To a tamne (29.10.21)
Samlutki z měšćanskej železnicu po puću był je dakl w Mnichowje. Pos steješe w Grafingu pola Mnichowa sam na nastupišću a zalěze do ćaha, kiž jědźeše do směra na nutřkowne město. Pasažěram dakl napadny. Woni zawołachu policiju. Zastojnicy psa z picu zastarachu. Kaž so wukopa, bě sej 49lětny wobsedźer w ćahu wusnył. Tuž bě psyk sam z ćaha wustupił a z druhim dale jěł. Po dlěšim pytanju muž psa pola policije namaka.
Z pomocu interneta dźěćo porodźiła je 17lětna młodostna w Indiskej, po tym zo bě sej pola Youtube informaciski widejo wobhladała. Samodruhosć bě před staršimaj zatajić móhła. Wonaj zhoništaj wo wnučku hakle, jako słyšachu ze stwy dźowki žałosćenje ćěšenka. Policija je mjeztym 21lětneho nana dźěsća zajała, dokelž měješe seks z njepołnolětnej, štož je w Indiskej zakazane.
To a tamne (28.10.21)
Mjerzanje z policiju ma šofer wosoboweho awta, kiž je ze skóncowanej wobruču prosće dale jěł. Policija jeho w porynsko-pfalcowskim Frankensteinje zadźerža, dokelž jědźeše jenož hišće na zwjenje, a to k tomu dosć spěšnje. Zastojnikam muž rozłoži, zo nima narunanske koleso a tež žane pjenjezy za wotwlečenje. Policisća sćazachu na to klučiki awta. Te smě sej 72lětny wotewzać, po tym zo je skóncowane koleso wuměnił.
Před měsacomaj narodźena amurska leopardka w Lipšćanskim zwěrjencu rěka wotnětka Manju. Hladarjo zwěrjenca běchu so jednohłósnje za mjeno rozsudźili, kotrež woznamjenja „słódka“. Młoda kóčka je po wšej Europje prěnja narodźena amurska leopardka tutoho lěta, zwěrjenc zdźěla. Manju je stajnje zaso z maćerju po puću. Bórze móža ju wopytowarjo tež pod hołym njebjom wobdźiwać.
To a tamne (27.10.21)
Po nanuzowanej přestawce koronapandemije dla je wčera zaso 200 wobdźělnikow legendarny napřemoběh po 1 576 schodźenkach New Yorkskeho Empire State Buildinga přewjesć móhło. Najspěšniši bě Wai Ching Soh z Malaysije, kiž bě po 10 mjeńšinach a 46 sekundach w cilu. Lěta 2019 bě wón hišće na druhim městnje był. Najspěšniša žona bě Cinda Harris z USA, kotraž po 14 mjeńšinach a jednej sekundźe cyle horjeka doběža.
Roboter „Bella“ wot najnowšeho wopytowarjow hosćenca w schleswigsko-holsteinskim Grömitzu při Baltiskim morju posłužuje. Z njewšědnym pomocnikom chce hosćencar Tim Bornewasser problemy pobrachowaceho personala dla rozrisać. Rěčaca mašina nima pak čłowjeski serwis narunać. Wona pak móže jědźe a napoje přiwjezć. Skazanki přiwzaja dale čłowjescy kolegojo „Belle“.
To a tamne (26.10.21)
Z hajzlowej papjeru a kórkowymi škleńcami je překlepana rentnarka we Würzburgu wobšudnikow zjebała. Tući běchu ju zazwonili a sej pjenjezy žadali, dokelž je jeje dźowka pječa ćežke wobchadne njezbožo zawinowała. Žona pak scyła žanu dźowku nima. Najebać to wona přilubi, zo přepoda pjenjezy a debjenki. W tobole, kotraž wona kurěrej přepoda, pak běchu jenož papjera a škleńcy. Mjeztym informowana policija podhladneju w starobje 15 a 22 lět zaja.
Wobsadkam dźewjeć policajskich awtow je so wčera poradźiło, ćeknjeneho młodeho byka popadnyć. Zwěrjo bě w nocy njedaloko badensko-württembergskeho Lörracha po puću a měrješe so na awtodróhu 98, kotruž dyrbjachu tohodla nachwilnje zawrěć. Zhromadnje z wobsedźerjom, hajnikom a pomocnikami móžachu 300 kilo ćežkeho byka popadnyć.
To a tamne (25.10.21)
Hižo poł hodźiny po kradnjenju awta je policija w sewjerorynsko-westfalskim Bestwigu wobsedźerjej wóz zaso wróćić móhła. Zastojnicy wuhladachu awto na zwjazkowej dróze 480, po tym zo bě jich centrala wo kradnjenym awće informowała. Šofer spyta ćeknyć, dyrbješe pak po krótkej honjeńcy bjezwuhladnosć dowidźeć. 58lětneho zajachu. Wón dyrbi so padustwa, smalenja a jězdźenja bjez jězbneje dowolnosće dla zamołwić.
„Frizerskeho termina dla“ je šoferka wosoboweho awta městno njezboža w Regensburgu wopušćiła, bjez toho zo by so wo zranjenu wužiwarku rolera starała. 31lětna bě při zaparkowanju za njej jěducy roler přewidźała a by 21lětnu žonu bjezmała přejěła, kotraž bě při borzdźenju padnyła. Na to 31lětna z přispomnjenjom, zo dyrbi k frizerej, wotjědźe. Wona dyrbi nětko ze skóržbu ćeknjenja po njezbožu dla ličić.
To a tamne (22.10.21)
Hejata kóčka je w Sewjerorynsko-westfalskej zasadźenje wohnjoweje wobory zawiniła. Wobydlerjo domu w Grevenbroichu běchu jim njeznate zwěrjo w sušaku wuhladali. Dokelž so wone raznje wobaraše, njewědźachu sej hižo pomhać a wołachu wohnjowu woboru. Tola tež wobornicy mějachu swoju nuzu, byrnjež přez rukajcy škitani byli. Skónčnje sušak powalichu a chětro agresiwnu kóčku do sudobja tyknychu. Wzachu ju sobu a přepodachu ju porjadowemu zarjadej.
Z třomi promilemi alkohola w kreji je muž w sewjerorynsko-westfalskim Hagenje k awtowemu domej přijěł, zo by so za luksusowym wozom wobhonił. Předawarjej „chorhojčka“ muža hnydom napadny. Přiwołani policisća naměrichu tři promile a namakachu w awće prózdnu blešu wina. Muž drje prěješe, zo bě z awtom jěł, natočene wideojo pak to dopokaza.
To a tamne (21.10.21)
Policistam swoje hrajki pokazać chcył je štyrilětny hólc w Nowoseelandskej a je za to nuzowe čisło 111 wolił. Słužbu wukonjacy zastojnik bě hnuty a so k hólčkej domoj nastaji. Po tym zo bě sej hrajki wobhladał a pachołkej policajske awto z módrej swěcu předstajił, pak wón pjerachej a jeho staršimaj w „pedagogiskej rozmołwje“ rozłoži, zo je nuzowe čisło 111 jeno za nuzowe pady myslene.
Na wšě 159 000 eurow wunjesł je 505 kilogramow ćežki, jědnaće měsacow stary byk při přesadźowanju skotu w hornjobayerskim Weilheimje. Je to druha najwyša suma, kotruž su hdy w Němskej a Awstriskej za byka płaćili. Kupiło je jeho sewjerošwabske nasymjenjenske towarstwo w nadźiji, zo so inwesticija ze symjenjom byka Senatora zaso wupłaći. Toho geny lubja po dotalnym přepytowanju „strowe a płódne potomnistwo“.
To a tamne (20.10.21)
W hoberskim kuchinskim horncu na kwas přijěł je młody porik w Indiskej. Dny trajace zliwki běchu dróhi zapławili. Tuž so porik rozsudźi, w horncu do něhdźe poł kilometra zdaleneho templa jěć. Swójbni a přećeljo jimaj pomhachu a stajichu wideja a wobrazy wo tym do interneta. Poprawom chcyštaj sej čołmik wobstarać, štož pak so njeporadźi. W tohorunja zapławjenej hali templa jeju duchowny wěrowaše. Tajke hoberske horncy wužiwać wšak njeje w Indiskej njewšědne. Při zapławjenju lěta 2018 běchu mnohich na te wašnje wuchowali.
Swojeho handyja dla z woknom padnyła je młoda žona w Essenje. Wona steješe minjenu nóc při woknje na prěnim poschodźe domu, jako so jej telefon z ruki wusuny. Jako chcyše za nim hrabnyć, zhubi runowahu a padny z bydlenja. Na zbožo je so jeno snadnje zraniła.
To a tamne (19.10.21)
Wobdźiwajomna sprawnosć je 19lětnemu w zapadoafriskej Liberiji wulku česć jako narodny rjek kraja wunjesła. Emmanuel Tuloe, kiž so jako taksijowy šofer na motorskim přez wšědny dźeń drěje, bě plastowu titu z 50 000 dolarami (43 100 eurow) namakał a wobsedźerce wróćił. Předewzaćelka bě pjenjezy zhubiła a w rozhłosu myto přilubiła. Nětko je prezident George Weah młodostneho wosobinsce z najwyšim mytom kraja wuznamjenił – su to kubłanski stipendij, dwě motorskej a pjenježna premija.
Wosrjedź dróhi spać lehnył je so 21lětny pola hessenskeho Waberna na dompuću z kermuše. Šofer awta jeho njedźelu rano při kurjawojtym wjedrje runje hišće w prawym času wuhlada a informowaše policiju. Wšako muž wobě jězdni blokowaše. Zastojnicy dospołnje pjaneho wubudźichu a domoj dowjezechu.
To a tamne (18.10.21)
Wjace hač šěsć centnarjow, dokładnje 307 kilogramow, waži kirbs, z kotrymž je plahowar Andreas Kiefel tradicionalne wubědźowanje wo najćeši kirbs w mecklenburgsko-předpomorskim Alt Schwerinje dobył. Ze swojim „kirbsowym gigantom 2021“ ležeše 42lětny fachowc na polu IT wčera 30 kilogramow před druhim najćešim kirbsom. Wjace hač 2 000 hosći bě do ratarskeho muzeja pod hołym njebjom přichwatało.
Z nowymaj wjewjerčkowymaj mostomaj chcedźa w Trieru tomu zadźěwać, zo stawaja so tele hrymzaki zas a zaso z woporom nadróžneho wobchada. Něhdźe wosom centimetrow tołstej powjazaj mjez štomami nad jězdnju wabitej zwěrjata z picu. Po informacijach organizatorow su so wjewjerčki mjeztym na mosty zwučili a tež picu rady wužiwaja.
