Piktogramowa přiručka DGB
Stefan Triebs: „Čujemy so wopušćeni a zludani!“
Lejno (SN/BŠe). „Smy sej přezjedni, zo was tuchwilne płaćizny za mloko a mjaso jara wobćežuja, dokelž to hižo dlěje tak dźe. To pak so krótkodobnje změnić njehodźi“, rěka we wotmołwje sakskeho ratarskeho ministra Thomas Schmidta (CDU) na zjawny list Sakskeho burskeho zwjazka. List běchu 3. februara ministerskemu prezidentej Stanisławej Tilichej (CDU) přepodali. Po sydom tydźenjach su nětko skónčnje wotmołwu dóstali. „Čujemy so wopušćeni“, zwurazni předsyda burskeho zwjazka regiona Budyšin-Kamjenc Stefan Triebs na dźensnišej sobustawskej zhromadźiznje w Lejnje. Runje nětko, hdyž je Stanisław Tilich prezident Zwjazkoweje rady, so zastupjerjo ratarjow nadźijachu, zo móhli situaciju wužić a na dramatiske połoženje zawodow skedźbnić. „Smy zludani, zo njeje wón, ale ratarski minister wotmołwił“, Triebs wobžarujcy rjekny. Nadźijeli su so na podobnu reakciju kaž w Durinskej, hdźež bě ministerski prezident Bodo Ramelow (Lěwica) na zjawny list ratarjow reagował a jich na rozmołwu přeprosył.
Škałba přiběra
Budyšin (SN/at). We wuchodnej Sakskej bě kónc měrca 27 544 bjezdźěłnych. To je 973 (3,4 procenty) wosobow mjenje hač w februaru a 3 838 potrjechenych (12,2 procentaj) mjenje hač loni w měrcu. „Robustneho połoženja na dźěłowych wikach a nalětnjeho wožiwjenja dla je bjezdźěłnosć woteběrała. Wosebje we hłuboko- a wysokotwarstwje su znowa ludźi přistajili“, podšmórny Thomas Berndt, předsyda jednaćelstwa Budyskeje agentury za dźěło, dźensa na nowinarskej rozmołwje. Kwota bjezdźěłnosće we wuchodnej Sakskej je 9,5 procentow.
Poradźowarjo Budyskeje agentury za dźěło maja tuchwilu 3 299 njewobsadźenych dźěłowych městnow k dispoziciji, kotrež su socialneho zawěsćenja winowate. Porno měrcej 2015 je to 14 procentow wjace. Štóž dźěło pyta, ma tuž dobru šansu na nowopřistajenje, Berndt rjekny. Mjeńša bjezdźěłnosć a wulki zajim firmow za dźěłowymi mocami pak njezakrywatej přiběracu škałbu mjez potrjebu předewzaćow a kwalifikaciju bjezdźěłnych. Štóž na powołanski nowozapočatk mysli, njech njezabudźe na dalekubłanje, šef dźěłoweje agentury poruči.
Politikarjow regiona za bój zdobyć
Budyšin (JK/SN). Na delegatnej zhromadźiznje dźěłarnistwa IG metal Budyšin/wuchodna Sakska w měrcu znowa wuzwoleny społnomócnjeny Jan Otto předstaji dźensa w Budyšinje swoje zaměry nastupajo skutkowanje dźěłarnistwa w regionje. Otto chce wliw a móc dźěłarnistwa wosebje w srjedźostawskich zawodach wuchodneje Sakskeje zesylnić. Runje tu so zdźěla hišće njedostatki hladajo na dźěłowe wuměnjenja jewja.
Mnozy chcedźa twarić započeć
Šulerjo staciju nawjedowali
Gabriela Kubańkowa z Ralbic wo třitydźenskim projekće zahorjena
Wojerecy (SN/mwe). Hižo druhi króć přewjeduja we Wojerowskim klinikumje łužiskeje jězoriny šulerski projekt, kotryž so jutře po třoch tydźenjach zakónči. W třećim a poslednim wukubłanskim lěće je 22 absolwentow medicinskopowołanskeje fachoweje akademije při jězorinowym klinikumje zamołwitosć za ortopedisku staciju z njezbožowej chirurgiju ruki přewzało. Mjez hladanskimi šulerjemi je 44lětna Ralbičanka Gabriela Kubańkowa, kotraž změje po wuspěšnych pruwowanjach hižo swoje druhe powołanje. Dotal dźě běchu hladanscy šulerjo w chorowni chorobnym sotram a druhemu medicinskemu personalej mjenje abo bóle jenož poboku, nětko dyrbjachu so wo wšo sami starać. Wězo běchu so woni z wučerjemi a dalšimi cyle zaměrnje na projekt přihotowali.
We winowatosći
Grodk (SN/BŠe). Dwaceći měšćanostow a wjesnjanostow sakskeje a braniborskeje Łužicy zasadźa so zhromadnje w tak mjenowanym Łužiskim kole za zachowanje něhdźe 130 000 industrijowych dźěłowych městnow. Zawěsćić dźěłowe a žiwjenske wuměnjenja Łužičanow steji na prěnim městnje, zo by so strukturna změna w regionje radźiła.
Mnohe ideje a žadanja su tuž na swojim posedźenju tydźenja rozjimali. Rěčnikaj Łužiskeho koła, Grodkowska měšćanostka Christine Herntier (njestronjanka) a měšćanosta Běłeje Wody Torsten Pötzsch (Klartext), žadanja nětko zjimatej. Nastać ma dokument, kotryž chcedźa krajnymaj knježerstwomaj Braniborskeje a Sakskeje kaž tež zwjazkowemu knježerstwu přepodać.
Łužiske koło žada sej spěšnu wotmołwu. Milion wobydlerjow regiona ma prawo na to, zo politikarjo jich wobkedźbuja. Zwjazk a krajej tuchwilu njezamołwiće jednatej. Region je lětdźesatki milinu za cyły kraj dodawał, tohodla je narodna winowatosć, jón w strukturnej změnje podpěrać. Wuslědki chce Łužiske koło w meji zjawnosći předstajić.
Serbske figuriny w srjedźišću dekoraciskeho projekta
Město Budyšin chce so lětsa k jutram hišće sylnišo prezentować. Pomhać ma při tym wosebity dekoraciski projekt, kotryž klanki w serbskich narodnych drastach do srjedźišća staja.
Wabja tež w Pólskej a Čěskej
Dypkownje tydźeń do jutrow je Wochožanski park błudźenkow kónc tydźenja swoju lětušu sezonu zahajił. Na wopytowarjow čakaja nětko zaso wjacore wjerški a nowosće.
Wochozy (AK/SN). Regionalnje a nadregionalnje ma Wochožanski park błudźenkow lětsa sylnišo wuprudźeć. „Chcemy wjace wopytowarjow z Pólskeje a Čěskeje přiwabić“, podšmórny předsyda spěchowanskeho towarstwa błudźenkoweho parka Ulrich Klinkert minjeny pjatk k wotewrjenju sezony 2016.
Kamjenske wiki WIR zahajene
Kamjenc (JK/SN). Po zapiskanju kapały Horjany je so 24. Kamjenska přemysłowa přehladka WIR dźensa dypkownje w 13 hodź. zahajiła. W swojim postrowje wuzběhny Budyski krajny rada Michael Harig (CDU) wažnosć wikow, dać impulsy z wuchodneje Sakskeje do cyłeho kraja. „Při wšěm wuspěchu němskeho hospodarstwa mamy so rozestajeć z tuchwilnymi problemami nastupajo Bombardier a Vattenfall kaž tež w ratarstwje.“ Prezident Sakskeho krajneho sejma dr. Matthias Rößler (CDU) namołwi wustajerjow a hosći, so do zhromadneho dialoga dać a dobre nazhonjenja a wuspěchi tudyšeho rjemjesła kaž tež srjedźneho stawa přez mjezu wokrjesa sposrědkować.
Na to podachu so organizatorojo a prominentni na wopyt pokazkow. Jedna z prěnich stacijow bě wustajenišćo serbskeju rjemjeslnikow kachletwarskeho mištra Šćěpana Čornaka a šefa Kamjenjanskeho předewzaća R&Z Tomaša Rječki. Wot 15 hodź. su prominentni a politikarjo zhromadnje z pjekarjemi wokrjesa najlěpše tykancy zwěsćili.
