Krótkopowěsće (10.10.22)
Pfeiffer wólby dobył
Zły Komorow. Nowy měšćanosta Złeho Komorowa je Andreas Pfeiffer. Kandidat CDU je wčera rozsudne wólby z nachwilnym wuslědkom 54,4 procentow hłosow dobył. Za kontrahentku Nadine Hönicke (SPD), kotraž ležeše w prěnim wólbnym přechodźe prědku, hłosowaše 45,6 procentow wolerjow. Pfeiffer je tež trěbny kworum 15 procentow wólbokmanych docpěł. Wólbne wobdźělenje wčera bě 38,5 procentow.
Nowe hudźbne widejo „Ta ćma“
Budyšin. „Ta ćma“ rěka nowe, wot soboty w syći wozjewjene serbske hudźbne widejo. Skupina Astronawt je je zhromadnje z orchestrom Serbskeho ludoweho ansambla (SLA), Milenu Wowčerjec a Lilom Handrijom produkowała. Twórba je w Korzymskej wuměłskej hali „Friese“ nastała a bu přez saksku wabjensku kampanju „So geht sächsisch“ spěchowana.
Dwurěčne kemše swjećili
Krótkopowěsće (07.10.22)
Lawreatka je Annie Ernaux
Stockholm. Francoska spisowaćelka Annie Ernaux je lětuša lawreatka Nobeloweho myta za literaturu, kaž za renoměrowane wuznamjenjenje přisłušna Šwedska akademija wčera w Stockholmje wozjewi. Wona dostanje myto za „zmužitosć a klinisku wótrosć, z kotrejž korjenje, wocuzbnjenje a kolektiwne wobmjezowanja wosobinskich dopomnjećow wotkrywa“. Na lětušej přewšo potajnej „longlist“ za myto steješe 233 mjenow.
Blok E zaso přizamknjeny
Janšojce. Předewzaće Łužiska energija a milinarnje (LEAG) je 500 megawattowy blok E Janšojskeje milinarnje wčera we wobłuku zastaranskeje rezerwy zaso milinowej syći přizamknyło. Blok měješe wot oktobra 2019 za pad nuzowych situacijow w syći jako rezerwowa připrawa status wěstotneje hotowosće. Hladajo na aktualnu energijowu krizu smě pak přez nazymu a zymu zaso dźěłać.
Wosebite posedźenje
Krótkopowěsće (06.10.22)
Festiwal z „Dnjom Ukrainy“
Choćebuz. Z 13 filmami z Ukrainy a třomi wo njej je wot Ruskeje nadpadnjeny kraj lětsa we wšěch sekcijach Choćebuskeho filmoweho festiwala sylnje zastupjeny. Mjez nimi wobdźěla so tři přinoški na wubědźowanjach. We wobłuku lětušeho 32. festiwala steji 11. nowember pod hesłom „Dźeń Ukrainy“. Na nim přizamknjetej so dwěmaj filmomaj rozmołwje režiserow z publikumom, dale stej podijowej rozmołwje planowanej.
Pječat EU za Picnjanskeho karpa
Brüssel. Picnjanski karp je w přichodźe z pochadowym pječatom EU škitany. Wón smě so podobnje kaž Champagner abo Błótowske kórki jenož we wěstym geografiskim regionje plahować. W konkretnym padźe je to Braniborska. Wo tym je Europska komisija wčera w Brüsselu informowała. Kaž dale rěkaše, wuznamjenja so mjaso Picnjanskeho karpa přez swój charakteristiski słód a aromatisku wóń.
AWO z wobhospodarku
Krótkopowěsće (05.10.22)
Nowe filmowe myto
Choćebuz. Šula za delnjoserbsku rěč a kulturu je nowe filmowe spěchowanske myto „Akcija!“ we wysokosći dohromady 3 000 eurow za Łužisku filmowu přehladku na Choćebuskim filmowym festiwalu wupisała. Lětsa chcedźa najlěpši filmowy koncept wuznamjenić. Hač do 23. oktobra móža zajimcy ideje za maksimalnje 20 mjeńšin trajacy film zapodać.
Pěstowarska akcija zahajena
Budyšin. Smolerjec kniharnja je dźensa lětušu pěstowarsku akciju zahajiła. Kniharnica Stefanie Zänkerowa poda so do serbskich a dwurěčnych pěstowarnjow Hornjeje a srjedźneje Łužicy, zo by bohaty poskitk nakładnistwa na dźěćacych knihach a słuchoknihach pěstowarnjam a staršim předstajiła. Nowum je dwurěčny barbny skazanski zešiwk za staršich, z kotrehož pomocu móža sej z dźěćimi knižne wudaća zwuběrać.
Karel Čapek tabuizowany
Krótkopowěsće (04.10.22)
Tež wo Slepom rozprawjeli
Mainz. Serbow, Slepjansku kónčinu a brunicu tematizowali su wčera w filmje „Wir bleiben! Jung. Ostdeutsch. Selbstbewusst.“ Mathiasa Kubitzy a Larsa Seefeldta, kotryž je sćelak ZDF składnostnje Dnja němskeje jednoty wusyłał. Dokumentacija, w kotrejž so tež Slepjanska fararka Jadwiga Malinkowa słowa jima, je w mediatece ZDF hač do 2024 přistupna.
Wjele padow wopodstatnjenych
Drježdźany/Wermsdorf. Wot kónc oktobra 2020 do nětka je 1 653 padow afriskeje swinjaceje mrětwy w Zhorjelskim, Budyskim a Mišnjanskim wokrjesu wopodstatnjenych. Dotal je so poradźiło, zo njeje chorosć na wobstatk domjacych swini přeskočiła, zdźěli sobotu sakska socialna ministerka Petra Köpping (SPD) na wotewrjenju wikow „hońtwa a wudźenje“ we Wermsdorfje.
W Hućinje přednošował
Krótkopowěsće (30.09.22)
Jednohłósnje předsydstwo wolili
Budyšin. Towarstwo Přećeljo Smolerjec kniharnje je na swojej wčerawšej hłownej a wólbnej zhromadźiznje dr. Francej Šěnej znowa nawjednistwo zjednoćenstwa dowěriło. Za jeho naměstnicu wuzwolichu Měranu Cušcynu. Dalšej čłonaj předsydstwa staj Marka Maćijowa a Měrćin Wjenk. Róža Domašcyna bě so wospjetneje kandidatury wzdała. Wólby wotměchu so jednohłósnje.
Přichod je wobnowjomna energija
Choćebuz/Lipsk. Po předstawach koncerna Łužiska energija a milinarnje (LEAG) dyrbi we Łužicy najwjetši centrum za wobnowjomne energije nastać. Z wukonom sydom gigawattow móhli něhdźe štyri milionow domjacnosćow z „ekologiskej“ milinu zastarać, informowaše wčera nawoda předsydstwa LEAG Thorsten Kramer na wuchodoněmskim energijowym forumje w Lipsku.
Štwórta sakska „Slawiniada“
Krótkopowěsće (29.09.22)
„Němska wuchowa zežiwidła“
Žitawa. Pod tutym hesłom přewjeduja wot dźensnišeho po cyłej Němskej tydźeń přećiwo brojenju zežiwidłow. Něhdźe jědnaće milionow tonow žiwidłow so wob lěto zniči. Tak budźe na přikład njedźelu, 2. oktobra, w Žitawje „šniplowa disko“, při kotrejž na tamnišej domchowance prezentowanu zeleninu přetrjebaja.
Wodarnju do słužby stajili
Čorna Pumpa. Rozšěrjeny industrijowy wodočisćenski zawod kaž tež wodarnja wot wčerawšeho w Čornej Pumpje dźěłatej. W ramiku strukturneje změny bu za to 70 milionow eurow inwestowanych. Sakski statny minister za regionalne wuwiće Thomas Schmidt (CDU) je wažnosć planowanja kónca wudobywanja brunicy wuzběhnył a so při tym na předwidźane zakónčenje 2038 měrił.
Direktor parka wotwołany
Krótkopowěsće (28.09.22)
Zakónča „BETA-konferencu“
Běła Woda. Iniciatiwa „Kreatiwna Sakska“ zahaji dźensa z diskusiju „Kulturne a kreatiwne hospodarstwo w strukturnej změnje“ zakónčenje lětušeje „BETA-konferency“ w Běłej Wodźe. Hač do soboty slěduja mjez druhim „Serbski brunch“, prezentacija „Łužiskich typow“ a koncertaj skupiny Serbska reja a MC Anki.
Jan Faktor wuznamjenjeny
Braunschweig. Čěsko-němski awtor Jan Faktor je z lawreatom lětušeho Literarneho myta Wilhelma Raabeho, spožčeneho wot města Braunschweiga a rozhłosoweho sćelaka Deutschlandradio, dotěrowane z 30 000 eurami. Wuznamjenjenje spožča jemu za jeho aktualny roman „Trottel“, kotryž je z „eksemplariskim přikładom dotalneho spisowaćelskeho tworjenja awtora“.
Hranicu dočasnje stražować
Krótkopowěsće (27.09.22)
Płaćizny wobmjezować
Drježdźany. Drježdźanska rjemjeslniska komora ma płunowy popłatk za wopačny a žada sej hladajo na aktualnu energijowu krizu, zo płaćizny za energiju wobmjezuja, zdźěli wčera prezident rjemjeslniskeje komory Jörg Dittrich. Njeměli hižo čas brojić a pomocne programy zdźěłać. Połoženje je chutne a tuž je jasny kurs ze zmužitymi rozsudami trěbny.
Pjenjezy za saněrowanje
Choćebuz. Braniborska ministerka za kulturu a wědomosć Manja Schüle (SPD) wopyta jutře Choćebuski centrum za čłowjeske prawa. Tamnišej jednaćelce Heide Schinowsky chce wona spěchowanske srědki we wobjimje 210 000 eurow přepodać, tak zo hodźi so murja bywšeho jastwa zawěsćić a ponowić. Wot lěta 2012 je w bywšim jastwje wopomnišćo zarjadowane.
Swjedźeń žadneho štoma
Krótkopowěsće (26.09.22)
Za wosebity Oscar nominowany
Budyšin. Šěrokopasmowy projekt Budyskeho wokrjesa je so do kónčneho koła European Broadband Award Komisije EU dóstał, kaž krajnoradny zarjad zdźěli. Budyšin je w kategoriji „Kwalita a přistupnosć posłužbow“ hromadźe z projektomaj z Awstriskeje a Letiskeje nominowany. Hač wokrjesej renoměrowane myto „Šěrokopasmowy Oscar“ spožča, wo tym jutře w Brüsselu rozsudźa.
Termin w kanclerskim zarjedźe
Berlin/Budyšin. Skupina hornjołužiskich firmownikow je hromadźe ze zapósłancom Sakskeho krajneho sejma Markom Šimanom (CDU) dźensa w zarjedźe zwjazkoweho kanclera w Berlinje na eksistencielne temy wuwića w Hornjej Łužicy pokazała. Popołdnju bě rozmołwa ze społnomócnjenym zwjazkoweho knježerstwa za wuchodnu Němsku Carstenom Schneiderom (SPD) předwidźana.
Kabinet jutře w Serbskim domje
