Berlin/Choćebuz (SN/BŠe). Zastaranje z pitnej wodu w Berlinje a kónčinach podłu Sprjewje je dale a wjetši problem a budźe so přiwótřić. W suchich měsacach móhło po rěce hač do 75 procentow mjenje wody ćeć. Tole wuchadźa ze studije zwjazkoweho wobswětoweho zarjada, kotraž bu zawčerawšim wozjewjena. „Jelizo nětko njereagujemy, potom změjemy přemało wody. Krajej Braniborska a Sakska kaž tež město Berlin maja wužadanja zmištrować“, warnuje šef zarjada Dirk Messner. Pozadk problema je, zo so tuchwilu wokoło brunicowych jamow dnowna woda wotklumpa a do Sprjewje wjedźe, čehoždla ma rěka tuchwilu wjace wody k dispoziciji. Dobra połojca mnóstwa wody hač do města Choćebuza, je wotklumpana dnowa woda. W horcych měsacach wučinja podźěl samo hač do 75 procentow. Fachowcy mjez druhim doporuča, zo měli rěčne zawěry a wodowe składźišća wotpowědnje wuhotować. Tohorunja měli potrjechene knježerstwa zwjazkowych krajow pruwować, zwotkel móhli wodu brać. Tak měli nowe systemy rołow twarić, po kotrychž wodu do Sprjewje klumpaja.