra w 12.24 hodź. docpěje wona najwyši staw nad Chrystusowej hłowu na klětce. Fenomen je Strasbourgski inženjer Maurice Rosart 1984 wopisał. Po jeho měnjenju njeje to připad, ale wotpohlad.
Hłódne mjedwjedźatko je na šuli w Denveru alarm zawiniło a je sej, po tym zo bě so z pizzu nasyćiło, w składźe imbisoweho wobchoda wusło. Policija z Colorada Springs nadeńdźe młodźo na polcy mjez žiwidłami. „Njewšědny kupc za pizzowy wobchod“ pisaše policija na twitter, po tym je sobudźěłaćer lěsniskeho zarjada mjedwjedźatko wotewzał.
