Krajej Braniborska a Sakska wabitej za łužiski region na jara rozdźělne wašnje
Podstupim (SN/MiP). „Směmy so předstajić: Waša nowa konkurenca.“ abo: „Pola nas rěka mega giga!“ – Tutej a hišće tójšto dalšich jadriwych sloganow w chětro młodźinskim žargonje wuhladaš na internetnej stronje „“. Braniborske knježerstwo je do imageoweje kampanje „Die Lausitz. Krasse Gegend.“ dohromady 1,9 milionow eurow inwestowało, zo by fachowcow kaž tež předewzaćelow do braniborskeje Łužicy wabiło. Strona wuzběhuje wosebje šansy, kotrež zwisuja direktnje abo indirektnje z financnymi srědkami za spěchowanje Łužicy jako region w změnje strukturow. Jako pro-argumenty za kónčinu naličeja zamołwići mjez druhim: dźěłowe móžnosće w nastawacej nanajnowšej wuporjedźerni Němskeje za ćahi ICE w Choćebuzu, studij na Braniborskej techniskej uniwersiće Choćebuz-Zły Komorow (BTU) – druhej najwjetšej wysokej šuli kraja – kaž tež mnohotne wólnočasne móžnosće w Błótach abo we Łužiskej jězorinje. Kampanju su loni w decembrje zahajili.