Krótkopowěsće (23.06.21)
Na roli zwjetša žito rosće
Drježdźany. Na wjace hač połojcy sakskeje role plahuja žito, byrnjež jeho podźěl woteběrał. Žito inkluziwnje kukuricy rosće w swobodnym staće lětsa na 371 000 hektarach, štož je 4 600 hektarow mjenje hač loni, kaž Kamjenski statistiski krajny zarjad informuje. Daty złožuja so na naprašowanje mjez 630 ratarskimi zawodami w aprylu. Najwažniša plahowana žitna družina je pšeńca, slědujetej ječmjeń a rožka.
Jednotliwe nowe natyknjenja
Budyšin/Zhorjelc. W Budyskim wokrjesu su wčera wo štyrjoch dalšich natyknjenjach z koronawirusom informowali. 79lětna pacientka je w tym zwisku zemrěła, tak zo powjetši so ličba smjertnych padow na 934. Incidenca tu wučinja po Roberta Kochowym instituće dźensa 3,0. Zhorjelski wokrjes je wčera tři nowoinfekcije wozjewił. Incidenca po RKI je tam dźensa 4,7
Njewjesty su dźeń a starše
Krótkopowěsće (22.06.21)
Nowa referentka wuzwolena
Budyšin. Madlenka Di Sarno budźe naslědnica Wernera Sroki w funkciji referenta za naležnosće třěšneho zwjazka w Domowinskim zarjedźe. 35lětnu z Berlina, kotraž je wjetšinje znata pod holčim mjenom Kowarjec, je Zwjazkowe předsydstwo Domowiny minjenu sobotu wuzwoliło. Werner Sroka poda so kónc julija na wuměnk, kaž bu na hłownej zhromadźiznje w Slepom wozjewjene.
Incidenca pod pjeć
Budyšin/Zhorjelc. W Budyskim kaž tež Zhorjelskim wokrjesu wčera žane nowe natyknjenja z koronawirusom wozjewili njejsu. Zhorjelski krajnoradny zarjad pak wudospołni kónctydźensku statistiku, po kotrejž mějachu dohromady šěsć infekcijow. Tajke z dopokazanej deltawariantu běchu tam wčera tři wjac. RKI je dźensa incidencu 4,0 za Budyski a 4,4 za Zhorjelski wokrjes podał.
Myto za Tsitsi Dangarembga
Krótkopowěsće (21.06.21)
Prěni raz delta-mutaciju zwěsćili
Zhorjelc/Budyšin. Wo prěnim natyknjenju ze strašnišej delta-mutaciju koronawirusa su po sekwenciji minjeny pjatk w Zhorjelskim wokrjesu rozprawjeli, kaž tež wo dalšej zwěsćenej infekciji. Incidenca po RKI je tam dźensa 5,1. W Budyskim wokrjesu informowachu nastupajo koronu wot pjatka hač do wčerawšeho wo třoch nowych natyknjenjach a jednym smjertnym padźe. Incidenca po RKI je tu dźensa 5,3.
Namjetuja swjatočnosć w Zahorju
Njechorń. Rozjimajo lětuše projekty wupraja so čłonojo předsydstwa župy „Jan Arnošt Smoler“ Budyšin za to, wjacore popołdnja za swójby w župje podpěrać. Za lěto Zejlerja a Smolerja namjetuja woni, w decembrje 2022 swjatočnosć w Zahorju pola Budestec na česć Korla Awgusta Kocora wuhotować. Třěšny zwjazk měł zarjadowanje organizować.
W zastojnstwje wobkrućeny
Krótkopowěsće (18.06.21)
Młody wulkoprojekt předstajili
Budyšin. Serbski hudźbny kolektiw Trio a kumple a młodźinske towarstwo Pawk stej dźensa w Budyskej Röhrscheidtowej bašće projekt „Carpe noctem – Njeskónčna nóc“ předstajiłoj. Pop-opera změje 10. septembra w Chróšćanskej wjacezaměrowej hali „Jednota“ premjeru. Dohromady štyri předstajenja su planowane. Na jewišću a za nim skutkuje něhdźe 55 akterow, mjez druhim rejwarjo, spěwarjo a hudźbnicy.
Incidenca na niskim niwowje
Budyšin/Zhorjelc. Strowotniskemu zarjadej Budyskeho wokrjesa zdźělichu hač do wčerawšeho sydom dalšich natyknjenjow z koronawirusom. Aktualnje je 131 inficěrowanych wobydlerjow, 284 wosobow je w karantenje. Incidenca je lochce na 8,7 stupała. W Zhorjelskim wokrjesu zwěsćichu jednu nowoinfekciju. Incidenca tam je so na 4,4 pomjeńšiła. We woběmaj wokrjesomaj njeje wo dalšich smjertnych padach ničo znate.
Podpěra za delnjoněmski zapis
Krótkopowěsće (17.06.21)
Hornja Łužica pod incidencu 10
Budyšin. W Budyskim wokrjesu su wčera wo dźewjeć natyknjenjach z koronawirusom a třoch smjertnych padach informowali. Zemrěći běchu w starobje 63 do 81 lět. Incidenca je po Roberta Kochowym instituće dźensa 7,7. Wo třoch nowoinfekcijach a jednej w zwisku z koronu zemrětej wosobje informowachu wčera we wokrjesu Zhorjelc. Incidenca tam wučinja po RKI dźensa 4,7.
Twarnišćo labora wopytałoj
Zhorjelc. Zwjazkowy minister za hospodarstwo Peter Altmaier a sakski ministerski prezident Michael Kretschmer (wobaj CDU) staj dźensa přichodne twarnišćo wodźikoweho testoweho labora w Zhorjelcu wopytałoj. Labor je jedyn z centralnych projektow strukturneje změny we Łužicy. Kónc lěta chcedźa twarić započeć, wot kónca 2022 ma labor dźěłać. Zwjazk a Sakska přewostajitej jemu 42 milionow eurow.
Rusku a Chinu wuzamknyli
Krótkopowěsće (16.06.21)
Hač do kónca septembra
Budyšin. Šćěpjenskej centrumaj w Kamjencu a Lubiju ze swojimi mobilnymi teamami hač do kónca septembra dale dźěłatej. Prěnje šćěpjenja pak zaručeja tam jenož hišće hač do awgusta. W Budyskim wokrjesu přizjewichu wčera štyri natyknjenja z koronu a jedyn smjertny pad. Incidenca po RKI wučinja tu dźensa hódnotu 10. W Zhorjelskim wokrjesu rozprawjachu wo dwěmaj infekcijomaj. Incidenca po RKI je tam dźensa 6,3.
Hišće wušo z Pólskej dźěłać
Podstupim. Braniborska chce přichodnje hišće wušo ze susodnej Pólskej hromadźe dźěłać a po móžnosći wjele žiwjenskich a politiskich wobłukow splesć. To je krajne knježerstwo po informacijach statneje kenclije wčera wobzamknyło. Tak chcedźa mjezu přesahowacu zhromadnosć sylnić a rozrost pomjezneho regiona zhromadnje zaručić.
Startuja nowy podcast
Krótkopowěsće (15.06.21)
Dźeń a mjenje natyknjenjow
Budyšin. W Budyskim wokrjesu informowachu wčera wo jednym natyknjenju z koronawirusom. W tudyšich chorownjach lěkuja tuchwilu 44 koronapacientow, z nich dwanaće na intensiwnej staciji. Incidenca po RKI je tu dźensa 13,7. We wokrjesu Zhorjelc registrowachu wot soboty hač do wčerawšeho tři dalše infekcije a dwaj smjertnej padaj z časa wot 2. do 4. junija. Incidenca po RKI je tam 6,7.
Sputnik z ekologiskeje surowizny
Eespo/Paris. Finske předewzaće Arctic Astronautics a europska swětnišćowa agentura ESA wuwiwatej prěni přewažnje drjewjany satelit, kotryž chcedźa hišće lětsa do orbita dowjezć. Zaměr projekta „WISA Woodsat“ je wobkedźbować, kak so bjezćežitosć a radiacija w kosmosu na drjewo wuskutkujetej, a wuslědźić, hač hodźało so wone tam jako alternatiwa na přikład k zwjazowanskim maćiznam (Verbundstoffe) wužiwać.
Nahrawaja w Čěskej Šwicy
Krótkopowěsće (14.06.21)
W mnohich wobłukach bjez testa
Budyšin. W Budyskim wokrjesu njeje wot dźensnišeho w mnohich wobłukach hižo negatiwny koronatest trěbny. Na to skedźbnja krajnoradny zarjad, po tym zo bě incidencna hódnota pjeć dnjow za sobu pod 35. Wot pjatka hač do njedźele bě tu 22 nowych natyknjenjow, incidenca po RKI wučinja dźensa 17,1. Wokrjes Zhorjelc je předwčerawšim dwě infekciji a dalšej smjertnej padaj wozjewił. Infekcija tam je po RKI dźensa 7,1.
Lisćinu kandidatow schwalili
Njebjelčicy. Kulturna wědomostnica Cosima Stracke-Nawka, filmowc Reiner Nagel a Njebjelčanski wjesnjanosta Tomaš Čornak su kandidaća Serbskeho sejma za mandat serbskeho čłona Rozhłosoweje rady MDR. Jich mjena steja na lisćinje, kotruž su sejmarjo na swojim wirtuelnym posedźenju sobotu schwalili. Lisćinu chcedźa za zhromadny namjet nětko Domowinje přepodać.
Berlinala z nowinku
Krótkopowěsće (11.06.21)
Lochce stupace hódnoty
Budyšin/Zhorjelc. 17 dalšich natyknjenjow su hač do wčerawšeho w Budyskim wokrjesu zwěsćili. Z nich bě šěsć dodatnje podatych. Dwě wosobje stej zemrěłoj. W Zhorjelskim wokrjesu mějachu wčera šěsć nowoinfekcijow a dweju zemrěteju. Incidenca we woběmaj wokrjesomaj zaso lochce stupa. Roberta Kochowy institut poda za Budyski hódnotu 22,7 a za Zhorjelski 8,7.
Wostrowčenjo wuznamjenjeni
Bonn. Němska biskopska konferenca je iniciatiwu „Měrowy swjedźeń Wostrowc“ z hłownym Katolskim mytom přećiwo ksenofobiji wuznamjeniła. Wostrowčenjo běchu so prawicarjam, w městačku so schadźowacym, mjez druhim na te wašnje spjećowali, zo wobchodam wokoliny wšo piwo wotkupichu, a prawicarjo takrjec na suchim sedźachu.
Zabyty architekt znowa wotkryty
Krótkopowěsće (10.06.21)
Incidenca dźeń a snadniša
Budyšin/Zhorjelc. W Budyskim wokrjesu zličichu hač do wčerawšeho dohromady 18 dalšich infekcijow z koronawirusom. Z cyłkownje 43 stacionarnje zastaranych 14 pacientow intensiwnje hladaja, dwanaćo su zemrěli. Incidenca je so na 20,3 znižiła. W Zhorjelskim wokrjesu zwěsćichu štyri nowonatyknjenja a dwaj smjertnej padaj. Dale woteběraca incidenca tam aktualnje 7,5 wučinja.
Kritizuja wólbne procedere
Budyšin. W lisće Domowinje kritizuja někotři jeje čłonojo přećiwki we wustawkach towarstwa, předewšěm wólbne procedere delegatow na hłownu zhromadźiznu. Woni sej žadaja, předsydstwo njewuwjazać, doniž njejsu přećiwki wujasnjene. Domowina skedźbnja na bazodemokratiski princip a zo jako zarjad njediktuje, kak towarstwa swojich delegatow wola. Jeli so něchtó postorkuje, njech to najpjedy w towarstwje tematizuje.
Wobchad w Hřensku wolóžić
