Krótkopowěsće (20.08.15)
Kasa derje klinkota
Berlin. Stabilne wuwiće němskeho hospodarstwa zawěsća Zwjazkej a krajam wyše dawkowe dochody. W juliju zličichu financne zarjady z 49,3 miliardami eurami wo 8,6 procentow wyše dawki hač w juniju. Tak měješe fiskus w prěnich sydom měsacach lěta z 349,4 miliardami eurow, 5,9 procentow wjace dochodow z dawkow hač loni w samsnym času.
Egon Bahr zemrěł
Berlin. Politikar strony SPD Egon Bahr je w starobje 93 lět zemrěł. Bahr měješe wulke zasłužby při natwarje poćahow k wuchodnym krajam Europy w času zymneje wójny. Z Moskwu a Waršawu je jednał kaž tež wo zbliženje wobeju němskeju statow so prócował. Wón bě wuski sobuwojowar Willija Brandta a měješě wulki podźěl na politice němskeje SPD.
Registraciske kasy pozdźišo
Praha. Po najnowšich planach so obligatoriske zawjedźenje registraciskich kasow za čěskich předewzaćelow z 15. februara na 1. apryl 2016 přestorči. Tučasne financne ministerstwo wočakuje wot ewidency wobrota přidatnych 400 milionow eurow lětnje. Prawicarska opozicija wuznam a trěbnosć kasow prěje a přihotuje za nazymu bojkot cyłeho plana.
Krótkopowěsće (19.08.15)
Wudworčenjo na turneji
Cluj. Serbski folklorny ansambl Wudwor přebywa wot dźensnišeho na mjezynarodnym folklornym a rejwanskim festiwalu „17. Szent István“ w rumunskim měsće Cluj Napoca. 23 ansamblowcow budźe hač do njedźele serbsku kulturu předstajić. Cyłk pod nawodom Stanija Handrika přebywa tam mjez druhim na přeprošenje towarstwa Szarkaláb.
Wyši dawk za bjezdźěćnych
Praha. Čěske dźěłowe ministerstwo přihotuje zakonski namjet, po kotrymž měła so při wuličenju socialneho zawěsćenja tež ličba dźěći w swójbje wobkedźbować. Starši z jednym dźěsćom bychu zawěsćenje w tučasnej wysokosći płaćili, ći z wjace potomnikami něšto procentow mjenje. Bjezdźěćni měli procent wjace hač dźensa zapłaćić.
Trabi dale prědku
Zhorjelc. Trabant steji přeco hišće na čole lisćiny w Zhorjelskim wokrjesu přizjewjenych NDRskich awtowych weteranow. Nimale 700 Trabijow su tam hišće registrowane. Z widźomnym wotstawkom slěduje Wartburg (137) a na třećim městnje steji Wolga z 60 eksemplarami. Nimo toho su hišće dźesać Moskwičow a šěsć Saporožecow přizjewjene.
Krótkopowěsće (18.08.15)
Pad Annelie wujasnjeny?
Drježdźany. Po namakanju žónskeho ćěła njedaloko bydlenja a zajeću dweju podhladneju steji pad 17lětneje Annelie krótko před wujasnjenjom. Wuslědk sudniskomedicinskeho přepytowanja hišće njepředležeše. Po dopóznaćach statneho rěčnistwa a policije pak rěča wobstejnosće za to, zo je so dźowka předewzaćela z Mišnja stała z woporom złóstnistwa.
Z młodej mocu dale dźe
Budyšin. Dalši dołholětny sobudźěłaćer je wčera Budysku radnicu na směr wotpočink wopušćił. Michael Böhmer, měšćanosta za hospodarstwo, financy, kubłanje a socialne je po 21 słužbnych lětach swoje zastojnstwo do młódšeju rukow přepodał mjez druhim z poručenjom, tendency rozpušćenja w serbskim sydlenskim rumje zastajić.
Přidatne srědki za ćěkancow
Krótkopowěsće (17.08.15)
Wustajeńca wo Husu w Žitawje
Žitawa. Pod hesłom „Jan Hus – Wege der Wahrheit/Cesty pravdy“ su pjatk w Žitawskim Kulturnohistoriskim muzeju klóšter Franciskanow wustajeńcu wo čěskim reformatoru wotewrěli. Historiske rukopisy kaž tež wuměłske twórby, brónje a pjenjezy zwobraznja čas Husitow. Přehladka poskići wosebite zarjadowanja a je hač do 8. nowembra přistupna.
Nachwilne wolóženje
Budyšin. Dešć kónc tydźenja je so postarał wo wodychnjenje po dołhej horcoće a suchoće. Sćěhi suchoty pak njejsu z tym wurunane. Z 21 litrami je so w Schönteichen pola Kmjenca najwjace nadešćowało. W Kubšicach a Wostrowcu su nimale bjez dešća wostali při jenož jednym litrje.
Ekskursija raz hinak
Zhorjelc. Z fachowcami swojeho zarjadnistwa, zastupjerjemi Vattenfalla a Zwjazkoweje wobory je so Zhorjelski krajny rada Bernd Lange (CDU) podał štwórtk na ekskursiju po wojerskim zwučowanišću Hornja Łužica. Škit přirody a wobswěta a dalše wužiwanje přez Zwjazkowu woboru stejachu w srjedźišću ekskursije.
Termin za turněr kruty
Krótkopowěsće (14.08.15)
Derje hospodarili
Drježdźany. Sakske města, wjesne gmejny a wokrjesy steja na krutym financnym zakładźe. Wone zwoprawdźichu loni cyłkownje 326 milionow eurow nadbytka, potajkim 81 eurow na wobydlerja. Po cyłej Němskej je jenož Bayerska hišće wjace nahospodariła. Z nadbytkom hodźa so wšelake trěbne inwesticije derje zwoprawdźić.
Karpy za powětrom łója
Chrjebja. Tuchwilna horcota načinja łužiskim karpam widźomne ćeže. Wyšich wodowych temperaturow dla spaduje podźěl kislika we wodźiznach. W mnohich hatach łužiskich rybarjow samo woda pobrachuje. Zo njebychu ryby přidatnemu stresej wustajili, su w Chrjebjanskim rybarskim zawodźe započeli rybam mjenje picy dawać.
Financny zakład steji
Neugersdorf. Sponsorske zrěčenje lutowarnje Hornja Łužica-Delnja Šleska z koparskim mustwom FC Hornja Łužica Neugersdorf je podlěšene. Po postupje mustwa do regionalneje ligi su zdobom nowe kondicije wujednane. Wažny financny zakład za hospodarjenje koparskeho kluba je tuž zawěsćene.
Dynamo nětko načolnik
Krótkopowěsće (13.08.15)
Mjenje zajimcow
Žitawa/Zhorjelc. 3 800 młodostnych je próstwu stajiło za studij na Wysokej šuli Žitawa/Zhorjelc. To je 200 mjenje hač loni. K wosebje prašanym studijnym směram słušeja znowa techniske studije. Přizwolenja za studij su zajimcy mjeztym dóstali. Za studijne směry z numerusom claususom maja so požadarjo hač do 21. awgusta rozsudźić.
Nowa app za Hornju Łužicu
Budyšin. Pomoc za tury po Hornjej Łužicy předleži nětko jako nowa app za smartphony a tablety. Wudało je ju Marketingowa towaršnoć Hornja Łužica-Delnja Šleska. Darmotna app z interaktiwnej kartu a mnohimi kolesowanskimi a pućowanskimi šćežkami ma tež poskitki za wólny čas. App je tohorunja w interneće přistupna.
Klumpaja wodu do Sprjewje
Choćebuz. Hladajo na dołho trajacu suchotu klumpa koncern Vattenfall wšědnje 600 milionow litrow dnowneje wody do Sprjewje. Jeje hładźizna drje pomałšo hač w druhich rěkach spaduje, wodu Sprjewje pak koncern trjeba, zo by milinarnje chłódźił.
Z beachvolleyballom dale šło
Krótkopowěsće (12.08.15)
Wjace pšeńcy plahowali
Kamjenc. Sakscy ratarjo su lětsa wjace pšeńcy plahowali hač loni. Kaž statistiski zarjad w Kamjencu zdźěli, je so podźěl nalětnjeje pšeńcy wo 28 procentow a nazymskeje wo 0,6 procentow powjetšił. Pšeńcu plahowali su lětsa na cyłkownje 196 800 hektarach. Wona je najwažniša družina žita před ječmjenjom na 119 200 hektarach. Sakscy ratarjo wobdźěłuja lětsa dohromady 709 000 ha role.
Hłodowy stawk
Wojerecy. Hižo třeći dźeń někotři požadowarjo azyla we Wojerecach stawkuja a ničo wjac njejědźa. Chcedźa ćišć na zarjady wukonjeć, zo jich próstwy wo azyl spěšnišo wobdźěłaja. Zamołwići běchu jim rozsud w běhu třoch měsacow připowědźli, mjeztym čakaja hižo dlěje hač lěto. Wokrjesny wukrajny zarjad chcyše dźensa wo próstwje rozsudźić.
Tež w Čěskej na łosy skedźbnjeć
Krótkopowěsće (11.08.15)
Nowa móžnosć kolesować
Zły Komorow. We łužiskej jězorinje so syć kolesowanskich šćežkow z nowej Młynskej čaru wot septembra dale rozšěri. Kaž zdźěli nam Kathrin Winklerowa, jednaćelka turistiskeho zwjazka Łužiska jězorina, je tam mjeztym dźesać tematiskich kolesowanskich šćežkow. Zajimcy móža tak mjez druhim na slědach Strittmattera abo Krabata na puć podać.
Hotel „mama“ mjenje prašany
Kamjenc. Dale a mjenje młodostnych w Sakskej bydli hišće pola staršeju. Loni bydleše něšto wjac hač třećina (36 procentow) młodych ludźi doma. Před dźesać lětami bě to hišće wjac hač połojca (56 procentow). Přewažnje młodźi mužojo nimaja chwatne, so wot staršeju dźělić, kaž statistiski krajny zarjad w Kamjencu informuje.
Utta Danella njeboha
Mnichow. Spisowaćelka woblubowanych romantiskich knihow, kotrež su tež husto předłoha filmow, Utta Danella je, kaž bu nětko znate, hižo w juliju w Mnichowje w starobje 95 lět zemrěła. Rodźena Lipšćanka, kotrejež knihi su so wjacore miliony razow předawali, bu w kruhu swójby pochowana.
Hru přetorhnyć dyrbjeli
Krótkopowěsće (10.08.15)
Wučerjo zeznaja Saksku
Drježdźany. 48 wučerjow z jědnaće narodow přebywa wot dźensnišeho dwě njedźeli w dalekubłanskim centrumje Sakskeho kubłanskeho instituta Mišno. Pedagogojo wuwučuja w swojich ródnych krajach němčinu jako cuzu rěč. W Sakskej dóstawaja nowe nastorki za žiwu a wotměnjawu wučbu w cuzej rěči.
Bój póńdźe dale
Budyšin. Tarifowy konflikt za njelěkarskich sobudźěłaćerjow klinikuma Hornjołužiski hórski kraj njeje hišće wustaty. Dźěłodawarjo nochcedźa lońše tarifowe zrěčenje polěpšić. Wone bu wot wjetšiny přistajenych wotpokazane. Nětko maja so nowe jednanja wjesć, termin wšak hišće žadyn znaty njeje.
Čechow w Němskej lěkować?
Aš. Najzapadniše město Čěskeje republiki Aš je mjenje hač dźesać kilometrow wot bayerskeho města Selba zdalene. W padźe strowotnych problemow pak dyrbja wobydlerjo Aša do nimale 30 km zdaleneho Cheba jězdźić. Dokelž je Selb w minjenych 15 lětach třećina wobydlerjow wopušćiła, trjebaja tam čěskich pacientow. Wokomiknje jednaja wo tym, zo směli jich tam lěkować.
Na bus třělił
Krótkopowěsće (07.08.15)
Nawrót hišće wotewrjeny
Drježdźany. Měšćanska rada sakskeje stolicy je wčera Annekatrin Klepsch (Lěwica) za kulturnu měšćanostku wuzwoliła. Wona ma tuž swój mandat w krajnym sejmje 1. nowembra złožić. Tak móhł so serbski politikar Lěwicy Hajko Kozel do krajneho sejma nawróćić. Byrnjež tójšto podpěry měł, chcył wón do doskónčneho rozsuda swójbne, powołanske a politiske aspekty wotwažować.
Najwyši schodźenk warnowanja
Budyšin/Zhorjelc. Hladajo na dale trajace suche a horce wjedro płaći wot dźensnišeho na sewjeru Budyskeho a Zhorjelskeho wokrjesa najwyši schodźenk warnowanja před lěsnymi wohenjemi. Po lěsnych pućikach njesmě so hižo jězdźić. Awta na kromach lěsow wotstajić je zakazane, krajnoradnej zarjadaj informujetej. Zamołwići chcedźa dodźerženje zakaza kontrolować.
Gerd Natschinski njeboh
