Fachowcow w twarskim wobłuku je dźeń a mjenje. To drje ničo nowe njeje. Hladajo na běžne tarifowe koło pak měli połoženje wobkedźbować a hižo nětko na přichodnych sobudźěłaćerjow myslić. Hłownje dźěłarnistwo na to mysli, mzdu zwyšić.
Budyšin (SN/BŠe). Twarska branša ma dale a mjenje fachowcow. Tež w Budyskim wokrjesu móhło so to z chutnym problemom stać, warnuje industrijne dźěłarnistwo twarstwo-agrar-wobswět (IG twar) z pokazku na statistiku zwjazkoweje agentury za dźěło. Z wobličenjow wuchadźa, zo je dźeń a ćešo fachowcow za njewobsadźene dźěłowe městna nańć. Porno lońšemu njebě cyłkownje 117 městnow branše dlěje hač 90 dnjow wobsadźenych. Před lětomaj bě to hišće 97 a lěto do toho 86 městnow.
Bórkowy (mih/SN). Ratarske wudźěłki a rjemjeslniske kmanosće su minjeny kónc tydźenja na mjeztym 19. błótowskich rjemjeslniskich a ratarskich wikach w Bórkowach widźeć a dožiwić byli. Najwšelakoriše twory za kuchnju a domjacnosć poskićachu tam ratarjo a producenća ze wšeho regiona. Woni přiwabichu ludźi z čerstwym chlěbom, mjedom, sadom a zeleninu, lanym wolijom kaž tež z błótowskim winom a palencom. Tež rjemjeslnicy běchu zaso pódla. Hornčerjo, rězbarjo, třěchikryjerjo ze sćinu a točerjo škleńcy pokazachu swoje zamóžnosće. Koronakrizy dla njebě lětsa žanych kulturnych přinoškow. Nimo toho běchu wiki dźělene: Rjemjeslnicy a ratarske zawody prezentowachu so na wulkim swjedźenišću, město toho zo dyrbjachu předawarjo napojow a jědźow zwonka naměsta wostać.
Budyšin (SN). Za čas koronakrizy kroči Budyske předewzaće Deutsche Backofenbau GmbH DEBAG po nowych pućach, zo by swojich přistajenych njeběrokratisce podpěrało. „W dobrych a předewšěm w časach korony měli so dźěłodawarjo wo swojich sobudźěłaćerjow starać“, měni nawodnistwo, kaž w nowinskej zdźělence rěka. Při wšěch wužadanjach je wažne, „wobzor šěrić a předewšěm zrozumjenje za nowe ćežke połoženje kóždeho jednotliwca měć. Chcemy swojim přistajenym pokazać, zo jim cyle pragmatisce při zmištrowanju wšědneho dnja za čas korony pomhamy. Předewšěm hladanje dźěći bě mnohim wažna tema“, rozłožuje jednaćel Debag Jost Straube. Zo móhli starši hladanje dźěći zaručić, je zawod časowe konta přistajenych wulkomyslnje napjelnił. Zdobom zmóžnichu jim dźěłowe časy fleksibelnje wuhotować – potajkim, zo móža dźěłać, hdyž so jim najlěpje hodźi.
Njebjelčicy (SN/mwe). W Njebjelčicach maja daloko znaty wjesny wobchod, w kotrymž móžeš sej přewažnje bioprodukty kupić. Štyrjo towaršnicy předewzaća zwěsćeja, zo je ličba kupcow w koronakrizy přiběrała.
To drje bě woprawdźe dobry rozsud, zo su někotři jenakozmysleni z Njebjelčanskim wjesnjanostu Tomašom Čornakom (CDU) před něšto časom wo to wojowali, na ležownosći gmejnskeho centruma wjesny wobchod zaměstnić. Jedyn ze sobuwojowarjow bě Hubert Lange. Dźensa ma wón wikowanske naležnosće předawanišća na starosći, kotrež je minjene tydźenje w krizy korony dla wjace kupcow přiwabiło.
Choćebuz (SN/at). Tradicionalne nazymske wiki/Choćebuske twarske wiki, kotrež běchu za 24. a 25. oktober planowane, lětsa prěni raz w dotal 23lětnych stawiznach njebudu. Kaž towaršnosć CMT Cottbus Congress, Messe & Touristik GmbH po słowach jednaćelki CMT Daniele Kerzel informuje, wot braniborskeho krajneho knježerstwa hač do 31. oktobra 2020 podlěšeny zakaz wulkopodawkow ze swojimi rjadowanjemi a wuměnjenjemi „nas jako zarjadowarja a wustajerjow we wuhotowanju nazymskich wikow/Choćebuskich twarskich wikow 2020 tak wobmjezuje, zo njeje pod překupskimi aspektami zmysłapołne je přewjesć“.
Hač do kónca minjeneho tydźenja bě CMT wiki hromadźe z wustajerjemi a partnerami planowała a so nadźijała, zo hodźa so z někotrymi wobmjezowanjemi wotměć. Rozsud njebě zamołwitym CMT lochki. Wšako maja jón za dalši ćežki dyr zarjadowanskej branši, kotraž wot lětušeho měrca koronapandemije dla jara ćerpi. Wotprajenje pak zdobom rěka, so rizika natyknjenja wobdźělenych – wustajerjow a wopytowarjow – wzdać.
Rakecy (SN/BŠe). Leaderowy region Hornjołužiska hola a haty (OHTL) chce 390 000 eurow wudać a zjawnje přistupne zarjadnišća kaž tež naměsta a swobodne płoniny porjeńšić. Za inwesticije do zarjadnišćow planuja cyłkownje 140 000 eurow, za wróćozdobyće płonin chcedźa 120 000 eurow wudać a za nowowuhotowanje ležownosćow něhdźe 86 000 eurow.
Hač do 7. awgusta smědźa priwatne wosoby, předewzaća, komuny a dalše swoje spěchowanske próstwy regionalnemu managementej w Rakečanskim Leaderowym běrowje zapodać. Projekty měli zaměram a kriterijam wuwićoweje strategije wotpowědować. W běrowje regionalneho managementa smědźa so zajimcy poradźować dać, štož je tež telefonisce móžno.
Tuchwilu ma towarstwo OHTL 48 sobustawow, kotřiž regionalne wuwiće a turizm w regionje podpěruja. Prawidłownje wobhonjeja so woni wo zwoprawdźenju naprawow. Tak budu to tež lětsa činić a přewjedu 7. septembra ekskursiju k projektam. Do toho změja swoju zhromadźiznu.
Hižo wot apryla nawjeduje Alexander Kühne wobłuk hospodarskeho spěchowanja města Wojerec. Poprawom bě rodźeny Wojerowčan powołanje fyzioterapeuta nawuknył, je jako tajki tež někotre lěta dźěłał a so zesamostatnił. Po studiju zjawneho hospodarstwa na Budyskej powołanskej akademiji bě wón sydom lět projektowy manager Wojerowskeho Łužiskeho technologijoweho centruma Lautech tzwr. Z bywšej hospodarskej spěchowarku města Franzisku Tennhardt je wón wšelake iniciatiwy kaž „hospodarsku snědań“ sobu organizował. Wo nowym dźěle, wo wužadanjach strukturneje změny kaž tež wo hospodarskich wizijach města a wokoliny je so z nim Andreas Kirschke rozmołwjał.
Čehodla trjeba město Wojerecy hospodarskeho spěchowarja?
Choćebuz/Běła Woda (SN). Dalši dźěl znowawužiwajomneje pohórnistwoweje krajiny je předewzaće Łužiska energija a hórnistwo (LEAG) wčera při Ćežkej horje na kromje Běłeje Wody za wopytowarjow wotewrěła. Kaž koncern zdźěli, wjedu wot tamnišeje wuhladneje wěže bjezbarjerne puće po hižo lěta 2015 zapołoženych terasach do noweje prioritneje přirodoškitneje kónčiny. Tafle skedźbnjeja wopytowarjow na to, što maja na dale pod hórniskim dohladom stejacym terenje wobkedźbować. Areal twori nowowutworjenu južnu skłoninu Ćežkeje hory, kotraž bu Wochožanskeje jamy dla w lětach 2006 do 2008 po dwěmaj třećinomaj wotbagrowana.
Rekultiwowana kónčina na juhu Běłeje Wody wobsteji ze sto hektarow emisiskeho škitneho lěsa z tudyšimi družinami štomow a kerkow a z 340 hektarow wulkeje płoniny z wotewrjenej krajinu. Z njeje móžeš sej z hórskimi terasami nětko nimale 10,5 hektarow wulki areal pěši wotkryć. Terasy su z drjewinami zwosadźane, kaž su to dorničel, dźiwja róža a jałorc. Rozšěrjene wobłuki, mjez druhim z pěskowej holu, je dominuja.