Pjekarjo wo produkciskich móžnosćach starych žitnych družin diskutowali
Budyšin (SN/BŠe). „Wědomje za strowe regionalne zežiwjenje přiběra“, podšmórny předsyda pjekarskeho zjednoćenstwa Budyskeho wokrjesa Lutz Neumann wčera na zeńdźenju w rumnosćach wokrjesneho rjemjeslnistwa. Zešli běchu so tam łužiscy pjekarjo, kotřiž wobdźěleja so na projekće biosferoweho rezerwata Hornjołužiska hola a haty. Tam plahuje cyłkownje wosom ratarskich zawodow stare abo zabyte žitne družiny, kaž na přikład pšeńcu „Alter Pommerscher Dickkopf“ abo rožku „Jägers Norddeutscher Champagnerroggen“. Wudźěłki z toho su jara strowe a wosebje alergikarjam dobra alternatiwa. Znaty Rätzec młyn w Spytecach zorno předźěłuje a muku pjekarjam poskićuje. „Žně šampanskeje rožki běchu lětsa dešća dla špatne. W Klětnjanskim agrarnym drustwje su hišće wulki dźěl wuchowali a zorno sušili“, wuswětli jednaćel młyna Sebastian Unger. Naslědne přepytowanja pak wujewichu hubjeny staw zorna a tuž tež muki, kotraž nima hižo dobre pjekarske kajkosće.