Za wjetšinu sportowych družin njetrjebaš jenož wotpowědnu a kmanu drastu, ale tež wšelake wosebite nastroje. Bul za kopańcu je hišće poměrnje jednory artikl. Myslimy-li pak na drohe płachtaki abo awtomobile w formuli 1, da so hižo cyle hinaše dimensije wotwěraja. Njech je, kaž je: Atleća, kotřiž w jednotliwych sportowych družinach přećiwo sebi nastupja, činja to pod jenakimi wuměnjenjemi, znajmjeńša z techniskeho wida. Wosebje wjedro a dalše wonkowne wobstejnosće pak so wo to staraja, zo tele wuměnjenja woprawdźe stajnje wurunane njejsu. Za wuhotowanje nastrojow pak płaća krute postajenja, zo njeby ke „skepsanemu wubědźowanju“ dóšło, kaž so němsce praji: „Wettbewerbsverzerrung“. Tak waži na přikład kula w kulostorku za muži stajnje 7,25 kilogramow, za žony štyri kilogramy. A hlebija za muži je 800 gramow ćežka, za žony 600 gramow. Za sportowy nastroj hlebiju pak je hišće dalši techniski fakt wažny – jeje ćežišćowy dypk. Tón dyrbjachu před lětami jednoho dnja zasadnje změnić, dokelž njebě wěstota sportowcow a přihladowarjow hižo zaručena.