„Rumpodicho, luby naš, praj hdźe wulki měch ty maš, połny ...“. Tele słowa drje budu jutře wječor w mnohich swójbach słyšeć, hdyž steja dźěći před brodačom a wočakuja najrjeńše dary. Haj, kelko z nich budźe tež tych prawych? Překwapjenja na kóždy pad zaso budu. A hižo sym so dóstał wot powšitkowneje tematiki k tematice sporta-překwapjenja. Tajkich drje bychu so koparjo a předewšěm fanojo Dynama Drježdźany rady wzdali. Hačrunjež je adwentny a hodowny čas swěčkow, čerwjena latarnčka by so runjež druhdźe swěćić móhła. Ćežki to puć k zachowanju klasy a makaberny tróšt, zo widźimy klětu snano wšitke hry live w 3. lize. Fakt wostanje tón, zo ma Dynamo cyle jednorje přemało dypkow, a prašam so kaž mnozy druzy: Čehodla njejsu do spočatka sezony k dispoziciji stejace pjenjezy za nowych hrajerjow inwestowali? Na to wšak móže najskerje jenož Ralf Minge wotmołwić. Kak dołho drje budźe wón hišće na čole Drježdźanskeho koparskeho kluba?